Read Kaqchikel Jer 29 Bible Online

Jer 29 - Kaqchikel bible

Jer 29

¹Chirij re' yin xintz'ibaj-el jun wuj re wawe' pa Jerusalem richin xinteq-el chike ri aj-Judá ri e uk'uan-el roma ri Nabucodonosor rey richin ri ruwach'ulew Babilonia. Y ri xek'ulu ja ri achi'a' ri k'o kiq'ij, ri sacerdote, ri e q'alajirisey ruch'abel ri Dios y ri ch'aqa' chik winaqi'.

²Re' xbanatej toq k'a juba' ke'el-pe pa Jerusalem ri rey Jeconías y ri rute', ri aj-raqen, ri e q'atoy taq tzij richin ri tinamit y ri yebanon jalajoj ruwech samaj.

³Y ri wuj ri' xinteq-el chikij ri Elasá ruk'ajol ri Safán y ri Guemarías ruk'ajol ri Hilquías, ri xetaq-el pa Babilonia roma ri rey Sedequías, richin xebe rik'in ri Nabucodonosor chiri' pa Babilonia. Y ri wuj ri' kere' ri nubij:

⁴Jare' ri rutzijol ri xuya' ri Jehová k'iytisanel richin ronojel chiwe rix aj-Judá ri ixk'o chiri' pa Babilonia. Y ri Dios kere' nubij chiwe:

⁵Tipaba-q'anej iwachoch y kixk'oje' chupan. Tibana-qa itiko'n y titija' ri ruwech.

⁶Kan kixk'ule' k'a y kek'oje' imi'al-ik'ajol. Chuqa' rije' kan kek'ule' richin rije' chuqa' yek'oje' kimi'al-kik'ajol. Kan kixwinaqir k'a ri chiri' richin man xkixk'is ta qa.

⁷Kan kixsamej k'a richin nibe ta q'anej pa jotol ri ruwach'ulew ri akuchi ixk'o-wi. Kan tik'utuj k'a chuwe chi utz ta xtuben ri ajawaren ri', richin keri' kan utz chuqa' xkixk'oje' rix.

⁸Yin Jehová k'iytisanel richin ronojel ri yibin. Man k'a kixkiq'ol ri nikibananej chi e q'alajirisey nuch'abel ri ek'o chi'ikojol, ni ri yeq'olon rik'in ri nimalej taq banobel. Rix man tiya' ixikin chire ri nikiq'alajirisaj chiwech ri yebanon achik'.

⁹Stape' nikiq'alajirisaj pa nubi' yin, xa man qitzij ta; yin xa man e nutaqon ta. Yin Jehová ri yibin.

¹⁰Yin kan ninjikiba' nutzij chi toq xtitz'aqet ri oxk'al lajuj juna' ri kixk'oje' chiri' pa Babilonia, yin xtinben utzil chiwe richin xkixtzolin-pe wawe' chupan ri iruwach'ulew.

¹¹Roma yin kan wetaman ri nuch'obon pan iwi' rix, ja ri utz ri nuch'obon pan iwi' y man ja ta ri itzel, richin chi ronojel utz ta xtel.

¹²Chupan ri q'ij ri', rix xkixch'on wik'in y yin kan xkixinwak'axaj.

¹³Xkinikanoj y kan xkiniwil, roma rix kan xkinikanoj rik'in ronojel iwánima.

¹⁴Kan qitzij na wi chi xkiniwil. Y kan xtinmol ichi' ri akuchi ixintalun-wi wakami chupan ri ch'aqa' chik ruwach'ulew. Y k'ari' xkixintzolij-pe chupan re itinamit ri akuchi ixintalun-wi-el.

¹⁵Rix kan nibij k'a chi yin xenya' q'alajirisey nuch'abel iwik'in chiri' pa Babilonia.

¹⁶Yin kan e k'iy yan k'a chike ri e q'alajirisey nuch'abel ri xenteq yan el rik'in ri rey wawe' pa Judá y kik'in ri winaqi' ri ek'o kan chupan ri Jerusalem y ri ch'aqa' chik ri man xebe ta toq rix xixbe. Jak'a kan man xkak'axaj ta ri nuch'abel. Roma ri' kere' k'a ninbij yin, Jehová ri k'iytisanel richin ronojel: Wakami k'a, yin xtinteq-pe chikij rije': Espada, wayjal y ri nima-yabil richin yeken. Kan xtinben k'a kik'in rije' achi'el ri wíkix ri man e utz ta, roma janila e q'ayineq y kan man jun nitikir nitijo. Koma rije' ri ch'aqa' chik winaqi' xtisach kik'u'x y xtiqaqa itzel oyonik pa kiwi' y kan xkek'ixbitej chikiwech ri akuchi xkentaluj-wi-el. Y rix ri ixk'o pa Babilonia, chuqa' kan man xiniwak'axaj ta k'a.

