Read Kaqchikel Jer 33 Bible Online

Jer 33 - Kaqchikel bible

Jer 33

¹Toq yin k'a in ximil na chiri' chuwa-jay, jari' toq xch'on chik pe ri Jehová wik'in y xubij chuwe:

²Yin ri xibanon re ruwach'ulew y ri xijikiban richin; ri nubi' ja ri Jehová. Y ninbij:

³Kach'on k'a q'anej wik'in y yin xtink'uluba-pe ri ach'abel y kan xtink'ut k'a chawech nima'q taq banobel ri ewatel chawech rat.

⁴Roma kere' ninbij yin Jehová: Jujun chike ri jay richin re tinamit re' y ri jay kichin ri e rey kan xewulex richin nitz'apex ri tz'aq richin man ye'ok ta apo ri aj-Babilonia.

⁵Y ri akuchi xek'oje-wi ri jay, ri chiri' kan xkenojisex chi kaminaqi' richin re tinamit re', roma yin kan man ninto' ta chik re tinamit re' roma ronojel ri kibanon chinuwech yin.

⁶Jak'a yin kan xtinpaba' chik q'anej ri tinamit y xkenwaq'omaj ri winaqi' richin chi rije' xkek'ase' rik'in uxlanibel-k'u'x y qitzijri'il.

⁷Kan xkenk'en-pe ri aj-Judá y ri aj-Israel ri e nutalun-el y kan xtinya' uchuq'a' kik'in achi'el ri pa rutikeribel.

⁸Kan xkench'ajch'ojirisaj rik'in ronojel kimak ri xkiben chinuwech; kan xtinkuy k'a ri kimak ri xkiben roma ri kiyakatajinenri'il chuwij.

⁹Kan jantape' k'a xkikikot kik'in re tinamit re'. Kan xtik'oje' k'a nim nuq'ij-nuk'ojlen chikiwech konojel tzobaj winaqi' richin re ruwach'ulew roma xtikak'axaj ronojel utzil ri xtinben kik'in ri nuwinaq. Y ri ch'aqa' chik winaqi' richin ri ruwach'ulew xtikimey y xtik'is ri kuchuq'a' roma ronojel ri utzil y ri uxlanen ri xtinya' chike ri nuwinaq.

¹⁰Yin Jehová kere' ninbij: Rix nibij chi chupan re tinamit re' kan man jun chik wineq k'o, ni chikop. Pa taq tinamit richin Judá y pa taq bey richin Jerusalem xa kan tolan chik.

¹¹Jak'a xtapon jun q'ij chi ri chiri' xtak'axatej chik bix richin kikoten, bix richin k'ulubik y bix kichin ri yek'amon-pe sipanik richin matioxinik chuwe. Y kere' ri nikibixaj: Tiya' matioxinik chire ri Jehová ri k'o ronojel uchuq'a' pa ruq'a', roma rija' kan janila utz, y ri rajowabal kan richin q'asen, xkecha' rije'. Roma kan xtinben chi ri kulew xtiwachin chik jun bey achi'el ri pa nabey.

¹²Yin Jehová ri k'iytisanel richin ronojel, ninbij: Chupan re ruwach'ulew re', man jun chik wineq ni chikop k'o. Jak'a ri q'ij ri' xtik'oje' chik kiway ri chikopi' ri akuchi ri yuq'unela' yetikir nikiyuq'uj chik ri taq kikarne'l.

¹³Xkeq'ax chik jun bey ri taq karne'l pa ruq'a' ri yuq'unel richin yerajlaj chiri' pa taq tinamit ri ek'o chiri' chuwi' taq juyu', pa taq kixikin ri taq juyu', pa xokon chire ri Judá, pa ruwach'ulew ri Benjamín, chunaqaj ri Jerusalem y pa taq tinamit richin Judá, xcha' ri Jehová.

¹⁴Chuqa' ri Jehová xubij: Xtipe k'a q'ij chi yin kan xtintaqej ri urtisanik ri rusujun chike ri tinamit Israel y ri Judá.

¹⁵Y chupan ri q'ij ri', xtinben k'a chi chaq k'ate' xtibek'ulun-pe jun chike ri rijatzul kan ri David, achi'el nijotayin-pe jun che'. Y rija' kan xtuq'et-tzij pa ruchojmilal.

¹⁶Chupan ri q'ij ri', ri tinamit Judá kan xtijike' y ri winaqi' ri ek'o pa Jerusalem kan xkek'ase' rik'in uxlanibel-k'u'x. Kan ja bi'aj re' ri xtikiya' chire: Ri Jehová jari' Ruchojmilal.

¹⁷Ja yin Jehová ninbij chi jantape' xtik'oje' jun rijatzul kan ri David ri xtiq'aton-tzij pa kiwi' y chijun ri tinamit Israel.

¹⁸Chuqa' jantape' xtik'oje' jun sacerdote ri rijatzul kan ri Leví, richin ronojel q'ij nusuj sipanik ri niporox chijun, ri sipanik richin jalajoj ruwech ixin y nusuj ch'aqa' chik kamelabel chinuwech, xcha'.

¹⁹Ri Jehová xch'on chik k'a jun bey wik'in y xubij chuwe:

²⁰Yin man yitikir ta ninyoj ri jikibel-tzij nubanon rik'in ri paq'ij y ri chaq'a', richin chi man ta niseqer-pe y man ta nokoq'a-qa.

²¹Keri' chuqa' man yitikir ta ninyoj ri jikibel-tzij ri xinben rik'in ri nusamajel David, chi rija' jantape' nik'oje' jun rijatzul richin chi nuq'et-tzij y nik'oje' pa rutz'uyubal. Chuqa' man yitikir ta ninjel ri jikibel-tzij ri nubanon kik'in ri sacerdote ri e nusamajela' ri e rijatzul kan ri Leví.

²²Kik'in ri e rijatzul kan ri David y ri e rijatzul kan ri Leví, kan xtinben chike richin xkek'iyer y ri kajlabal achi'el kajlabal ri ch'umila' ri ek'o chuwech ri kaj y achi'el ri kajlabal ri sanayi' ri ek'o chuchi' ri palou. Keri' xtinben kik'in rije', xcha' ri Dios chuwe.

²³Ri Jehová xch'on chik wik'in y xubij chuwe:

²⁴¿Man awetaman ta k'a chi ri winaqi' nikibij chi ri Israel y ri Judá xerucha' ri Jehová, jak'a wakami man xerajo' ta chik?, yecha'. Roma ri' kan xkiben chike ri nutinamit richin maneq kejqalen y man e jun ruwach'ulew ta.

²⁵Yin Jehová ninbij: Wi yin man ta nubanon jun jikibel-tzij rik'in ri paq'ij y ri chaq'a' y wi man ta nuya'on ri pixa' pa ruwi' ri kaj y ri ruwach'ulew,

²⁶keri' yin xkenwetzelaj ri rijatzul kan ri Abraham, ri Isaac y ri Jacob y chuqa' xtinben ta chi man jun chike ri e rijatzul kan ri David ri xtiq'aton-tzij. Jak'a yin kan xkenwelesaj-pe ri nuwinaq ri akuchi xentaluj-wi y kan xtinjoyowaj kiwech, xcha' ri Dios chuwe.