Read Kaqchikel Jer 26 Bible Online

Jer 26 - Kaqchikel bible

Jer 26

¹Pa rutikeribel richin ri q'atbel-tzij richin ri Joaquim, ri ruk'ajol ri Josías, rey richin ri tinamit Judá, ri Jehová xch'on chik wik'in y xubij chuwe:

²Kapa'e' k'a chiri' chuwa-jay chire ri wachoch y tabij ronojel ri xtinbij chawe chike ri awinaq ri yepe richin nokiya' nuq'ij chupan ri wachoch. Kan ronojel k'a ch'abel ri xtinbij yin chawe, xtabij y kan man jun achike ri xtawewaj.

³Rik'in juba' xtikinimaj atzij y nikiya' kan ri itzel taq kibanobal. Y wi keri', man xtinya' ta rutojbalil-mak pa kiwi'.

⁴Tabij chike chi yin Jehová kere' ninbij: Tinimaj nutzij y tibana' achi'el nubij ri nupixa'.

⁵Chuqa' tinimaj ri kich'abel ri e q'alajirisey nuch'abel ri e nuya'on chi'ikojol, stape' k'a re wakami rix man iniman ta kitzij rije'.

⁶Wi man xtiben ta ronojel re', k'ari' xtinben rik'in ri wachoch, achi'el xinben rik'in ri tinamit Siló. Xtinben chire re tinamit Jerusalem richin xtiqaqa itzel pa ruwi' y xtok jun k'ambel-na'oj chikiwech konojel ri tzobaj winaqi' richin re ruwach'ulew, xkacha' chike, xcha' ri Dios chuwe.

⁷Ri e sacerdote, ri nikibananej chi e q'alajirisey ruch'abel ri Dios y chijun tinamit xkak'axaj k'a re ch'abel re' ri xinbij chiri' chupan ri rachoch ri Jehová.

⁸Y toq xitane' yan qa chire ronojel rutzijoxik ri xubij ri Jehová chuwe, jari' toq rije' xinkichop y xkibij chuwe: Wakami rat Jeremías yatibeqakamisaj.

⁹¿Achike roma yatikir nabij pa rubi' ri Jehová chi ri rachoch re k'o wawe' kan nuben chire achi'el ri rachoch ri k'o pa Siló ri ojer kan y chi ri qatinamit xtik'is y kan man jun chik xtik'oje' kan chupan?, xecha' chuwe. Y konojel k'a ri winaqi' richin ri tinamit xkimol-apo-ki' chuwij chiri' chupan ri rachoch ri Dios.

¹⁰Ri e aj-raqen richin ri tinamit Judá, toq xkak'axaj ri nibanatej, xe'el k'a el ri chiri' chupan ri rachoch ri rey y xebe pa rachoch ri Dios y chiri' xetz'uye-wi-qa chuchi' ri k'ak'a' okibel richin nikiya' ri kitzij.

¹¹K'ari' ri e sacerdote y ri nikibananej chi e q'alajirisey ri ruch'abel ri Dios xech'on kik'in ri aj-raqen y kik'in ri winaqi' richin chijun ri tinamit y xkibij chike: Re achin re' k'atzinel richin nikamisex roma kan xch'on itzel chirij ri qatinamit y rix kan jebel xiwak'axaj, xecha'.

¹²K'ari' yin xich'on kik'in ri aj-raqen y kik'in ri winaqi' richin ri tinamit y xinbij chike: Ja ri Jehová jari' ri xitaqon-pe richin xich'on pa rubi' rija' y richin ninbij ri achike ri nibanatej pa ruwi' re rachoch rija' y pa ruwi' re tinamit achi'el ri xiwak'axaj yan qa rix.

¹³Wakami k'a, tichojmirisaj ri ik'aslen y ri ibanobal. Wi ninimaj ri rutzij ri Jehová ri qa-Dios, rija' man xtuteq ta k'a pe ri ruk'ayewal pan iwi' achi'el ri rubin chiwe.

¹⁴Jak'a yin kan pan iq'a' ink'o-wi. Tibana' k'a wik'in ri achike ri niqa' chiwech rix.

¹⁵Jak'a rix tiwetamaj re': Wi yinikamisaj, ja rix xkixejqalen. Roma kan yinikamisaj y xa maneq numak, roma kan ja ri Jehová ri xitaqon-pe richin xinya' re jun rutzijol re' chiwe, xicha' chike.

¹⁶K'ari' ri e aj-raqen y ri winaqi' richin ri tinamit xkibij chike ri e sacerdote y chike ri nikibananej chi e q'alajirisey ri ruch'abel ri Dios chi man jun achike roma yinkikamisaj, roma yin xich'on kik'in pa rubi' ri Jehová.

¹⁷Y jujun k'a chike ri achi'a' ri k'o kiq'ij xeyakatej-q'anej y xech'on kik'in ri winaqi' ri kimolon-apo-ki' chiri' y xkibij:

¹⁸Ri ojer kan toq niq'aton-tzij ri Ezequías, rey richin Judá, ri Miqueas aj-Moréset xch'on pa rubi' ri Jehová kik'in konojel winaqi' richin ri qatinamit Judá y xubij: Ri Jehová k'iytisanel richin ronojel nubij chi re tinamit Sión kan xtik'oje' kan achi'el jun ulew ri xjosq'ix yan el ruwech. Ri Jerusalem kan xtiwuluwu' kan, y kan xtuben achi'el jun tzobaj ulew. Chuqa' ri ruwa-juyu' ri akuchi k'o-wi ri rachoch ri Dios kan xtok jun k'echelaj, xcha' ri Miqueas chike.

¹⁹¿Ri Ezequías y ri winaqi' xkikamisaj kami ri Miqueas? Ni, pa ruk'exel ri' ri rey janila xuxibij-ri' chuwech ri Jehová, y xuk'utuj utzil chire chi nujoyowaj ta kiwech. K'ari' ri Jehová man xuteq ta k'a pe ri ruk'ayewal pa kiwi' rije' ri kan ruya'on-pe rutzijol. ¿Xaxe kami richin niqejqalej re jun kamik re'?, xecha' rije'.

²⁰Chupan ri q'ij ri' jun chik q'alajirisey ruch'abel ri Dios rubini'an Urías, ruk'ajol ri Semaías aj pa tinamit Quiriat-jearim, xch'on pa rubi' ri Jehová y xuq'alajirisaj achike xtuk'uluwachij ri tinamit y ri ruruwach'ulew.

²¹Ri rey Joaquim, ri aj-raqen y ri achi'a' ri ek'o pa kiwi' ri aj-labal, toq xkak'axaj ri xubij ri Urías, kan xkajo' xkikamisaj. Jak'a toq ri Urías xrak'axaj re rutzijol re', janila xuxibij-ri' y xrewaj-el-ri' pan Egipto.

²²Jak'a ri rey Joaquim xuteq-el pan Egipto ri Elnatán, ruk'ajol ri Acbor y xeruteq chuqa' ch'aqa' chik achi'a'.

²³Y ja rije' ri xebek'amo-pe ri Urías pan Egipto y xkijech chire ri rey Joaquim. Y rija' xukamisaj chi espada y k'ari' xumuq kan akuchi yemuq-wi ri winaqi' ri maneq kejqalen.

²⁴Jak'a chupan ri q'ij ri' ri Ahicam ruk'ajol ri Safán xiruto' yin y roma ri' man xijach ta pa kiq'a' ri winaqi' richin xikamisex.