Read Kaqchikel Jer 23 Bible Online

Jer 23 - Kaqchikel bible

Jer 23

¹Y ri Jehová xubij: Toq'ex k'a iwech rix ri xixok aj-raqen pa kiwi' ri nuwinaq, roma ix achi'el yuq'unela' ri yekik'is y yekitaluj-el ri karne'l.

²Kere' k'a ninbij yin Jehová ri i-Dios, pan iwi' rix yuq'unela' ri ixk'o pa ruwi' ri nutinamit: Rix kan k'o chi ximol ta juba' kichi' ri nukarne'l y xe'ik'uxla'aj ta juba'. Jak'a xaxe xe'inim kan. Y roma ri' xtinya' rutojbalil-mak pan iwi'.

³Stape' yin xkentaluj-el pa taq ch'aqa' chik ruwach'ulew, jak'a kan xtapon chik jun q'ij ri xtinmol chik kichi'. Xkentzolij k'a pe ri akuchi xeyuq'ux-wi pa nabey. Y wawe' xkek'iy-wi y kan xkek'iyer.

⁴Yin kan xtinya' k'a pa kiwi' rije', yuq'unela' ri xkechajin kichin, richin man jun bey chik k'a xtikixibij-ki' y man jun chik k'a ri xtisach-el chike. Yin Jehová ri yibin.

⁵Xtoqaqa k'a jun q'ij toq yin xtinben chi ri David xtik'oje' jun rijatzul ri kan xtok jun rey ri xtuq'et-tzij rik'in na'oj. Rija' kan xtuq'et-tzij pa ruchojmilal y kan choj.

⁶Y k'ari' xtik'oje' uxlanenri'il chupan ri ruwach'ulew Judá y chuqa' chupan ri ruwach'ulew Israel. K'ari' ri winaqi' xkejike' jebel. Kere' k'a ri rubi' ri xtikiya' ri ki-rey: Ja ri Dios ri Qach'akonik.

⁷Chupan ri q'ij ri', man xtibix ta chik: Utz ruwa-ruq'ij ri Jehová, roma xerelesaj-pe ri qati't-qamama' chupan ri ruwach'ulew Egipto.

⁸Xa kan xtikibij k'a: Utz ruwa-ruq'ij ri Jehová chi xerelesaj-pe ri qawinaq israelita chiri' chupan ri ruwach'ulew ri k'o pa xaman y ri pa taq ch'aqa' chik ruwach'ulew ri akuchi e rutalun-wi-el, xkecha'. Y keri' xkek'oje' jun bey chik chupan ri kiruwach'ulew, xcha' ri Dios.

⁹Ja rutzijol re' pa kiwi' ri nikibananej chi e q'alajirisey ruch'abel ri Dios: Ri wánima kan janila niq'axon, chijun ri nubaqil nibaybot. Kan in achi'el jun q'abarel, jun achin ri kan q'abarisan roma ri vino, roma ri Jehová y roma ri loq'olej ruch'abel.

¹⁰Chijun ri ruwach'ulew kan e nojineq rik'in ri e q'alajirisanela' ri', wineq ri kan xaxe ri etzelal ri nikiben. Y koma rije', ri ruwach'ulew kan xchaqi'j-qa y ri soq'olbel ri ek'o pa tz'iran ruwach'ulew chuqa' xechaqi'j-qa. Man rik'in ri' kan man nikiben ta pa ruchojmilal y nikikusaj ri kuchuq'a' man pa ruchojmilal ta.

¹¹Jak'a ri Jehová xubij chuwe: Konojel ri nikibananej chi e q'alajirisey nuch'abel kan e itzel taq winaqi' y keri' chuqa' ri e sacerdote y roma ri' kan chupan re wachoch xenwil-wi chubanik etzelal.

¹²Roma ri' xtinben chi ri kibey janila liq', richin chi xkejilijo'. Y xkenteq pa jun nimalej q'equ'm akuchi man ink'o ta yin. Keri' toq xtinya-pe nimalej ruk'ayewal pa kiwi'. Yin Jehová ri yibin.

