Read Kaqchikel Jer 22 Bible Online

Jer 22 - Kaqchikel bible

Jer 22

¹Kere' rubin-pe ri Jehová y xubij: Kabiyin pa rachoch ri rey richin Judá y tabij re ch'abel re' chire.

²Kere' nubij: Tawak'axaj ri ruch'abel ri Jehová, rat rey richin Judá ri atk'o kan pa rutz'uyubal richin q'atoj-tzij ri rey David, rat, ri aj-raqen y ri winaqi' richin ri tinamit ri ek'o wawe'.

³Kere' nubij ri Jehová: Tiq'ata-tzij pa ruchojmilal y tikolo' ri nitz'ilox roma jun chik wineq y man ke'iq'ol. Man kixeleq' kik'in ri man e iwinaq ta, ni kik'in ri meba'i', ni kik'in ri malkani'. Chuqa' man ke'ikamisaj ri winaqi' ri xa maneq kimak.

⁴Wi rix ninimaj re ch'abel re', rat y ri awijatzul kan jantape' k'a xke'ok-apo chupan ri jay ri'. Y rix kan jantape' k'a xkixbiyaj chupan ri i-carruaje y yixch'oke-el chirij kiej, iwachibilan ri e aj-raqen y ri iwinaq.

⁵Jak'a wi rix man ninimaj ta re ch'abel re', kan ninbij k'a chi re jay richin q'atbel-tzij kan xtitole' kan. Yin Jehová ri yibin.

⁶Ri awachoch rat rey achi'el ri jebelej ruwach'ulew Galaad, achi'el ruwi' ri juyu' Líbano. Jak'a kan xtinben k'a chire richin xtok tz'iran ri man jun wineq ri xtik'oje' chuwech.

⁷Kan xkenteq k'a winaqi' richin nikik'is ri jay ri' y chikijujunal xkepe rik'in kikamisabal y kan xkekichoy kan ri tem ri banon rik'in tiox-che', richin xkekiya' pa q'aq'.

⁸E k'iy k'a tzobaj winaqi' ri xke'ik'o chunaqaj re tinamit re'. Y rije' xtikik'utula-qa chikiwech, ¿achike k'a roma ri Jehová xuben kere' chire re tinamit re'?, xkecha'.

⁹Y xtibix: Roma xkiya' kan ri rujikibel-tzij rija' y xa xexuke' chikiwech ch'aqa' chik dios richin xekiya' kiq'ij.

¹⁰Chuqa' ri Dios xubij: Man kixoq' y man kixbison chirij ri rey Josías, roma rija' xa xken. Xa kan janila kixoq' y kixbison chirij ri Joacaz*f7* ri ruk'ajol, roma rija' nibe y man nitzolin ta chik pe. Kan man jun bey chik xtutz'et ri ruwach'ulew ri akuchi xalex-wi.

¹¹Roma kan keri' nubin chirij rija', roma kan xk'oje' kan pa q'atbel-tzij pa ruk'exel ri Josías ri rutata'. Y rija' kan man jun bey chik xtitzolin-pe.

¹²Xa kan xtiken kan chiri' akuchi xtuk'uex-wi-el pa ximonri'il y roma ri' kan man jun bey chik xtorutz'eta' re ruwach'ulew, xcha'.

¹³Y ri Dios xuya' chik re jun rutzijol re': Toq'ex ruwech ri rey ri nupaba-q'anej ri rachoch ri xa man pa ruchojmilal ta ri nuben, roma xa nuben chire ri ruwinaq chi nisamej rik'in y man nutoj ta.

¹⁴Y ri rey ri' nubij: Kan xtinpaba-q'anej wachoch ri kan jebel nim y xtinpaba-q'anej jay nima'q pa rukaj wiq. Chuqa' xtinya' ki-ventana y kan jebel tiox-che' ninya' chirij. Y ri tz'aq kichin ri jay ri' xkenwaq'omaj rik'in keq, ncha'.

¹⁵¿Y rat Joaquim nach'ob chi ri yatok rey, xaxe richin yak'ase' chupan jay ri sutin-rij chi tiox-che'? Ri atata' man xuch'ob ta keri', man rik'in ri' kan jebel xk'ase' chuwech re ruwach'ulew. Kan pa ruchojmilal xuben ronojel y roma ri' ronojel utz xuben chuwech.

