Read Kaqchikel Jer 2 Bible Online

Jer 2 - Kaqchikel bible

Jer 2

¹Ri Jehová xch'on chik wik'in y xubij chuwe:

²Kabiyin pa tinamit Jerusalem y tabij chike ri winaqi' chi ja ch'abel re' ri ninbij yin chike: Noqaqa k'a chinuk'u'x chi ri pa rutikeribel, ri ite-itata' kan kiniman-wi nutzij, achi'el nuben jun ixjayilonel ri k'a juba' tik'ule', ri janila nrajo' ri rachijil. Ri ite-itata' kan xinkitzeqelibej pa tz'iran ruwach'ulew.

³Chupan k'a ri q'ij ri', rije' e nutinamit, ri kan e nuch'aron xaxe wichin yin; kan e achi'el ri nabey taq ruwech nutiko'n nubanon chike. Jak'a ri xek'ison kichin, yin kan xinya' ri ruk'ayewal pa kiwi'. Yin Jehová ri yibin.

⁴Tiwak'axaj k'a ri nuch'abel yin Jehová, rix ri ix rijatzul kan ri Jacob.

⁵¿Achike ta k'a ri man utz ta xkitz'et chuwij ri ite-itata' richin xinkimalij kan? ¿Achike kami roma xa xekitzeqelibej ch'aqa' chik dios ri xa man jun kejqalen y kiyon rije' xkiben-qa chi maneq chuqa' kejqalen?

⁶Rije' kan man xoqaqa ta k'a chikik'u'x akuchi ink'o-wi yin ri xinelesan-pe kichin pan Egipto y xenyuqej chupan ri tz'iran ruwach'ulew; jun ruwach'ulew nojineq rik'in nimalej taq siwan, ruwach'ulew akuchi maneq ya' y akuchi chi'anin yaken, jun ruwach'ulew akuchi man jun wineq niq'ax y ni man jun nik'oje' chiri'.

⁷Yin xenk'en-pe chupan re ruwach'ulew akuchi jebel nuya' ronojel ruwech tiko'n, richin chi nikitej ri ruwech y ronojel ri nuya' chiri', jak'a rix toq xixok chupan, xa xitz'ilobisaj ri nuruwach'ulew y xiben chire chi yin man utz ta chik nintz'et.

⁸Ri e sacerdote man xkibij ta: ¿Akuchi k'o-wi ri Jehová? Ri yeya'on pixabanik richin ri tinamit man xkiya' ta chik wejqalen. Ri aj-raqen xa xeyakatej chuwij, ri e q'alajirisey nuch'abel xa xech'on pa rubi' ri Baal y kan xekitzeqelibej dios ri xa man jun kejqalen.

⁹Roma ri' kan ninch'ojij chiwe rix y chike ri iwiy-imam. Yin Jehová ri yibin.

¹⁰Kixbiyin pa taq ruwach'ulew ri ek'o pa taq ya' ri e richin Quitim y titz'eta' jebel. Titaqa' k'a el jun pa tinamit Quedar richin chi niberutz'eta' kan jebel, wi ri winaqi' ri ek'o chiri' nikiben re jun itzel banobel re'.

¹¹¿K'o kami k'a jun tzobaj winaqi' richin ri ruwach'ulew ri kijalon ta ri ki-dios, stape' ri ki-dios rije' xa man e qitzij ta? Jak'a rix ri nutinamit xa xiniya' kan, yin ri k'o janila wejqalen y xa xinijel rik'in ri xa man jun rejqalen.

¹²Roma ri', chi'iwonojel rix ri ixk'o chuwech ri kaj kan tik'ama' rukiy. Kixbaybot k'a. Yin Jehová ri yibin.

¹³Rix nutinamit kan iqajben ka'i' mak: Rix xa xinimalij kan yin ri in k'aslik alaxibel-ya'. Chuqa' xa xe'itzeqelibej dios ri xa e achi'el yakbel taq ya' ri xa e teq'el, ri xa man utz ta richin niyak ya' chupan.

¹⁴¿Jun kami loq'on samajel ri tinamit Israel? ¿Man ix alaxineq ta kami pan iwachoch? ¿Achike k'a roma toq ixk'o pa ximonri'il wakami?

¹⁵Ri koj xkireq kichi' chirij, xeq'ajan chirij y xkiben chire ri ruwach'ulew chi man jun chik xk'oje' kan. Kan xkiwulaj k'a ri itinamit, xkiporoj kan y man jun chik wineq ri xk'oje' kan chupan.

¹⁶Ja jun ri winaqi' aj-Egipto ri e richin ri tinamit Menfis y Tafnes xkiqasaj-iq'ij.

¹⁷Kere' xik'uluwachij roma xa xinimalij kan yin, yin ri in iwajaw, ri i-Dios, ri kan ix nuyuqen chupan ri bey.

¹⁸Rix ikuquban ik'u'x kik'in ri aj-Egipto y ri aj-Asiria y kik'in ri ki-dios, y niwajo' niqum ri ya' chupan ri raqen-ya' Nilo y ri Éufrates.

¹⁹Ri Jehová k'iytisanel richin ronojel nubij: Ri imak xtuben chiwe chi xtuk'en-pe rutojbalil pan iwi' y ri itzel bey ri xik'uaj kan xkixruk'uaj pa tijoj-poqonal. Chiri' xtitz'et-wi jebel chi janila itzel y janila ruk'ayewal nuk'en-pe, toq xinimalij kan yin Jehová ri i-Dios y man xk'oje' ta chik nukiy chiwech.