¹³Yin kan e nutz'eton chi ri winaqi' ri ek'o pa tinamit Samaria kan nikiben ri man niqa' ta chinuwech. Kan nikiq'alajirisaj ri rubi' ri Baal y kan xkiben chike ri winaqi' richin ri tinamit Israel chi xkichop chik el jun bey.

¹⁴Chuqa' chikikojol ri nikibananej chi e q'alajirisey nuch'abel ri ek'o pa Jerusalem, nutz'eton ri itzel banobel ri nikiben chi xkijech-ki' kik'in ri kixjayilal y xekikanoj ch'aqa' chik ixoqi'. Xaxe tz'ukun taq tzij nikiben y kan yekito-apo ri e banoy taq etzelal richin man jun nuch'er kan ri' chubanik ri etzelal. Chinuwech yin konojel rije' e achi'el ri winaqi' richin ri tinamit Sodoma y Gomorra.

¹⁵Roma ri' yin Jehová ri k'o ronojel uchuq'a' pa nuq'a' kere' ninbij chiwe rix ri nibananej chi ix q'alajirisey nuch'abel: Xtinben chiwe chi xtitej xaqixaq. Chuqa' kan xtinya' k'a ya' chiwe ri yixrukamisaj. Iwoma rix qajineq ri etzelal pa ruwi' chijun ri ruwach'ulew.

¹⁶Y chuqa' yin Jehová k'iytisanel richin ronojel ninbij chiwe rix winaqi' aj-Israel, man tinimaj ri nikiq'alajirisaj rije', roma ri nikibij xa kan ruyon tz'ukun taq tzij. Ri xa kan kiyon rije' nikitz'uk-q'anej y man ja ta yin ri yibin chike.

¹⁷Y toq ye'apon ri e etzelanel wichin, nikibij: Ri Jehová nubij chi xtik'oje' uxlanenri'il, yecha'. Y toq ye'apon ri winaqi' ri nikirayij ruyon itzel taq banobel, nikibij chike: Man jun itzel ruk'ayewal ri xtipe chiwij, yecha'.

¹⁸¿Achike ta k'a xk'oje' rik'in ri Jehová pa jun molojri'il richin xrak'axaj ta ri ruch'abel? ¿Achike ta k'a ri xya'on jebel ruxikin chire ri ruch'abel y kan xunimaj ta?

¹⁹Ri woyowal ri xtiqaqa achi'el jun nimalej kaq'iq' job y ri e banoy etzelal kan xke'uk'uex-el achi'el nuben jun nimalej surkum.

²⁰Ri woyowal man xtik'is ta qa choj keri', xtik'is k'a ja toq xtibanatej ri nuch'obon yin. Y k'a pa taq ruk'isibel q'ij xtiq'ax chikiwech.

²¹Yin man jun chike ri nikibananej chi nikiq'alajirisaj nuch'abel ri xinteq, ni man xich'on ta kik'in, jak'a rije' xa chi'anin xe'el-el richin xebech'on pa nubi'.

²²Wi ta rije' xek'oje' wik'in chupan ri molojri'il ri', xkiq'alajirisaj ta ri nuch'abel chike ri nutinamit y kan xkiben ta chike chi xkich'er ta kan ki' rik'in ri itzel bey ri kik'uan y nikiya' kan ri itzel taq kibanobal.

²³Stape' nej o naqaj ink'o-wi, ja yin ri in i-Dios. Yin Jehová ri yibin.

²⁴Y roma ri', man yixtikir ta niwewaj-iwi' chinuwech. Yin kan nintz'et ri akuchi ixk'o-wi, roma yin nunojisan ri kaj y ri ruwach'ulew.

²⁵Kan wak'axan k'a ri tz'ukun taq tzij ri nikibij y nikibananej chi e q'alajirisey nuch'abel. Kan yech'on pa nubi' yin y nikibij chi k'o jun ri xtik'utumej chikiwech.

²⁶¿K'a janipe' k'a nikiya' kan rubanik ri nikiq'alajirisaj ri man qitzij ta ri xa kiyon rije' nikitz'uk-q'anej?

