Read Kaqchikel Jer 25 Bible Online

Jer 25 - Kaqchikel bible

Jer 25

¹Ri ruch'abel ri Jehová xoqaqa wik'in chupan ri rukaj juna' richin ri q'atbel-tzij richin ri rey Joaquim, ri ruk'ajol ri Josías y chupan ri nabey juna' richin ri q'atbel-tzij richin ri Nabucodonosor rey richin Babilonia.

²Jari' toq xich'on kik'in ri nuwinaq richin ri tinamit Jerusalem y chijun ri ruwach'ulew Judá. Y xinbij k'a:

³Kan ja chupan ri juna' oxlajuj richin ri ruq'atbal-tzij kan ri Josías ruk'ajol ri Amón, k'a chupan re q'ij re', juwineq oxi' yan k'a juna' ri ruchapon-pe ri nich'on ri Jehová wik'in. Yin kan in ch'owineq k'a pe iwik'in, jak'a rix xa man iya'on ta ixikin chire ri nuch'abel.

⁴Ri Jehová kan jantape' k'a e rutaqon-pe ch'aqa' chik e rusamajela' ri e q'alajirisey ruch'abel y jak'a rix xa man xiwak'axaj ta, ni man xinimaj ta kitzij.

⁵Rije' nikibij k'a chiwe chi kixtzolin k'a pe chi'ijujunal. Tiya' kan ri itzel bey ik'uan y ri itzel taq ibanobal, richin chi rix yixbek'oje' richin q'asen chupan ri ruwach'ulew ri xuya' ri Jehová chiqe y chike ri qati't-qamama'.

⁶Man ke'itzeqelibej k'a ch'aqa' chik dios ri xa rik'in iq'a' ibanon-wi. Y chuqa' man yixxuke' ta chikiwech, richin man niyek ta royowal ri Jehová, xecha' chiwe.

⁷Man rik'in ri', ri Jehová nubij chi man xiwak'axaj ta y roma ri' kan xiyek janila royowal, roma kan xe'iya' kiq'ij ch'aqa' chik dios ri xa ja rix ix banayon y re' xaxe richin nuk'en-pe ruk'ayewal pan iwi'.

⁸Roma ri' ri Jehová ri k'iytisanel richin ronojel kere' nubij: Roma rix man xiwak'axaj ta ri nuch'abel,

⁹roma ri' yin xtinteq koyoxik konojel tzobaj taq winaqi' ri ek'o pa xaman y ri nusamajel Nabucodonosor rey richin Babilonia, richin yepe y nokichapa' chi oyowal re jun ruwach'ulew re' y konojel ri ek'o chupan y konojel tzobaj winaqi' ri ek'o chunaqaj. Kan xkenk'is k'a jumul xtinben chi xkeyojobex, xkek'ixbitej. Y iwoma rix ri ch'aqa' chik winaqi' xtisach kik'u'x.

¹⁰Ninbenbana' k'a chiwe richin chi'ikojol rix man xtak'axatej ta chik bixanik richin nimaq'ij ni richin kikoten. Ni man xtak'axatej ta chik bix richin k'ulubik, ni man xtak'axatej ta chik ri abej richin ke'en, ni man xtitz'etetej ta chik ri saqil kichin ri taq lámpara.

¹¹Chijun k'a ri itinamit kan xtik'is y kan xtitole' kan. Y re tzobaj winaqi' re' kan xtibekisamajij oxk'al lajuj juna' ri rey richin Babilonia.

¹²Y toq xtitz'aqet k'a ri oxk'al lajuj juna', xtinya' ri rutojbalil-mak pa ruwi' ri rey richin Babilonia y pa kiwi' ri ruwinaq roma ri kimak. Y ri kiruwach'ulew xtitole' kan jumul.

¹³Kan xtinya' k'a pa ruwi' ri kiruwach'ulew ronojel ri nubin pa ruwi', ronojel ri tz'ibatel chupan re wuj re' achi'el ruq'alajirisan ri Jeremías pa kiwi' konojel tzobaj winaqi'.

¹⁴Chuqa' rije' xke'uk'uex pa ximonri'il koma nima'q taq tzobaj winaqi'. Keri' yin Jehová xtinya' ri rutojbalil-mak pa kiwi', xicha' chike.

¹⁵Ri Jehová xch'on wik'in pa jun achik' y xubij chuwe: Tatz'eta' re qumbel re' nojineq rik'in vino y re vino re' kan jari' ri woyowal. Tak'ama-pe y taya' chike konojel ri tzobaj winaqi' ri achoq kik'in xkatinteq-wi yin, richin nikiqum.

¹⁶Toq xtikiqum ri vino ri' xtikichop xa'oj y xtikiben k'a achi'el ch'u'j roma ri labal ri xtinteq-pe pa kiwi', xcha' chuwe.

¹⁷K'ari' chupan ri achik' ri', yin xink'en-apo ri qumbel ri richin ruk'ayewal chiruq'a' ri Jehová y xinya' pa kiwi' konojel tzobaj winaqi' ri achoq kik'in xiruteq-wi richin xtiqaqa pa kiwi'.

¹⁸Xinya' k'a chire ri rey richin Judá, chike ri aj-raqen, chike ri aj-Jerusalem y chike ri ch'aqa' chik winaqi'. Xinya' k'a chike richin yek'is y kan xtitole' kan jumul ri kitinamit. Koma rije' ri ch'aqa' chik winaqi' xtisach kik'u'x, kan xtiban tze'en chikij y xtiqaqa itzel pa kiwi'. Y keri' k'a kan xke'ok jun k'ambel-tzij achi'el nitz'et re wakami.