²⁰Roma ri' tiwak'axaj k'a ri nuch'abel iwonojel rix ri xixinwelesaj-el wawe' pa Jerusalem y xixinteq-el pa Babilonia.

²¹Yin Jehová k'iytisanel richin ronojel ri yibin. Jare' ri ninbij pa kiwi' ri Acab ruk'ajol ri Colaías*f10* y ri Sedequías ruk'ajol ri Maaseías, roma rije' kan nikiben richin nikiq'alajirisaj pa nubi' yin, ri man qitzij ta. Roma ri' wakami xkenjech-el pa ruq'a' ri Nabucodonosor y rija' kan chiwech k'a rix, xkerukamisaj-wi.

²²Roma ri xtibanatej kik'in rije' xtel jun k'ambel-tzij chike konojel ri xe'elesex-el pa Judá ri ek'o pa Babilonia y xtikibij: Ri Jehová kan xtuben chiwe achi'el xuben chike ri Sedequías y ri Acab, toq ri Nabucodonosor kan xeruporoj.

²³Kere' ri xtikik'uluwachij roma man utz ta xekiben chiri' pan Israel. Kan xemakun kik'in ri kixjayilal ri kachpochel. Y roma pa nubi' yin, xkibij ch'abel ri man e qitzij ta, ri xa man nubin ta chike richin nikiben. Yin Jehová kan wetaman ronojel re' y kan nutz'eton, xcha' ri Dios chupan ri wuj.

²⁴Y xkach'on k'a rik'in ri Semaías ri aj-Nehelam ri k'o chiri' pa Babilonia y xtabij chire

²⁵chi kere' nubij ri Jehová k'iytisanel richin ronojel, Dios richin Israel, roma rat xateq wuj pan abi' chike konojel ri winaqi' ri ek'o pa Jerusalem y chire ri sacerdote Sofonías ruk'ajol ri Maaseías y chike ri ch'aqa' chik sacerdote. Y ri wuj ri' nubij:

²⁶Ri Jehová xtuben chi rat Sofonías xkatok nimalej sacerdote pa ruk'exel ri Joiadá, richin chi ja rat yak'oje' pa ruwi' ronojel chiri' pa rachoch ri Jehová y roma ri' wi napon jun ch'u'j y nich'on achi'el jun q'alajirisey ruch'abel ri Dios, rat xtachop y xtaxim ri ruq'a-raqen y ri ruqul chuwech jun che'.

²⁷Wakami k'a, ¿achike roma man aximon ta ri Jeremías ri aj-Anatot, ri nubananej chi q'alajirisey ri ruch'abel ri Dios?

²⁸Roma rija' kan rutaqon-pe rutzijol chiqe re wawe' pa Babilonia y nubij chi kan janila k'iy juna' xqojk'oje' wawe' y roma ri' tiqabana-qa qachoch y qojk'oje' chupan. Chuqa' nubij chi tiqabana-qa qatiko'n richin niqatej ri ruwech, xcha' chupan ri wuj.

²⁹Ri sacerdote Sofonías xusik'ij ri wuj chuwech ri Jeremías.

³⁰K'ari' ri Jehová xch'on rik'in y xubij chire:

³¹Tataqa' rubixik chike konojel ri awinaq ri ek'o chiri' pa Babilonia, chi yin Jehová ninbij: Roma ri Semaías ri aj-Nehelam xuq'alajirisaj ri man nubin ta yin chire y rix xikuquba' ik'u'x rik'in ri tz'ukun-tzij ri xubij,

³²roma ri' wakami yin xtinya' rutojbalil-mak pa ruwi' rija' y pa kiwi' ri e rijatzul. Kan man jun k'a rijatzul ri xtik'oje' chikikojol ri nuwinaq ni man xtril ta ri utz ri xtinben yin kik'in rije'. Roma rik'in ri ruch'abel, xyakatej chuwij yin Jehová. Yin Jehová ri yibin.