²⁷Kan rik'in ri kachik' ri nikitzijoj chikiwech rije', kan nikiben chi ri nutinamit yinkimestaj kan más, kan achi'el xkiben ri kati't-kimama' ri ojer kan. Toq rije' xinkimestaj kan y ja ri Baal ri xkitzeqelibej.

²⁸Wi jun chike rije' nuben jun achik' y nutzijoj, re' xa maneq rejqalen. Jak'a wi k'o jun ri nuk'ul ri nuch'abel y nubij ri qitzij, re' kan k'o-wi rejqalen. Re ka'i' rutzijol re' kan man junan ta; achi'el ri páxa man junan ta rik'in ri trigo.

²⁹Roma ri' ri nuch'abel yin kan achi'el q'aq' ri nuk'et ri páxa. Chuqa' ri nuch'abel kan achi'el jun bajibel ri kan nupaxij abej.

³⁰Roma ri' yin kan in yakatajineq chikij ri winaqi' ri nikibij chi e q'alajirisey nuch'abel y nikeleq'aj ri nuch'abel y chikijujunal rije' nikiben-qa kichin chire.

³¹Kan in yakatajineq chikij ri nikibananej chi nikiq'alajirisaj rik'in ri kich'abel y nikibij: Re' kan ja ri Jehová nibin, yecha'.

³²Yin kan in yakatajineq k'a chikij ri yebanon keri', ri nikitzijoj achik' ri xa man e qitzij ta. Kan rik'in ri tz'ukun taq tzij y rik'in ronojel ri nikibij, nikiben chire ri nutinamit richin nuchop kan itzel bey. Jak'a yin kan man e nutaqon ta, ni man nubin ta chike chi keri' nikiben. Roma ri' xa kan man yetikir ta nikito' ri nutinamit. Yin Jehová ri yibin, xcha' ri Dios.

³³Y ri Jehová xubij chuwe: Wi k'o ta jun wineq richin ri tinamit o jun ri nubij chi rija' jun q'alajirisey nuch'abel o jun sacerdote y nuk'utuj ta chawe: ¿Achike k'a rutzijol ri xuya-pe ri Jehová? Y rat Jeremías xtabij chike: Ja rix ri xixrubij-pe chuwe y kan xkixruya' kan.

³⁴Y wi k'o ta jun ri nubananej chi rija' q'alajirisey nuch'abel o jun sacerdote o xabachike wineq richin ri tinamit ri nubij ta chi k'o ch'abel ri nubij chuwij yin, yin kan xtinben chi xtiqaqa ri tojbel mak pa ruwi' rija' y pa kiwi' ri e aj pa rachoch.

³⁵Kere' xtibij chire jun iwachibil o jun ri aj pan iwachoch: ¿Achike xubij-pe ri Jehová? ¿Achike ri' ri xubij?, yecha'.

³⁶Man jun bey chik k'a xtibij re ch'abel re': Kere' nubij ri Jehová ri xtipe chiqawech-apo man kixcha'. ¿Roma nibanatej kami ri nikibij ri winaqi' chi nibanatej? ri xa nixotoba' ri nuch'abel yin ri in k'aslik Dios, Jehová, ri in k'iytisanel richin ronojel, jari' ri i-Dios, xcha' ri Dios chuwe.

³⁷K'ari' yin xinbenk'utuj chike ri winaqi' ri' ri achike roma rije' chaq keri' nikibij: ¿Achike k'a ch'abel ri xuk'uluba-pe ri Jehová? ¿Achike xubij rija'?

³⁸Y yin xinbij chike rije' chi ri Jehová xubij chi man tikibij más re ch'abel re'. Jak'a rije' chaq k'a nikibij na.

³⁹Y xinbij chike: Roma ri', ri Jehová nubij k'a chi rija' xkixrumalij kan jumul y kan xkixrelesaj-el nej chuwech. Chuqa' rija' xtumalij kan re tinamit re' ri xuya' chike ri qati't-qamama'.

⁴⁰Y kan richin q'asen xtiqaqa pan iwi' ri qasanri'il, ri k'ixbilal ri kan man jun bey k'a xtimestex, xicha' chike.