Read Kaqchikel Jer 35 Bible Online

Jer 35 - Kaqchikel bible

Jer 35

¹Chupan ri q'ij chire ri q'atbel-tzij richin ri Joaquim ruk'ajol ri Josías, ri Jehová xch'on k'a pe wik'in y xubij chuwe:

²Kabiyin kik'in ri aj-Recab y ke'ak'uaj chupan jun chike ri jay richin ri wachoch ri ek'o wawe'. K'ari' taya' juba' vino chike, xcha' chuwe.

³K'ari' yin xinbenk'ama-pe ri Jaazanías ruk'ajol ri jun chik achin rubini'an Jeremías, rumam ri Habasinías y ri e rach'alal, ri e ralk'ual y konojel ri aj pa kachoch ri recabita.

⁴Y xenk'uaj pa rachoch ri Jehová y xojok-apo pa kachoch ri ralk'ual ri Hanán ruk'ajol ri Igdalías, ri rusamajel ri Dios; ri jay ri' k'o-apo chunaqaj ri jay kichin ri tata'al, ri k'o pa ruwi' ri rachoch ri Maaseías ruk'ajol ri Salum ri nichajin ri ruchi' ri rachoch ri Dios.

⁵K'ari' xinya' xára ri e nojineq rik'in vino chikiwech y chuqa' xinya-apo qumbel y xinbij chike chi tikiqumu' ki-vino.

⁶Jak'a rije' xkibij chuwe: Man niqaqum ta vino, roma ri Jonadab ri ánima qamama' xubij kan chiqe chi man jun bey tiqaqum vino, roj y ni ri qijatzul.

⁷Chuqa' xubij chiqe chi man tiqapaba-q'anej jay, ni man qojtikonej-qa, ni man tiqatik uva, ni man jun tik'oje' qik'in, xa kan xqojk'ase' pa taq jay ri e banon rik'in tzieq chijun qak'aslen, richin chi yojk'ase' k'iy juna' chuwech re ruwach'ulew re akuchi xa oj q'axel-wi.

⁸Roj kan qaniman k'a rutzij ri Jonadab rik'in ronojel ri rubin chiqe, chi man tiqaqum vino chijun qak'aslen, ni roj ni ri qixjayilal ni ri qami'al-qak'ajol.

⁹Chuqa' rubin chiqe chi man niqapaba' ta q'anej jun qachoch richin chi yojk'oje' chupan y man niqatik ta uva ni man tik'oje' qulew richin qasanbel.

¹⁰Xa oj k'ojewineq k'a chupan taq jay ri e banon rik'in tzieq y kan qaniman y qabanon ronojel ri rubin ri Jonadab chike ri qati't-qamama'.

¹¹Jak'a toq ri rey Nabucodonosor xjote-el richin niberubana' oyowal chiqij, jari' toq xqaya' chiqawech chi xojpe pa tinamit Jerusalem richin chi xojanimej chikiwech ri aj-labal aj-Babilonia y ri aj-Siria. Roma ri' ojk'o wawe', xecha'.

¹²Roma ri' xch'on chik k'a ri Jehová wik'in y xubij chuwe:

¹³Yin Jehová k'iytisanel richin ronojel, ri a-Dios, ninbij: Kabiyin y tabebij chike ri winaqi' aj-Jerusalem y chike ri aj-Judá y tabij: Rik'in ta ri kibanobal ri recabita rix kan xtinimaj ta nutzij.

¹⁴Ri rubin kan ri Jonadab ruk'ajol ri Recab, chike ri e rijatzul chi man tikiqum vino, rije' kan kitaqen y roma ri' kan man kiqumun ta vino k'a re wakami, roma kan kiniman ri pixa' richin ri kimama'. Jak'a yin kan beneq k'a ruwech nubin-pe chiwe rix y man rik'in ri', man in iwak'axan ta.

¹⁵Y kan jantape' k'a xenteq-pe nusamajela' ri e q'alajirisey nuch'abel iwik'in, richin chi xkibij chiwe chi titzolej-pe ik'u'x chupan ri itzel bey ri ik'uan y kan tichojmirisaj ri ik'aslen. Chuqa' xkibij chiwe chi man ke'itzeqelibej ch'aqa' chik dios richin niya' kiq'ij. Wi keri' xtiben, kan xkixk'ase' k'a chupan ri ruwach'ulew ri xinya' chiwe rix y chike ri iwati't-imama'. Jak'a rix xa man xiya' ta ixikin chike ri q'alajirisey nuch'abel, ni man xinimaj ta ri nutzij.

¹⁶Kan qitzij na wi, ri e rijatzul kan ri Jonadab ri ruk'ajol ri Recab kan xkitaqej ri pixa' ri bin kan chike; jak'a rix kan man iniman ta nutzij.

¹⁷Roma ri', yin Jehová k'iytisanel richin ronojel, ri i-Dios ninbij k'a: Wakami k'a xtink'en-pe ronojel ri man utz ta pan iwi' rix aj-Judá y aj-Jerusalem, roma kan xich'on iwik'in jak'a man xiwak'axaj ta, xixinwoyoj jak'a man xinimaj ta, xcha' ri Dios chuwe.

¹⁸Jari' toq yin xinbij chike ri aj-Recab: Ri Jehová k'iytisanel richin ronojel, ri qa-Dios, nubij chi roma kan itaqen-pe ri rupixa' ri imama' y kan ibanon ronojel ri achi'el rubin rija' chiwe;

¹⁹roma ri', ri Jehová ri k'iytisanel richin ronojel xubij chi kan jantape' xtik'oje' jun ruwinaq ri Jonadab chinuwech yin, ronojel q'ij, xicha' chike.