Read Kaqchikel Jer 34 Bible Online

Jer 34 - Kaqchikel bible

Jer 34

¹Y ri Jehová xch'on k'a wik'in toq ri Nabucodonosor, rey richin Babilonia nuben k'a oyowal rik'in ri tinamit Jerusalem y kik'in ri tinamit ri ek'o chunaqaj, e rachibilan konojel ri aj-labal y ri achi'a' ri junamatajineq-kiwech rik'in.

²Y xubij chuwe chi yich'on rik'in ri Sedequías rey richin Judá y kere' tinbij chire: Ri Jehová nubij chi wakami xtinjech re tinamit re' pa ruq'a' ri rey richin Babilonia y rija' xtuporoj kan.

³Jak'a rat Sedequías, man xkakolotej ta kan pa ruq'a'. Xa kan xkatkichop-el y xkatkik'uaj-el pa ruq'a' ri Nabucodonosor. Y kan xtich'on awik'in y k'ari' xkaruk'uaj-el pa Babilonia.

⁴Man rik'in ri' tawak'axaj k'a ri nuch'abel, rat Sedequías rey richin Judá. Kere' ninbij yin chawij rat: Man xkakamisex ta rik'in espada;

⁵kan xkaken rik'in uxlanen. Y toq xaken yan, kan xtikiporoj k'a pom richin nikinimirisaj aq'ij, achi'el xban ojer kik'in ri ate-atata'. Keri' chuqa' xkebison chawij rat y xke'oq' awoma. Yin Jehová ri yibin y kan ninya' nutzij, xcha' chuwe.

⁶K'ari' xinkamuluj k'a ronojel re' chire ri rey Sedequías chiri' pa Jerusalem,

⁷rokik ri aj-labal richin ri rey Babilonia, kan kichapon k'a chi oyowal ri tinamit Jerusalem, ri Laquis y ri Azecá, roma kan xaxe chik re' ri ek'o kan.

⁸Ri Jehová xch'on chik wik'in yin Jeremías, chirij toq ri rey Sedequías xuben jun jikibel-tzij kik'in konojel ri winaqi' richin ri tinamit Jerusalem richin chi tikiya-el q'ij chike ri kisamajela' richin yetotej-el.

⁹Y rija' xubij chike chi wi k'o loq'on taq samajela' aj-Judá, achi'a' o ixoqi', k'o chi tikiya-el q'ij chike richin yetotej-el richin chi man jun kiwinaq nok kisamajel.

¹⁰Konojel ri e aj-raqen y konojel ri winaqi' richin ri tinamit xkinimaj k'a re jun jikibel-tzij re' ri xkiben y xkiya-el q'ij chike ri loq'on taq samajela' richin xetotej y man xkiben ta chik chike richin xe'ilix más koma rije' y keri' xetotej-el.

¹¹Jak'a chirij ri' xa xkitzolij-ki' chikij y xkiben chi xetzolin chik pe ri kisamajela' ri xkiya-el q'ij chike richin xebe y rije' xekilij chik jun bey y xe'ok chik jun bey kisamajela'.

¹²K'ari' ri Jehová xch'on chik wik'in y xubij chuwe:

¹³Yin Jehová ri i-Dios kere' ninbij: Yin xinben jun jikibel-tzij kik'in ri ite-itata' ri q'ij toq xenwelesaj-pe pa ruwach'ulew Egipto, toq ek'o pa ximonri'il y xinbij chike chi

¹⁴toq xtitz'aqet wuqu' juna', chikijujunal rije' ri k'o jun loq'on samajel kik'in, k'o chi xtiya'ox q'ij chire richin nitotej-el. Jak'a ri ite-itata' man xinkak'axaj ta y man xkiya' ta kixikin chire ronojel re'.

¹⁵Y rix kan keri' ibanon-pe. Jak'a wakami xtzolin-pe ik'u'x y xiben ri niqa' chinuwech, roma niya' rutzijol chi chi'ijujunal rix, niya-el q'ij chike ri isamajela' richin yetotej-el. Y xiben k'a jikibel-tzij chinuwech yin, chupan ri wachoch ri akuchi ninataj-wi ri nubi' yin Jehová.

¹⁶Jak'a rix xa xitzolij chik iwi' chiwij y man xiya' ta rejqalen ri nubi'. Chi'ijujunal rix xa xe'ik'en chik qa jun bey ri isamajela', ri xiya' yan el q'ij chike richin xetotej-el.

¹⁷Roma ri' yin ninbij chi roma rix kan man xiniwak'axaj ta k'a richin chi xiya' ta el q'ij chike ri isamajela' richin xetotej, roma ri' re wakami yin kan xtinya' q'ij chi xtipe ri labal, ri wayjal y ri nima-yabil chiwij; kan xtinben chike konojel tzobaj winaqi' richin re ruwach'ulew, chi xtikixibij-ki' chiwech.

¹⁸Rix xiben re jun jikibel-tzij re', jak'a man xitaqej ta. Y roma ri' ninya' rutojbalil-mak pan iwi'. Rix xich'er k'a pa nik'aj ri alaj achij wákix y xiya' kan pa ka'i' cholaj. K'ari' xiq'ax pa kinik'ajal.

¹⁹Ri e aj-raqen pan iwi', ri yesamej rik'in ri rey, ri e sacerdote y rix tinamit ri xixq'ax chukojol ri ka'i' cholaj ri',

²⁰iwonojel k'a rix xkixinjech k'a pa kiq'a' ri e etzelanel iwichin, ri kan nikikanoj ri ik'aslen richin yixkikamisaj y ri ich'akul xketij koma ri k'ucha' y koma chikopi' richin pa k'echelaj.

²¹Wakami ri aj-labal e richin ri rey Babilonia kitanaban kan juba' ri oyowal. Jak'a rat Sedequías y rix aj-raqen, xkixinjech pa kiq'a' rije'

²²roma kan xtinben k'a chike chi xkepe chirij re tinamit re'. Xkixkichop chik chi oyowal, xke'ok chupan ri itinamit y xtikiporoj kan. Chuqa' xtinben k'a chike ri ch'aqa' chik tinamit richin Judá chi kan man jun xtik'oje' kan chupan y kan xtitole' kan, xcha' ri Jehová chuwe.