¹⁶Kan xeruto' k'a ri man jun k'o kik'in; chuqa' xeruto' ri yetz'ilox y roma ri' kan ronojel utz xel chuwech. Re' nel chi tzij chi kan retaman nuwech.

¹⁷Jak'a rat xaxe nawajo' richin nik'oje' ta más améro ri man ach'akon ta pa ruchojmilal. Kan xe'akamisaj ri winaqi' ri xa maneq kimak y kan janila xe'aya' pa tijoj-poqonal.

¹⁸Roma ri' kere' nubij ri Jehová pa ruwi' ri rey Joaquim, ruk'ajol ri Josías y kere' nubij: Man jun k'a xtoq'en ri akamik y man jun xtubij ta: ¡Wach'alal yin! ¡Wach'alal yin! Chuqa' kan man xtikibij ta ¡Xk'is ri aq'ij y ri ak'ojlen!

¹⁹Kan man jun xtimuqun awichin, xa xkatkiqirirej-el y xkatkibek'aqa' kan chirij el ri tinamit Jerusalem, achi'el niban rik'in jun bur.

²⁰Rix ri aj-Jerusalem, ¡Kixjote-el pa ruwi' ri juyu' richin Líbano, kixbiyin pa ruwach'ulew Basán o pan Abarim! y chiri' tiraqa' ichi' roma konojel ri ye'ajowan iwichin, kan xech'akatej yan.

²¹Yin xich'on yan iwik'in toq utz ixk'o, jak'a xa man xiwajo' ta xiniwak'axaj. Kan keri' k'a ibanon-pe toq k'a ixk'o na pan iq'opojil. Kan man iwajowan ta k'a iwak'axan ri nuch'abel.

²²Roma ri' ri kaq'iq' xkeruk'uaj-el konojel ri aj-raqen ri ek'o chi'ikojol. Konojel ri ye'ajowan iwichin xke'uk'uex-el pa ximonri'il. Y kan xkixk'ixbitej k'a kan y xtiqasex iq'ij, roma ronojel ri itzel taq ibanobal.

²³Rix wakami kan jebel ina'on chupan ri iwachoch ri e banon rik'in tiox-che' ri e k'amon-pe pa juyu' Líbano, jak'a xa xtibetija' yan poqon toq xtipe q'axo'n iwik'in, achi'el ruq'axo'n jun ixoq toq nalex yan jun ti ral.

²⁴Yin Jehová ri k'aslik Dios, yich'on pa ruwi' ri rey Jeconías*f8* ruk'ajol ri Joaquim. Stape' rija' kan k'o ta janila rejqalen achi'el ri lipq'a' ri k'o chirij ri ruwi' nuq'a' ri k'o pa wijkiq'a', yin kan xtinwelesaj-el chupan ri ruq'atbal-tzij roma ri rumak.

²⁵Yin kan xtinjech-el pa kiq'a' ri achoq chikiwech janila nuxibij-ri'; chire ri Nabucodonosor rey richin Babilonia y chikiwech ri aj-Caldea.

²⁶Kan xkenk'uaj k'a el pa ximonri'il rija' y ri rute'. Xkenteq chik el pa jun ruwach'ulew ri akuchi man chiri' ta xe'alex-wi y k'a chiri' xkeken-wi.

²⁷Stape' xtikirayij xketzolin chik chupan re ruwach'ulew re', ri janila nikajo', jak'a kan man xketzolin ta chik pe.

²⁸Ri Jeconías achi'el xa ta jun paxineq bojo'y ri man jun chik nik'atzin-wi. Rija' achi'el jun k'ojelibel ri man jun nipoqonan richin. Keri' xtinben chire rija' y chike ri aj pa rachoch. Y achi'el nik'aq-el jun paxineq bojo'y keri' xtinben yin kik'in rije' pa jun chik ruwach'ulew ri man jun bey kitz'eton.

²⁹Iwonojel rix aj-Judá, kan tiwak'axaj k'a chi utzil ri nuch'abel, yin Jehová.

³⁰Ri Jeconías kan xtitz'ibex k'a kan rubi' chupan ri wuj kichin ri e kijatzul, chi rija' achi'el xa ta man xek'oje' ta ralk'ual, achi'el jun achin ri man jun utz nel chuwech. Roma kan man jun chike ri rijatzul rija' ri xtitikir ta ri xtitz'uye' kan pa rutz'uyubal ri David richin xtiq'aton-tzij pa ruwi' ri tinamit Judá, xcha' ri Dios.