Read Kaqchikel Jer 3 Bible Online

Jer 3 - Kaqchikel bible

Jer 3

¹Ri Jehová xch'on chik wik'in y xubij chuwe: Wi k'o ta jun achin nujech-ri' rik'in ri rixjayil y ri ixoq ri' nik'ule' ta rik'in jun chik achin, ¿nitikir kami ri nabey rachijil nitzolin rik'in re ixoq re'? ¿Roma ta kami ri' ri ruwach'ulew xtok man ch'ajch'oj ta? Rix xa xitzeqelibej ch'aqa' chik dios, achi'el nuben jun ixoq itzel ruk'aslen. Jak'a yin Jehová ninbij chi kixtzolin chik pe wik'in.

²Titzu' k'a jebel la ruwi' taq juyu' ri akuchi xiya' kiq'ij ch'aqa' chik dios. Kan pan ewel k'a yixtz'uye' pa taq bey richin ye'iwoyobej achi'a', achi'el nikiben ri winaqi' ri ek'o pa tz'iran ruwach'ulew richin ye'eleq'. Kan xitz'ilobisaj re ruwach'ulew rik'in ri itzel taq imak.

³Roma ri itzel taq ibanobal ri', roma ri' maneq chik job rubanon, ni ri nabey taq job, ni ri ruk'isibel taq job. Man rik'in ri' kan man xk'oje' ta juba' ik'ix, achi'el ri ixoq itzel ruk'aslen maneq ruk'ix.

⁴Re wakami nibij chuwe: Qatata' roj o nibij chuwe chi ja yin ri ix wachibil richin pan iq'opojil.

⁵Nik'utula' k'a. ¿Kan beneq kami ruwech xkatoyower qik'in? ¿Kan man ta k'a xtik'is ri awoyowal richin jantape'?, xixcha'. Y rokik nibij re ch'abel re', yixtajin chubanik ri etzelal, xcha' ri Dios.

⁶Ri ruch'abel ri Jehová xoqaqa wik'in chupan ri q'ij chire ri q'atbel-tzij richin ri rey Josías y xubij chuwe: Rat Jeremías xatz'et ri etzelal ri xuben ri tinamit Israel ri chiri' pa xaman. Kan xebe k'a chiri' chuwa taq juyu' chuxe' taq che' ri janila kixaq, richin chi chiri' xekitzeqelibej ch'aqa' chik dios, achi'el nuben jun ixoq itzel ruk'aslen ri yerutzeqelibej ch'aqa' chik achi'a'.

⁷Y xinbij: Chirij ronojel ri itzel rubanobal ri xuben, rija' xtitzolin chik pe wik'in. Jak'a xa man xtzolin ta; y re' xutz'et ri tinamit Judá, ri rach'alal ri itzel chuqa' ruk'aslen.

⁸Y rije' xkitz'et chi ri tinamit Israel man xkijech ta ki' xaxe chuwe yin, xa xkiya' kiq'ij ch'aqa' chik dios. Roma ri' yin kan xinjech-wi' kik'in y kan xinya' jun wuj chike richin ri qach'arojri'il. Jak'a ri itzel rach'alal Judá xa man xkixibij ta ki' xa kan keri' chuqa' xkiben rije'.

⁹Ri tinamit Israel kan man xkich'ob ta ri xkiben y xkitz'ilobisaj ri kiruwach'ulew. Y rije' xa xekitzeqelibej ch'aqa' chik dios achi'el nuben jun ixoq itzel ruk'aslen yerutzeqelibej ch'aqa' chik achi'a' y xkiya' kiq'ij ri abej y ri che' ri janila kixaq.

¹⁰Man rik'in ri' ri aj-Judá xa xkiben achi'el xkiben ri kach'alal. Xa man xtzolin ta pe kik'u'x wik'in rik'in ronojel kánima. Ja yin Jehová ri yibin.

¹¹Chuqa' ri Jehová xubij: Ri winaqi' richin ri tinamit Israel man kan ta xemakun achi'el xkiben ri winaqi' aj-Judá.

¹²Wakami k'a Jeremías, kabiyin y tabeya' re jun rutzijol re' chike ri winaqi' israelita ri ek'o pa xaman y tabij chike: Titzolin-pe ik'u'x wik'in rix ri xiniya' kan, yin kan xkixink'ul chi utzil y man xtipe ta woyowal chiwe richin jantape', xcha'.

