Read Kaqchikel Jer 31 Bible Online

Jer 31 - Kaqchikel bible

Jer 31

¹Chupan ri q'ij ri' ja yin ri xkinok Dios kichin konojel tzobaj winaqi' israelita y rije' xke'ok nutinamit yin.

²Ri Jehová nubij: Toq ri tinamit Israel beneq chukanoxik uxlanenri'il, ri xekolotej kan chuwech ri espada xkil uxlanenri'il pa tz'iran ruwach'ulew.

³Yin k'a nej xink'ut-wi' chikiwech ri iwati't-imama' y xinbij chike: Yin kan yixinwajo' rik'in jun ajowabel ri man jun bey nik'is y roma ri' kan jantape' xtinjoyowaj iwech, xicha' chike.

⁴Kan xtinpaba' chik q'anej jun bey ri iruwach'ulew rix aj-Israel. Kan xtiq'ojomaj chik jun bey ri i-pandereta y xkixropilan rik'in kikoten.

⁵Xtitik chik qa jun bey ri juwi-uva pa taq juyu' richin Samaria y xkixkikot rik'in ri ruwech.

⁶Roma xtoqaqa k'a jun q'ij toq xkech'on-q'anej ri yechajin chiri' pa taq juyu' richin Efraín, richin yixkoyoj rix richin yixjote-el pa tinamit Sión richin niya' nuq'ij yin Jehová ri i-Dios.

⁷Roma kere', yin Jehová ninbij chiwe rix ch'aqa' chik winaqi' richin ri ruwach'ulew chi kixbixan k'a rik'in kikoten roma ri rutinamit ri Jacob ri kan k'o más rejqalen chi'ikojol iwonojel. Kan kixbixan k'a rik'in kikoten y tik'utuj utzil chuwe chi yin yenkol ri juba' ri k'a ek'o na kan.

⁸Yin kan xkenk'en k'a pe kere' pa xaman chire ri ruwach'ulew y kan xkenmol k'a pe konojel, stape' k'a pa ruk'ulba't ri ruwach'ulew ek'o-wi. Y xkepe k'a konojel, chuqa' ri moyi', ri e jetz', ri ixoqi' ri koyoben taq kal y ri xek'oje' yan taq kal; kan janila k'a e k'iy ri xketzolin-pe.

⁹Xkepe rik'in oq'ej y nikik'utuj utzil chuwe. Y yin xkenk'uaj chunaqaj ch'uti'n raqen taq ya', pa jun bey ri kan choj nibe, ri akuchi ri kan man xtikipajk'ij ta kaqen. Roma yin kan in jun tata'aj richin ri tinamit Israel y ri Efraín ri nabey nuk'ajol.

¹⁰Chi'iwonojel rix tzobaj winaqi' ri ixk'o pa taq taq'aj ri ek'o nej, tiwak'axaj ri nuch'abel. Ri xtalun kichin ri tinamit Israel, wakami xkerumol y xkeruchajij, achi'el nuben jun yuq'unel kik'in ri rukarne'l.

¹¹Roma yin kan xkenkol ri rutinamit kan ri Jacob pa ruq'a' jun ruwach'ulew ri k'o janila ruchuq'a' chikiwech rije'.

¹²Rije' xkepe k'a pa tinamit Sión, rik'in jun raqoj-chi'ij richin kikoten y kan xkekikot k'a rik'in ri pa ruk'iyal ri xtinya' chike: Ri jalajoj ruwech ixin, ri vino, ri aceite y ri kokoj y nima'q taq awej. Y ronojel utz xtel chikiwech achi'el jun qejoj ri jebel ya'an. Y man jun bey chik k'a xtik'is kuchuq'a'.

¹³Ri xtani' kan xkeropilan rik'in kikoten, keri' chuqa' ri alaboni' y ri rijita'q. Yin kan xtinya' kuqubabel-k'u'x kik'in. Xtinwelesaj-el ri koq'ej y pa ruk'exel ri' xtinya' kikoten chike.

¹⁴Y ri winaqi' ri' kan xkekikot rik'in janila chi beyomel ri xtinya' chike y chuqa' ri sacerdote kan xtik'oje' pa ruk'iyal kik'in.

