Read Kaqchikel Jer 30 Bible Online

Jer 30 - Kaqchikel bible

Jer 30

¹Ri Jehová xch'on chik k'a pe wik'in y xubij chuwe:

²Tatz'ibaj chupan jun wuj ronojel ri ch'abel ri xinbij chawe.

³Roma k'o jun q'ij toq yin xkenk'en chik pe konojel ri winaqi' aj-Israel y ri aj-Judá, ri e nutalun-el pa taq ch'aqa' chik ruwach'ulew. Kan xkenk'en chik k'a pe jun bey chupan re ruwach'ulew ri xinya' chike ri iwati't-imama' richin xkichinaj rije', xcha' chuwe.

⁴Ja ch'abel re' ri xubij ri Jehová pa kiwi' ri aj-Israel y ri aj-Judá.

⁵Kere' nubij ri Jehová: Xtak'axatej raqoj-chi'ij richin xibinri'il y kan man xtik'oje' ta chik uxlanibel-k'u'x.

⁶¿K'o kami jun achin ri nalan? ¿Achike k'a roma konojel achi'a' nikikototila-ki' roma q'axo'n?, nikiben achi'el jun ixoq ri nik'achoj yan chirij jun ak'ual. Y konojel rije' janila xkikajmaj yan.

⁷Kan xtinaqajub k'a pe jun q'ij richin q'axo'n. Kan man jun chik k'a q'ij q'axineq achi'el ri q'ij ri' y ri q'ij ri' kan richin bis kichin ri e rijatzul kan ri Jacob, jak'a yin Jehová kan xkixinkol k'a.

⁸Yin Jehová k'iytisanel richin ronojel, kan xkixinkol-wi chupan ri tijoj-poqonal. Xtinq'ej k'a ri yugo ri ya'on chi'iqul. Chuqa' xtinraq'ach'ij ri kolo' ri achoq ik'in ixximon-wi, richin rix man jun bey chik xkixxime' pa taq kow samaj kik'in ri man e iwinaq ta.

⁹Kan ja yin Jehová ri i-Dios ri xkinisamajij y yin xtinkanoj jun i-rey richin niq'aton-tzij pan iwi' y ri' jun chike ri rijatzul kan ri rey David.

¹⁰Roma ri' man tixibij-iwi' rix ri ix rijatzul kan ri Jacob, ri nusamajel yin. Chuqa' man timayamo-qa ri iwánima roma kan xkixinkol rix y ri iwalk'ual chupan ri ruwach'ulew xabakuchi ixk'o-wi. Xkixtzolin k'a rik'in uxlanibel-k'u'x y kan xkixk'ase' k'a chi utzil y kan man jun achike roma xtixibij-iwi'.

¹¹Yin kan ink'o iwik'in richin yixinkol. Kan xkenk'is k'a konojel tzobaj winaqi' ri akuchi xixintaluj-wi. Jak'a rix kan man xkixink'is ta y kan xtinq'et-tzij pan iwi' rik'in ruchojmilal, roma kan man xkixinya' ta kan choj keri'. Yin Jehová ri yibin.

¹²Ri iq'axo'n kan man jun k'a raq'omal, roma ri isokotajik kan yalan chik rubanon.

¹³Kan man jun nijoyowan iwech richin nraq'omaj ri isokotajik y roma ri' maneq chik raq'omal.

¹⁴Konojel k'a ri xe'ajowan iwichin xa xixkimalij kan y man yixkikanoj ta chik. Roma ri imak kan man ajlatel ta, roma ri' kan xinya' rutojbalil pan iwi' y yin kan xixinch'ey kow achi'el xa ja ta ri e etzelanel iwichin ri xixch'ayon.

¹⁵Kan janila k'iy ri imak y kan man ajlatel ta chik, roma ri' kere' nubanon chiwe. Roma ri' man tik'utuj to'onik richin ri iq'axo'n, roma maneq raq'omal.

¹⁶Man rik'in ri', konojel ri nikajo' yixkik'is, chuqa' rije' kan xkenk'is yin y konojel ri ye'etzelan iwichin kan xkebe pa ximonri'il. Ri ye'eleq'an iwik'in chuqa' k'o xke'eleq'an kik'in rije'.

¹⁷Jak'a yin kan xtinya' chik ri raxnaqil chiwe y xtinwaq'omaj ri isokotajik stape' konojel ri e etzelanel iwichin xtikibij-qa chi rix aj-Sión kan ix malin y kan man jun achike ninatan iwichin. Yin Jehová ri yibin.

¹⁸Chuqa' xtinjel ri ik'aslen y kan xtinjoyowaj iwech. Ri itinamit xtipabex chik q'anej pa ruwi' ri wulatejineq kan y ri rachoch ri rey kan xtipabex chik q'anej ri kan akuchi k'o-wi-pe.

¹⁹Iwik'in k'a rix xtel-pe bix richin matioxinik y tze'en richin kikoten. Man xkixk'is ta qa roma yin kan xtinben chiwe richin yixk'iyer. Chuqa' yin xtinya' iq'ij y roma ri' kan man jun bey chik xtiqasex iq'ij.

²⁰Rix winaqi' aj-Israel kan xtiben achi'el pa nabey. Ri itinamit kan xkejike' k'a chinuwech yin y yin kan xtinya' ri rutojbalil pa kiwi' ri yetz'ilo iwichin.

²¹Y chi'ikojol k'a rix xtel-pe jun tata'al y jari' ri xtiq'aton-tzij pan iwi'. Y toq xkijel-apo rik'in, jari' toq rija' xtijel-pe wik'in yin, roma k'a man jun nitikir nijel-pe wik'in choj keri'. Yin Jehová ri yibin.

²²Rix xkixok nutinamit y yin xkinok i-Dios.

²³Ri woyowal ri xtiqaqa achi'el jun nimalej kaq'iq' job y ri e banoy etzelal kan xke'uk'uex-el achi'el nuben jun nimalej surkum.

²⁴Ri janila woyowal man xtik'is ta qa choj keri', k'a ja toq xtibanatej ri nuch'obon yin. Y xtapon k'a jun q'ij k'ari' xtiq'ax chiwech rix.