¹³Toqaqa k'a chi'ik'u'x chi kan ix makuwineq y kan ix yakatajineq chuwij yin ri in iwajaw, ri i-Dios. Kan chi'anin xe'itzeqelibej ch'aqa' chik dios chiri' chuxe' taq che' ri kan janila kixaq y kan man xinimaj ta nutzij. Ja yin Jehová ri yibin.

¹⁴Kixtzolin-pe wik'in yin, rix ri ix yakatajineq chuwij, roma ja yin ri in iwajaw, nubij ri Jehová. Y yin xkixink'en-pe chi'ijujunal chupan ri ch'aqa' chik ruwach'ulew akuchi ixintalun-wi y kan xtinben k'a chiwe richin xkixtzolin-pe pa tinamit Sión.

¹⁵Xkenya' k'a q'atoy taq tzij pan iwi' ri kan yeqa' chinuwech yin y ja rije' ri xkeq'aton-tzij pan iwi' rix rik'in na'oj y nojibel.

¹⁶Y toq xixk'iyer yan chupan ri iruwach'ulew, man k'atzinel ta chik richin xtinataj ri káxa richin nujikibel-tzij, ni man jun chik xtich'obon pa ruwi' re' y man xtoqaqa ta chik chi'ik'u'x, ni man xtik'atzin ta chik chiwe ni man xtiteq ta rubanik jun k'ak'a'.

¹⁷Y chupan ri q'ij ri' yin xtinya' ri wajawaren wawe' pa Jerusalem y konojel k'a tzobaj winaqi' richin chijun ri ruwach'ulew xtikimol-ki' wawe' richin xtikiya' nuq'ij. Y man chik xtikiben ta ri rurayibel ri kánima.

¹⁸Toq xtapon ri q'ij ri', rix ri tinamit Judá xtijunamatej-iwech rik'in ri tinamit Israel. Xkixel-pe chiri' chupan ri ruwach'ulew ri k'o pa xaman y junan xkixtzolin-pe chupan ri ruwach'ulew ri xinya' chike ri iwati't-imama' richin q'asen.

¹⁹Xinben chiwe richin xixok achi'el walk'ual y xinya' jun ruwach'ulew chiwe ri kan janila rayixel, ri kan janila jebel ok chuwech chijun ruwach'ulew. Y yin xinch'ob chi rix nibij nata' chuwe y man jun bey chik xtijech'ej kan iwi' wik'in.

²⁰Jak'a rix xa xiben chuwe achi'el jun ixoq ri numalij kan ri rachijil. Keri' xiben chuwe rix. Yin Jehová ri yibin.

²¹K'o k'a jun raqoj-chi'ij ri xak'axatej ri pa taq ruwi' juyu'; y ri' ja ri kiraqoj-chi'ij ri israelita, ri ye'oq' y nikik'utuj to'onik, roma xa xkich'er kan ki' rik'in ri choj laj bey y xa xinkimestaj kan yin.

²²Titzolej k'a pe ik'u'x wik'in, rix alk'ualaxela' ri ix yakatajineq chuwij y yin xkixinwaq'omaj rik'in ri iyakatajinenri'il. Y rije' nikibij: Jare' ojk'o wawe' chawech richin yojch'on-q'anej awik'in, roma kan ja rat ri at qa-Dios.

²³Man jun nik'atzin-wi yojbe-q'anej pa ruwi' taq juyu' y niqareq qachi', roma roj kan awik'in rat qajaw Dios niqil-wi ri kolotajik roj ri oj atinamit Israel.

²⁴Ri xkil ri qate-qatata' toq roj k'a oj ak'uala' na, xa xk'is koma ri ch'aqa' chik dios, roma xekisuj chikiwech. Kan xek'is ronojel ri kikarne'l, ri kiwákix y ri kimi'al-kik'ajol.

²⁵Qaqasaj k'a qi' rik'in k'ixbilal, roma xqaya-qi' pa k'ixbilal, roma kan ja toq k'a oj ak'uala' na y k'a re wakami, roj y ri e qati't-qamama' kan oj makuwineq-pe chuwech ri qajaw Dios y man qaniman ta pe rutzij, xecha' ri winaqi'.