Read Kaqchikel Jer 21 Bible Online

Jer 21 - Kaqchikel bible

Jer 21

¹Ri Jehová xch'on chik jun bey wik'in toq niq'aton-tzij ri rey Sedequías pa ruwi' ri Judá, jari' toq xuteq-el ri achin rubini'an Pashur ruk'ajol ri Malquías y ri sacerdote Sofonías ruk'ajol ri Maaseías richin chi xbekibij re' chuwe y xkibij:

²Tabana' utzil kach'on rik'in ri Jehová pa qabi' roj, roma ri Nabucodonosor rey richin ri tinamit Babilonia xuchop yan richin nuben labal qik'in. Rik'in juba' ri Jehová nuben qik'in roj achi'el ri meyel taq banobel ri xuben ri ojer kan, richin chi yetzolin-el ri e etzelanel qichin, xecha'.

³K'ari' xinbij chike: Tibij chire ri Sedequías chi

⁴ri Jehová, ri qa-Dios richin Israel kere' nubij: Rix niben oyowal rik'in ri rey richin Babilonia y kik'in ri aj-Caldea ri ek'o-apo chirij ri tz'aq ri kisutin chik iwij. Jak'a yin kan xtinben chiwe chi ja ri ikamisabal rix yixkamisan-qa y ri e etzelanel iwichin xke'apon pa runik'ajal ri itinamit.

⁵Kan yakatajineq janila woyowal y roma ri' kan xtinben oyowal iwik'in rix rik'in nimalej wuchuq'a'.

⁶Kan xkixinkamisaj k'a chi'iwonojel rix ri ixk'o chupan ri tinamit Jerusalem. Rix y ri chikopi' ri ek'o iwik'in xkixinkamisaj rik'in jun nima-yabil.

⁷Chirij ri' yin Jehová xkenjech-el pa ruq'a' ri Nabucodonosor y ri ruwinaq; ri Sedequías, rey richin Judá, ri aj-raqen, ri aj-labal y ri winaqi' ri xek'oje' kan chire ri nima-yabil, ri man xekamisex ta chi espada y ri man xeken ta roma wayjal. Xkenjech pa kiq'a' ri e etzelanel kichin y pa kiq'a' ri ye'ajowan nikelesaj kik'aslen. Yin xtinben chi xkekamisex chi espada y kan man xtijoyowex ta kiwech. Yin Jehová ri yibin.

⁸Ri Jehová chuqa' xubij chuwe chi tinya' re jun rutzijol re' chike ri winaqi' y xubij: Ninya' chiwech richin nicha' ri bey richin k'aslen o ri bey richin kamik.

⁹Ri xtik'oje' kan chupan ri tinamit xtiken chi espada o roma wayjal o roma ri nima-yabil. Jak'a ri xtujech-ri' pa kiq'a' ri aj-Caldea ri kisutin-rij ri tinamit xtitikir xtukol ri ruk'aslen y man xtiken ta.

¹⁰Roma yin xinch'ob yan richin ninya' wululen pa ruwi' re tinamit re' y man ninben ta chik ri utz iwik'in. Xkixinjech k'a el rix pa ruq'a' ri rey richin Babilonia y rija' xtuya' kan ruq'aq'al ri tinamit. Keri' nubij ri Jehová, xicha' chike.

¹¹Y chuqa' chike ri aj pa rachoch ri rey richin Judá tabij: Tiwak'axaj ri ruch'abel ri Jehová.

¹²Rix ri aj pa rachoch kan ri rey David, kan tiq'ata' k'a tzij pa ruchojmilal ronojel q'ij. Kan tikolo' ri wineq ri nitz'ilox roma jun chik wineq. Roma wi man keri' ta xtiben y man niya' ta kan ri itzel taq ibanobal, ninwelesaj woyowal chiwij ri achi'el q'aq' rubanik. Nik'at k'a y man jun nitikir nichupun. Yin Jehová ri yibin.

¹³Rix aj-Jerusalem ri ixk'o chiri' pa taq'aj kojol juyu', kan ikuquban ik'u'x rik'in ri nimalej abej ri k'o chiri'. Rix kan nibij k'a chi man jun xtinaqo iwichin. Chuqa' nibij chi man jun nitikir nok-apo chupan ri itinamit. Yin Jehová ninbij chi kan xkinok etzelanel iwichin.

¹⁴Yin kan xtinya' rutojbalil pan iwi' achi'el ri ibanobal. Kan xtinya' ruq'aq'al ri rachoch ri i-rey y ri q'aq' ri' kan xtuk'is ronojel ri ek'o chunaqaj. Yin Jehová ri yibin, xcha'.