¹⁹Keri' chuqa' xinya' chike ri rey richin Egipto, chike ri e aj-raqen y konojel ri winaqi' richin ri ruwach'ulew ri'.

²⁰Xinya' chuqa' chike konojel ri winaqi' ri ek'o pa ruwach'ulew Us y chike ri e ki-rey, chike ri aj-Filistea y ri ki-rey: Ri tinamit Ascalón, ri Gaza, ri Ecrón y ri juba' ri k'a ek'o kan chire ri tinamit Asdod,

²¹ri edomita, ri moabita, ri amonita,

²²ri aj-Tiro, ri aj-Sidón, ri winaqi' ri ek'o chuchi' ri palou,

²³ri aj-Dedán, ri aj-Temá, ri aj-Buz, ri aj-Arabia, y ri winaqi' ri ek'o pa tz'iran ruwach'ulew,

²⁵ri aj-Zimrí, ri aj-Elam, ri aj-Media,

²⁶y ri winaqi' ri ek'o pa xaman, stape' nej o naqaj kikojol. Re' nel chi tzij konojel ri q'atbel taq tzij richin re ruwach'ulew. Y pa ruk'isibel, ja ri rey richin Babilonia ri xtiqumun ri vino ri' richin xtiqaqa ri ruk'ayewal pa ruwi' rija'.

²⁷K'ari' ri Jehová ri k'iytisanel richin ronojel, ri Dios richin Israel, xubij chuwe chi kere' tinbij chiwe: Tiqumu' richin yixq'aber, xkixxa'a' y kixtzaq richin man yixtikir ta chik xkixyakatej chuwech ri nimalej ruk'ayewal ri xtinya' pan iwi' yin.

²⁸Jak'a wi man nikajo' ta nikik'ul ri qumbel ri nuk'exewachuj ri ruk'ayewal, jari' toq xtabij k'a chike chi yin Jehová k'iytisanel richin ronojel ninbij chi k'o chi nikiqum stape' man nikajo' ta.

²⁹Roma yin kan rik'in ri tinamit ri nucha'on, xtintikeriba' ri nabey ruk'ayewal. Kan man xkixkanej ta kan choj keri', roma yin kan xtinteq-pe ruk'ayewal pan iwi' y pa kiwi' konojel ri winaqi' re ek'o chuwech re ruwach'ulew. Kan man xtinkuy ta ri imak. Ja yin Jehová k'iytisanel richin ronojel ri yibin, xkacha' chike.

³⁰Chuqa' rat Jeremías xtaq'alajirisaj k'a chikij ri winaqi' ri' y xtabij k'a: Ri Jehová, kan xtisik'in k'a pe ri chila' pa jotol, xtisik'in k'a ri akuchi k'o-wi. Kan rik'in royowal xtich'on chikij ri ruwinaq, kan xtureq k'a ruchi' chikij ri ch'aqa' chik winaqi' achi'el nikiben ri achi'a' toq nikipitz' ri uva.

³¹Ri raqoj-chi'ij ri' xtapon k'a ri juk'an chik ruchi' ri ruwach'ulew, roma ri Jehová nrajo' nuchojmirisaj ri yebanatej kik'in konojel winaqi'. Kan nuq'et-tzij pa kiwi' y ri winaqi' ri e banoy etzelal kan xkerukamisaj chi espada.

³²Kere' nubij ri Jehová ri k'iytisanel richin ronojel chi ri ruk'ayewal kan xtoqaqa pa kiwi' konojel ri tzobaj winaqi' richin re ruwach'ulew, achi'el jun nimalej kaq'iq' job ri xtiyakatej. Y re' nitiker-pe ri juk'an ruchi' ri ruwach'ulew y napon k'a ri juk'an chik ruchi'.

³³Kan xtinben chi chupan ri q'ij ri', ri kaminaqi' xkek'oje' kan ri juk'an ruchi' ri ruwach'ulew k'a ri juk'an chik ruchi'. Y kan man jun k'a xtoq'en kichin, ni kan man jun k'a xtisik'on ri kich'akul richin yekimuq ta. Kan xkepunupuxin k'a kan chiri' pan ulew achi'el ri pamaj.

³⁴¡Kixjilon rix yuq'unela' y kixsik'in roma q'axo'n! roma xapon ri q'ij richin rix kan xkixkamisex achi'el niban chike ri karne'l jebel e ti'oj. Roma ri' tibolqotila-iwi' pan ulew richin nik'ut ri bis.

³⁵Rix yuq'unela' man jun akuchi niwewaj-wi-iwi', man xkixtikir ta chik xtito-el-iwi'.

³⁶Ri oq'ej iwichin rix xtak'axatej xabakuchi, roma yin kan xtinben richin xtik'is ronojel q'os.

³⁷Roma ri woyowal, kan xek'is ronojel ri jebelej taq soq'olbel.

³⁸Xel k'a pe achi'el jun koj ri nel-pe chupan ri rujul y roma ri nimalej royowal, ri ruwach'ulew kan xtik'is y kan xtok kan tz'iran. Chuqa' xtuteq-pe jun nimalej ruk'ayewal richin chi ri winaqi' kan xkekamisex k'a chi espada.