¹⁵Jak'a re wakami, nak'axatej k'a jun ch'abel pa tinamit Ramá. K'o k'a jun ri noq' roma nojineq q'axo'n pa ránima. Ja ri Raquel noq' koma ri ral y man nrajo' ta richin nibochi'ix, roma ri ral kan xeken yan el.

¹⁶Jak'a yin Jehová ninbij chike ri teja': Man chik yixoq' y man chik tibiyin ruya'al runaq'-iwech, roma ri iq'axo'n kan k'o rajel ruk'exel. Ri iwal xa xkiya' yan kan ri kiruwach'ulew ri e etzelanel iwichin.

¹⁷K'o k'a jun oyobenri'il richin ri chiwech-apo. Ri iwal xketzolin-pe pan iruwach'ulew. Yin Jehová ri yibin.

¹⁸Yin kan wak'axan k'a ri koq'ej ri winaqi' israelita toq xkibij: Roj ri pa nabey kan man oj choj ta, achi'el k'a jun nima-alaj achij wákix ri man choj ta nisamej. Jak'a rat kan xaben chiqe richin choj xojsamej. Tabana' k'a chiqe richin yojtzolin pa qaruwach'ulew, roma ja rat Jehová ri at qa-Dios.

¹⁹Toq k'a oj k'ajol na, kan xqach'er-el-qi' awik'in, jak'a re wakami xtzolin-pe qak'u'x y kan niqaya' chiqij ri qamak. Kan niq'ax k'a chiqawech ri xqaben y roma ri' oj k'ixbitajineq y kan qajineq qaq'ij, yecha' ri aj-Israel.

²⁰Jak'a yin Jehová ninbij chi rix israelita ix achi'el jun nuk'ajol ri kan janila ninwajo'. Stape' k'iy mul ixinch'olin, kan jantape' k'a ixk'o chinuk'u'x. Y roma ri' kan janila ninjoyowaj iwech y yixinwajo'. Yin Jehová ri yibin.

²¹Rix winaqi' israelita rokik ix beneq pa Babilonia, tiya' kan retal ri ibey, richin chi'anin niwil chik jun bey. Titz'eta' k'a jebel ri ibey ri akuchi ix beneq-wi. Kixtzolin k'a chupan ri iruwach'ulew rix walk'ual ri janila yixink'uxla'aj.

²²¿K'a janipe' k'a niya' kan ri yixbe-kela' yixbe-kela' niben? Rix ix achi'el jun alk'ualaxel ri man nunimaj ta tzij. Jak'a yin Jehová k'o jun k'ak'a' ri xintz'uk chupan re ruwach'ulew re'; ja ri man jun bey k'uluwachitajineq.

²³Yin Jehová ri k'o ronojel uchuq'a' pa nuq'a' y roma ri' ninbij chi toq yin xtinjel ri rubanik ri kik'aslen ri winaqi' ri ek'o pa tinamit Judá, jari' toq rije' xkek'oje' chik jun bey pa kiruwach'ulew y pa taq kitinamit. Y xkech'on wik'in y xtikik'utuj chuwe chi yin xtinwurtisaj ri wachoch ri k'o pa ruwi' re juyu' re'.

²⁴Ri winaqi' xkek'oje' k'a pa taq kitinamit chupan ri ruwach'ulew Judá. Jujun chike rije' xtikiben-qa kitiko'n y jujun chik xke'ok yuq'unela' kichin tzobaj taq awej.

²⁵Chike ri e kosinaqi' y ri maneq kuchuq'a', yin xtinya' uxlanen pa ruk'iyal chike y jun k'ak'a' uchuq'a', xcha' ri Dios.

²⁶K'ari' yin Jeremías xik'astej y xinjeq ri runaq' taq nuwech y xina' chi ri xiwer kan utz xuben chuwe.

²⁷Chuqa' ri Jehová xubij: Xtapon k'a jun q'ij toq yin xtinchajij ri ruwach'ulew Israel, ri Judá, ri winaqi' y ri chikopi', achi'el nuben jun tikonel.

