Read Kaqchikel Jer 18 Bible Online

Jer 18 - Kaqchikel bible

Jer 18

¹Ri Jehová xch'on chik k'a wik'in y xubij chuwe chi

²yibe chirachoch ri achin banoy bojo'y richin chiri' nuya' jun rutzijol chuwe.

³Yin xibe k'a chirachoch ri achin ri' y xinbewila' nisamej rik'in ri torno.

⁴Toq ri banoy bojo'y najin chubanik jun rusamaj y man utz ta nel chuwech, nuyoj y nukamuluj rubanik k'a toq nutz'et na chi utz nel chuwech.

⁵K'ari' ri Jehová xuya' re rutzijol re' chuwe y xubij: Rix kan ixk'o pa nuq'a' achi'el ri xeq-ulew ri k'o pa ruq'a' ri banoy bojo'y. Y yin yitikir ninben iwik'in rix achi'el nuben ri banoy bojo'y, rik'in ri xeq-ulew.

⁷Pa jun ti ramaj yin yitikir ninbenya' rutzijol richin xkiyakatej chikij xabachike tinamit y chikij ri kiq'atbal-tzij richin yenk'uq-el, yenk'is y yenwelesaj-el jumul chuwech re ruwach'ulew.

⁸Jak'a wi rije' xa xtikijel ri kich'obonik y xa xtikiya' kan ri itzel taq kibanobal, yin man xtinteq ta chik pe ri ruk'ayewal pa kiwi'.

⁹Chuqa' pa jun chik ramaj yibech'on pa kiwi' ri winaqi' y pa kiwi' ri kiq'atbel taq tzij richin yenpaba' chik q'anej jun bey y xkek'iyer chik.

¹⁰Jak'a wi ri tzobaj winaqi' ri' nikiben ri etzelal y man nikiben ta ri nubin chik chike, yin kan xtintzolij k'a wi' chuwij rik'in ri utzilej ch'obonik ri xtinbenbana' kik'in rije'.

¹¹Tiwak'axaj k'a rix aj-Judá: Kan tiwetamaj k'a chi yin ninch'ob ninteq-pe jun nimalej ruk'ayewal pan iwi'. Tiya' k'a kan ri itzel bey y tichojmirisaj ri ik'aslen.

¹²Jak'a rije' xa xtikibij chawe chi man jun chik tabij chike, jak'a más utz yek'ase' achi'el ri nikajo' rije' y nikiben achi'el ri rurayibel ri itzel taq kánima.

¹³Roma ri' kere' xubij ri Jehová: Tik'utuj chike ri ch'aqa' chik tzobaj winaqi' richin re ruwach'ulew, wi k'o jun ri rak'axan achi'el re ch'abel re'. Kan qitzij na wi chi rix israelita kan janila itzel taq banobel ri ye'iben.

¹⁴Man jun bey nich'ub ri chuma-tew xeruxikin ri juyu' Líbano. Chuqa' man jun bey nichaqi'j-qa ri raqen-ya' ri nibiyin-pe chiri'.

¹⁵Jak'a rix nutinamit xa xinimestaj kan y kan nisuj pom chikiwech ri dios ri xa man e qitzij ta. Xa xban chiwe richin xipajk'ij iwaqen chupan ri ojer bey y xixbe chupan bey ri xa man e utz ta.

¹⁶Jak'a re wakami ri iruwach'ulew xtok jun tz'iran. Konojel winaqi' richin ch'aqa' chik ruwach'ulew ri xkeq'ax keri' kan janila xtikimey y kan xtikisiloj ri kijolon. Y jantape' k'a xtikiyojobej.

¹⁷Kan achi'el nutaluj-ri' ri kaq'iq' ri nipe pa relebel-q'ij, keri' xkixintaluj yin chikiwech ri e etzelanel iwichin. Jak'a ri ruche'el-wij ri xtinya' kan chiwech chupan ri q'ij toq xtinya' ri ruk'ayewal pan iwi', xcha' ri Dios.

¹⁸Chirij ri' ri winaqi' xkibij: Qach'obo' k'a rij achike niqaben chire ri Jeremías, roma jantape' ek'o ri e sacerdote ri yech'on chirij ri pixa', ri achi'a' aj-na'oj ri nikiya' pixabanik chiqe y ri ch'aqa' chik e q'alajirisey ruch'abel ri Dios ri nikiya' rutzijol chiqe. Qojch'on k'a itzel chirij y man qojniman chire, xecha-qa.

¹⁹¡Jehová kinawak'axaj k'a! ¡Tawak'axaj k'a ri nikibij ri e etzelanel wichin!

²⁰Toqaqa k'a chi'ak'u'x chi yin in ch'owineq awik'in pa kik'exel rije', richin chi nink'utuj chawe chi man naya' ta pe ruk'ayewal pa kiwi'. ¿Kan rik'in kami ri itzel nitoj-wi ri utz? ¿Achike k'a roma rije' xkik'ot jun jul richin yinkichop yin?

²¹Jak'a re wakami nink'utuj utzil chawe richin xtaben ta chi xkeken ri kalk'ual roma wayjal y roma ri espada. Ri ixoqi' kan xkemalkanej ta kan y xkek'is ta el konojel kal. Ja ta ri nima-yabil xtikamisan kichin ri achi'a', y ri alaboni' xkeken ta pa taq labal.

²²Chaq k'ate' k'a tataqa-pe jun tzobaj eleq'oma' chikij. Kan tak'axex k'a ri raqoj-chi'ij richin xibinri'il ri nikiben, roma kan xkik'ot yan jun jul richin yinkichop y kan xkiya' yan pikbel pa nubey.

²³Jak'a rat Jehová, kan awetaman ronojel ri kich'obonik ri kibanon chuwij y chi kan nikajo' yinkikamisaj. Man k'a takuy ri itzel taq kibanobal, ni man tamestaj ri kimak. Kan tabana' k'a chike chi chawech rat xtikipajk'ij-wi ri kaqen y kan rik'in k'a ri awoyowal taya' ri rutojbalil pa kiwi', xicha'.