Read Kaqchikel Jer 27 Bible Online

Jer 27 - Kaqchikel bible

Jer 27

¹Pa rutikeribel chire ri q'atbel-tzij richin ri Sedequías, ri ruk'ajol ri Josías rey richin Judá, xch'on k'a pe ri Jehová wik'in.

²Y xubij chuwe: Tabana' jun yugo y taxima' chi'aqul rik'in jun kolo'. K'ari' tataqa-el re rutzijol re' chire ri rey richin Edom, ri rey richin Moab, ri rey richin Amón, ri rey richin Tiro y chire ri rey richin Sidón, re rutzijol re' xtateq-el chikij ri e ya'ol rutzijol ri e peteneq pa Jerusalem, richin nokitz'eta' kan ri k'ak'a' rey rubini'an Sedequías.

⁴Y tabij chike chi yin Jehová ri k'iytisanel richin ronojel, ri ki-Dios ri israelita, ninbij:

⁵Kan rik'in k'a ri nimalej wuchuq'a' xinben ri ruwach'ulew, ri winaqi' y ri chikopi' ri ek'o chuwech. Y xinya' chire ri achoq chire xinwajo' xinya-wi.

⁶Wakami k'a xtinjech ronojel ri ruwach'ulew pa ruq'a' ri nusamajel, Nabucodonosor rey richin Babilonia. Chuqa' kan xtinjech pa ruq'a' ronojel ri chikopi' ri ek'o pa taq k'echelaj richin yek'oje' chuxe' rutzij rija'.

⁷Y konojel k'a tzobaj winaqi' xtikilij ri Nabucodonosor, chuqa' ri ruk'ajol y ri rumam, k'a ja toq xtapon na ri q'ij chi ri kiruwach'ulew xtik'oje' chuxe' rutzij nima'q taq tzobaj winaqi' y chuxe' kitzij ri rey ri kan k'o janila kiq'ij.

⁸Jak'a ri tzobaj winaqi' ri man nikajo' ta nikilij ri Nabucodonosor, rey richin Babilonia y ri man nikajo' ta yek'oje' chuxe' rutzij rija', yin kan xtinya' rutojbalil pa kiwi' k'a ja toq xkek'is na. Konojel k'a xkenkamisaj rik'in espada, xkeken rik'in wayjal y xkeken rik'in nima-yabil. Yin Jehová ri yibin.

⁹Roma ri' rix man tinimaj kitzij ri nikibananej chi e q'alajirisey ri ruch'abel ri Dios, ni ri nikiq'alajirisaj achik', ni ri aj-itza' ri nikibij chi man tisamajij ri rey richin Babilonia.

¹⁰Roma ri nikiq'alajirisaj rije', xa ruyon tz'ukun taq tzij, xaxe richin nuben chiwe richin chi yixinwelesaj chupan re iruwach'ulew y xkixintaluj-el richin yixk'is.

¹¹Jak'a ri tzobaj winaqi' ri yek'oje' chuxe' rutzij rija', yin xtinya' q'ij chike richin yek'oje' chupan ri kiruwach'ulew richin chi yek'ase' chiri' y nikiben-qa kitiko'n, xcha' ri Jehová.

¹²K'ari' xinkamuluj ronojel re' chire ri Sedequías y xinbij chire: Kixk'oje' k'a chuxe' rutzij ri rey richin Babilonia, tiwilij k'a rija' y ri e ruwinaq y keri' xkixk'ase' chi utzil.

¹³¿Achike ta k'a roma niya' ri ik'aslen pa kamik roma ri oyowal, ri wayjal y ri nima-yabil? Roma ri Jehová xubij chi jare' ri nikik'uluwachij ri tzobaj winaqi' ri man xkek'oje' ta chuxe' rutzij ri rey richin Babilonia.

¹⁴Man ke'inimaj k'a ri yeq'alajirisan toq nikibij chi man yixk'oje' ta chuxe' rutzij ri rey richin Babilonia, roma ri nikibij rije', xa ruyon tz'ukun taq tzij.

¹⁵Ri Jehová kan nujikiba' chi rija' maneq e rutaqon y pa rubi' rija' nikitz'uk-tzij. Y keri' rija' xkixrutaluj-el iwonojel rix y ri q'alajirisey ri xkibij ronojel re' chiwe, xicha' chike.

¹⁶Chirij re' xich'on kik'in ri sacerdote y kik'in ri ch'aqa' chik winaqi' y xinbij: Man tiwak'axaj ri kich'abel ri nikibananej ri nikiq'alajirisaj, toq nikibij: Ri samajibel richin ri rachoch ri Dios kan xkek'amer-pe chi'anin chiri' pa Babilonia, roma ri nikibij, xa kan man qitzij ta.

¹⁷Man ke'iwak'axaj k'a; xa kan kixk'oje' k'a chuxe' rutzij ri rey richin Babilonia, richin xkixk'ase' chi utzil. Y wi man niwajo' ta, ri Jerusalem xtitole' kan.

¹⁸Wi rije' kan e q'alajirisey ruch'abel ri Jehová y wi kan qitzij chi ja ri Jehová biyon chike, k'o chi nikik'utuj utzil chire ri Jehová ri k'o ronojel uchuq'a' pa ruq'a', richin chi man nuya' ta q'ij richin ye'uk'uex-el pa Babilonia ri ch'aqa' chik samajibel ri k'a ek'o na kan pa rachoch y ri ek'o na kan pa rachoch ri rey.

¹⁹Toq ri Nabucodonosor xeruk'uaj pa ximonri'il ri Jeconías ruk'ajol ri Joaquim y konojel ri achi'a' ri k'o kiq'ij, man xuk'uaj ta el ronojel samajibel ri k'o kejqalen. Xeruya' k'a kan ri ka'i' pilar ri e banon rik'in q'enq'oj-pueq, ri nima-yakbel-ya' ri banon rik'in q'enq'oj-pueq, ri jalajoj kiwech ch'okolibel y ri ch'aqa' chik samajibel ri ek'o kan. Ri Jehová k'iytisanel richin ronojel nubij chi

²²re wakami xke'uk'uex k'a el pa Babilonia y chiri' xkek'oje-wi k'a toq rija' xkeruk'en-pe jun bey chik chupan re tinamit re', xicha' chike.