²⁰Kan k'o yan chik q'ij ri ix yakatajineq-pe chuwij. Kan man xiwajo' ta xinimaj nutzij y xibij chi man niwajo' ta yinisamajij. Roma ri' pa ruwi' taq juyu' y chuxe' ronojel che' ri janila kixaq, chiri' xijech-wi-iwi' pa kiq'a' ch'aqa' chik dios, achi'el nujech-ri' jun ixoq ri itzel ruk'aslen pa ruq'a' jun chik achin.

²¹Yin xixinya' k'a chuwech re ruwach'ulew achi'el ri uva ri más jebel, achi'el ri ija'tz richin ri uva ri más jebel. Jak'a rix xa kan janila ix yojtajineq chik y kan man ninwetamaj ta chik iwech.

²²Yin Jehová ri iwajaw ninbij: Stape' ta xkixatin chupan ruya'al chaj y nikusaj ta ronojel ruwech xabon ri janipe' niwajo', chinuwech yin kan man xtik'is ta k'a el ri imak.

²³¿Achi'el toq nibij chi man ix tz'ilobitajineq ta, ni man jun bey xitzeqelibej ch'aqa' chik dios? Toqaqa chi'ik'u'x ri ibanobal ri xiben chiri' pa taq'aj kojol juyu'.*f2* Toqaqa k'a jebel chi'ik'u'x ri achike ri e ibanalon. Rix xa kan xitzeqelibej achi'el nuben jun ixoq camello ri nibujuj richin nukanoj jun achij y xabakuchi nibe-wi.

²⁴Chuqa' ix achi'el jun juyubel ixoq bur, ri ruk'ulun chire k'o pa tz'iran ruwach'ulew y nixupupula' pa rutza'n roma k'o rayibel chire richin netz'an. Toq k'o rayibel rik'in, kan man jun k'a nitikir niq'aton richin. Y wi jun achij kiej nikanon richin, kan chi'anin xtril y man xtikos ta na chukanoxik, roma ri ixoq bur ri' kan chaq jantape' k'o rayibel rik'in.

²⁵Roma ri' rix tinamit Israel man tiben chi nitziaqir ri ixajab richin junanin yixbe chikij ri ch'aqa' chik dios. Y man tichaqi'j pan ichi' richin yixanin chikij. Jak'a rix xa xibij chi man yixtikir ta niq'et-iwi' roma kan ye'iwajo' y chikij rije' yixbe-wi.

²⁶Achi'el nik'ixbitej ri eleq'om toq nilitej chupan ri releq', keri' k'a xkixk'ixbitej rix israelita: Rix, ri e i-rey, ri e itata'al, ri e i-sacerdote y ri e q'alajirisey nuch'abel.

²⁷Kan nibij k'a chire jun che': Ja rat ri at qatata', y chire jun abej nibij: Ja rat ri xatalan qichin, yixcha'. Jak'a chinuwech yin ja ri ruche'el-iwij ri xiya' kan. Man rik'in ri' toq nipe ruk'ayewal chiwij, k'ari' nibij chuwe: Katanpe chiqakolik, yixcha'.

²⁸Rix aj-Judá, ¿akuchi k'a ek'o-wi ri i-dios ri xe'iben? Keyakatej k'a pe rije'; q'alaj k'ari' wi yetikir yixkikol chupan ri bis. Roma kan achi'el ri rajlabal ri itinamit, kan keri' chuqa' kajlabal ri dios ri xe'iben.

²⁹¿Achike roma yixch'ojin wik'in yin wakami? Roma chi'iwonojel rix xa xixyakatej chuwij. Ja yin Jehová ri yibin.

³⁰Xa man jun xuq'ajuj richin xixinjich'aj, rix y ri iwinaq, roma xa man xik'ul ta ri nupixa'. Roma chaq k'ate' xe'ikamisaj ri e q'alajirisey nuch'abel achi'el nuben ri koj.

³¹Rix winaqi' ri ix richin re sol winaqi' re'; tiya' jebel ixikin chire ri nuch'abel. ¿Man jun kami nuya'on chiwe rix? o ¿Man jun kami nuq'alajirisan chiwech? Nutinamit yin, ¿achike k'a roma nibij chi rix ix totajineq chuwech ronojel y man jun bey chik xkixtzolin wik'in?

³²¿Kan numestaj kami jun xten, ri ruwi' ruxikin, ri retz'aba'l ruwi-ruq'a', ri richinaj y ronojel ri nukusaj? o ri xten ri nibek'ule' yan ¿Numestaj kami ri ruwiqobal richin ri ruk'ulubik? Jak'a rix ri nutinamit, kan k'o yan chik k'iy q'ij ri in imestan kan.

³³Kan jebel iwetaman rubanik richin nikanoj ajowabel kichin ch'aqa' chik. Kan qitzij na wi chi rix jajun chikiwech ri ixoqi' itzel kik'aslen xik'ut ri banobel ri'.

³⁴Y rix kan e ikamisan winaqi' ri xa man jun kimak kibanon y man xe'iwil ta chubanik jun eleq'. Stape' chirij ri itziaq kan xtz'etetej k'a kik',

³⁵jak'a rix nibij chi man jun imak ibanon. Y rix nich'ob chi yin man woyowal ta chik chiwe. Roma nibij chi man ix makuwineq ta, roma ri' wakami, yin xtinq'et-tzij pan iwi'.

³⁶¿Achike k'a roma kan chaq jantape' niwajo' yixbe-kela' yixbe-kela', richin nikanoj to'onik? Ri ruwach'ulew Egipto chuqa' xkixruk'ixbisaj achi'el xixruk'ixbisaj ri ruwach'ulew Asiria.

³⁷Kan xkixel-pe chiri' pan Egipto rik'in k'ixbilal, roma yin man utz ta chik yentz'et ri achoq ik'in ikuquban-wi ik'u'x. Y man jun bey xkixbe pa jotol koma rije', xcha' ri Dios.