Read Kaqchikel Jer 20 Bible Online

Jer 20 - Kaqchikel bible

Jer 20

¹K'ari' ri sacerdote Pashur ruk'ajol ri Imer aj-raqen pa ruwi' ri rachoch ri Jehová, xrak'axaj chi yin ninq'alajirisaj re ch'abel re',

²jari' toq xuteq rubixik chi kich'ay y tixim ri nuq'a-waqen y ri nuqul chuwech jun che', ri k'o chiri' chuchi' ri okibel richin ri Benjamín, ri kan nibe-apo choj pa rachoch ri Jehová.

³Y chupan chik ri jun q'ij ri Pashur xirelesaj-pe chupan ri che' ri' y k'ari' xinbij chire: Ri Jehová, wakami xujel ri abi' y xtabini'aj Magor-misabib.*f6*

⁴Roma ri Jehová kere' nubij: Xtinben k'a chawe chi xtak'en-qa akiy rat y ri awachibil xtikik'en akiy, roma xkekamisex chi espada koma ri e etzelanel iwichin. Y kan chawech k'a rat xtinjech-el chijun tinamit Judá pa ruq'a' ri rey richin Babilonia. Y rija' xkerukamisaj jujun chike rije' rik'in espada y ri ch'aqa' chik xkeruk'uaj-el pa ximonri'il.

⁵Keri' chuqa' xtinjech-el ronojel ri beyomel richin re tinamit re', ronojel ri e kich'akon rik'in ri kisamaj y ri k'o rejqalen ri k'o kik'in. Y xtinya' ronojel beyomel ri kichin ri rey pa kiq'a' ri e etzelanel iwichin. Xtikelesaj k'a el ronojel chuwi-kiq'a' y xtikik'uaj-el pa Babilonia.

⁶Y rat Pashur, xaq'alajirisaj ruyon tz'ukun taq tzij, roma ri' rat, konojel ri ek'o pan awachoch y ri awachibil xkixbe pa ximonri'il chiri' pa Babilonia. Y chiri' xkixken-wi kan y chiri' xkixmuq-wi, xicha' chire.

⁷Chirij ri' xinbij chire ri Jehová: Rat xinaq'ol y kan janila xiq'olotej. Rat kan más k'a awuchuq'a' chinuwech yin y kan xinach'ek. Ronojel q'ij ri winaqi' ri ye'ak'axan wichin xaxe tze'en nikiben chuwij,

⁸roma ronojel mul yin yich'on xaxe richin ninq'alajirisaj kamik o wululen. Roma ri' toq ninq'alajirisaj ri ach'abel, xa yinkiyoq' y yinkitze'ej.

⁹Jak'a wi man ninq'alajirisaj ta ri ach'abel o man yich'on ta pan abi' rat, jari' toq ri wánima k'o jun achi'el q'aq' ri nik'at chupan y man yitikir ta ninchup y napon k'a pa nubaqil, stape' ninwajo' nik'oje' chiri', xa kan k'o chi ninq'alajirisaj.

¹⁰Roma kan ninwak'axaj toq ri winaqi' yinkiyojobej y yejasjot y nikibij: K'o xibinri'il xabakuchi y nikibij: Qabesujuj, yecha'. Jajun ri wachibil koyoben chi yin k'o ta jun ninbij ri man ta nibanatej. Y roma ri' nikibij: Rik'in juba' xtuq'ol-ri' ruyon rija' y k'ari' xqojyakatej roj chirij y xtiqaya' rutojbalil pa ruwi', yecha'.

¹¹Jak'a rat Jehová atk'o wik'in yin. Ja rat at nukolonel ri k'o nimalej uchuq'a' awik'in. Roma ri' ri e etzelanel wichin kan xkech'akatej. Y man xketikir ta xkinkich'ek. Xa ja rije' ri xkek'ixbitej y kan xtaqasaj kiq'ij richin jantape'.

¹²Rat Jehová ri k'iytisanel richin ronojel ri kan ye'atz'et ri choj kik'aslen, natz'et chuqa' ri kinojibal y ri kánima. Taya' q'ij chuwe chi nintz'et rutojbalil-mak ri naya' rat pa kiwi' roma kan xisujun yan q'anej chawech.

¹³Ninbixaj abi' rat Jehová, ninya' aq'ij roma rat xinakol, yin ri in poqonatajineq pa kiq'a' ri e banoy taq etzelal.

¹⁴¡Itzel ruwa-ruq'ij ri q'ij toq xinalex yin! Ri q'ij toq xiruya' ri nte' chuwech re ruwach'ulew, kan man utzilej q'ij ta k'a.

¹⁵¡Itzel ruwa-ruq'ij ri xbanon chire ri nata' chi xkikot roma xya'ox rutzijol chire chi xinalex yin!

¹⁶Re ya'ol rutzijol re' kan ta xtiban rik'in achi'el xbanatej kik'in ri nima'q taq tinamit ri kan jumul xeruk'is ri Jehová ri ojer kan. Nimaq'a' yan nrak'axaj ta raqoj-chi'ij kichin ri e etzelanel richin y ri pa nik'aj-q'ij nrak'axaj ta ri raqoj-chi'ij richin ri labal ri nibanatej.

¹⁷Ri Dios man xuben ta chuwe richin xiken ta pa rupan ri nte'. Keri' ja ta ri nte' xok jul richin numuqubal y keri' yin man ta xinalex.

¹⁸¿Achike roma toq yin xinalex, xaxe richin nintz'et q'axo'n y tijoj-poqonal y richin nink'owisaj ri nuk'aslen rik'in k'ixbilal?, xicha'.