²⁸Kan xinben k'a kik'in rije' chi xenk'uq, xenwelesaj-el, xenwulaj y xenyoj. Chuqa' xinya' ruk'ayewal pa kiwi'. Keri' chuqa' xkentik-qa y xkenk'iytisaj chik q'anej jun bey. Yin Jehová ri yibin.

²⁹Ri ojer kan, ri winaqi' kere' nikibij: Ri te'ej-tata'aj xkitej ch'om taq uva y xa ja ri alk'ualaxela' nijuch'uch' key. Jak'a chupan ri q'ij ri' man xtibix ta chik,

³⁰roma ri winaqi' ri xketijo ri ch'om taq uva, ja rije' ri xtijuch'uch' ri key. Nel k'a chi tzij chi kan chikijujunal k'a ri winaqi' xkeken roma ri kimak.

³¹Yin Jehová ninbij chi kan xtapon k'a jun q'ij chi xtinbenbana' k'a jun k'ak'a' jikibel-tzij kik'in konojel ri winaqi' israelita y ri aj-Judá.

³²Y ri k'ak'a' jikibel-tzij ri' man achi'el ta k'a ri jikibel-tzij ri xinben kik'in ri kati't-kimama', toq xenwelesaj-pe chupan ri ruwach'ulew Egipto. Stape' ja yin in kajaw rije', jak'a xa man xkitaqej ta ri nujikibel-tzij.

³³Roma kan jare' k'a ri k'ak'a' jikibel-tzij ri xtinben yin Jehová kik'in rije' chupan ri q'ij ri' y kan xtinben richin xtibek'oje' ri nupixa' pa taq kánima. Chupan ri q'ij ri' yin xkinok ki-Dios y rije' xke'ok nutinamit.

³⁴Kan man jun k'a nik'atzin-wi chi nikik'utula' ta chikiwech richin niketamaj nuwech, roma konojel rije' kan ketaman chik nuwech, nitiker-el rik'in ri más ko'ol y napon-q'anej rik'in k'a ri más nim, roma yin kan xtinkuy ri itzel taq kibanobal y man chik xtoqaqa ta chinuk'u'x ri kimak. Yin Jehová ri yibin.

³⁵Kan qitzij na wi chi ja yin xiya'on ri q'ij richin chi nisaqirisan ri paq'ij. Chuqa' ja yin ri xibanon ri ik' y ri ch'umil richin chi yesaqirisan chi'aq'a'. Ri nubi' ja ri Jehová ri k'o ronojel uchuq'a' pa ruq'a'. Y chuqa' ja yin ri xibanon chire ri palou richin nisilon ruwi' y nibolqo't.

³⁶Yin ninjikiba' chi rokik niyaloj ronojel re', kan jantape' k'a xkek'oje' ri rijatzul kan ri Israel, kan jantape' xke'ok nutinamit yin. Yin Jehová ri yibin.

³⁷Chuqa' ninjikiba' chi rokik man jun nitikir netan ri kaj, y man jun nitikir nunik'oj ruxe' ri ruwach'ulew, yin kan man xkenwixowaj ta ri e rijatzul kan ri Israel, stape' janila chi mak ri xkiben. Yin Jehová ri yibin.

³⁸Chuqa' ninbij chi xtapon k'a ri q'ij chi ri Jerusalem xtipabex chik q'anej jun bey, nitiker k'a el rik'in ri rachoch ri chajinel ri k'o pa ruwi' ri tz'aq richin Hananel y choj nibe akuchi nusutij-ri' ri tz'aq.

³⁹Y chiri' choj nibe y niq'ax-el chuchi' ri kokoj juyu' richin Gareb y niberusutij-pe-rij ri tinamit Goá.

⁴⁰Y xkech'ar chuwe yin ri akuchi yemuq-wi ri kaminaqi' y chuqa' akuchi nitorix-wi ri chaj ri k'o chupan ri taq'aj richin ri Cedrón. Chuqa' xkech'ar chuwe yin ri taq'aj richin Hinom k'a rik'in ri ruchi' akuchi ye'el ye'ok-wi ri kiej chiri'. Y ri winaqi' aj-Jerusalem man jun bey chik xke'elesex-el, ni ri tinamit man jun bey chik xtiwulex-el, xcha' ri Jehová.