Read Kaqchikel Jer 36 Bible Online

Jer 36 - Kaqchikel bible

Jer 36

¹Ri Jehová xch'on chik k'a pe wik'in chupan ri rukaj juna' chire ruq'atoj-tzij ri Joaquim y kere' k'a ri xubij chuwe:

²Tachapa' k'a jun boton wuj y tatz'ibaj chupan ri wuj ri' ronojel ri ch'abel ri xinbij chawe, pa ruwi' ri ruwach'ulew Israel y pa ruwi' ri Judá y pa kiwi' konojel ri tzobaj winaqi' richin re ruwach'ulew, kan k'a ja chupan ri q'ij richin ri q'atbel-tzij richin ri rey Josías k'a re wakami.

³Rik'in juba' xtikak'axaj ta ri awinaq ri itzel ri ninch'ob richin ninya-pe pa kiwi' y nitzolin ta pe kik'u'x chikijujunal rije' chupan ri itzel laj bey ri kik'uan kan. K'ari' yin xtinkuy ri itzel taq kibanobal y ri kimak, xcha' chuwe.

⁴Y yin xinwoyoj k'a ri Baruc. Y ri Baruc xutz'ibaj k'a chupan ri boton wuj ronojel ri xinsik'ij chire, achi'el ri rubin ri Jehová.

⁵K'ari' xinbij chire: Rat natz'et chi yin man yitikir ta yibe chupan ri rachoch ri Jehová.

⁶Roma ri' tabana' utzil kabiyin richin nabesik'ij ri k'o chuwech re wuj re', chikiwech konojel qawinaq chiri' pa rachoch ri Jehová, chupan ri q'ij toq yemewayin; y xtasik'ij chuqa' chikiwech ri winaqi' richin chijun ri Judá.

⁷Rik'in juba' xtapon ri kich'owen rik'in ri Jehová y chikijujunal nitzolin-pe kik'u'x chupan ri itzel bey ri kik'uan, roma ri Jehová kan janila yakatajineq royowal y ri royowal ri yakatajineq kan xuk'ut pa ruwi' re tinamit re', xicha' chire.

⁸Y xbanatej k'a chupan ri beleje' ik' chire ri ro' juna' toq niq'aton-tzij ri Joaquim rey richin Judá, chi rija' xya'ox rutzijol chike konojel winaqi' richin ri tinamit Jerusalem y konojel winaqi' ri yepe pa taq tinamit richin ri ruwach'ulew Judá, richin yemewayin chuwech ri Jehová. Y ri Baruc xuk'uaj ri wuj ri' y xbe-q'anej chuwa-jay ri k'o-q'anej pa jotol chire ri rachoch ri Jehová. Y chiri' xpa'e-wi chuxe-pe ri rachoch ri Guemarías, ruk'ajol ri Safán ri tz'ibanel. Y ri Baruc xusik'ij ri ruch'abel ri Jehová ri k'o chupan ri wuj, chiri' chupan ri rachoch ri Jehová.

¹¹Y k'o k'a chiri' ri Micaías ruk'ajol ri Guemarías ri rumam ri Safán. Y xkak'axaj k'a ronojel ri ruch'abel ri Jehová ri nubij ri wuj, ri xusik'ij ri Baruc.

¹²Jari' toq ri Micaías xbe pa rachoch ri rey akuchi k'o-wi ri rachoch ri aj-tz'ib, akuchi kimolon-wi-ki' konojel ri achi'a' ri k'o kiq'ij: Ri Elisamá ri aj-tz'ib, ri Delaías ruk'ajol ri Semaías, ri Elnatán ruk'ajol ri Acbor, ri Sedequías ruk'ajol ri Hananías y ch'aqa' chik achi'a'.

¹³Ri Micaías xutzijoj chike ronojel ri ch'abel ri xrak'axaj-el, ri nubij chupan ri wuj ri xusik'ij ri Baruc chikiwech ri winaqi'.

¹⁴K'ari' ri achi'a' ri' xkoyoj ri Jehudí ruk'ajol ri Netanías, ri chuqa' rumam ri Celemías y ruxikin rumam ri Cusí, richin niberubij chire ri Baruc chi tuk'uaj chike ri boton wuj ri' ri xusik'ij chikiwech ri winaqi' richin ri tinamit. Y ri Baruc xuk'uaj k'a el ri boton wuj ri' y xbe kik'in rije'.

¹⁵K'ari' xkibij chire chi titz'uye' y tusik'ij chikiwech ri wuj. Y ri Baruc kan xusik'ij chikiwech.

¹⁶Kan xaxe k'a xkak'axaj ronojel ri nubij ri wuj, kan jari' toq chikijujunal janila xkixibij-ki' y xkibij chire ri Baruc chi k'o chi nibekibij ronojel chire ri rey.

¹⁷Chuqa' xkik'utuj chire ri Baruc, achike rubanik richin xutz'ibaj ronojel re ch'abel re'.

¹⁸K'ari' ri Baruc xubij chike: Ri Jeremías nubij-pe chuwe ri ch'abel y yin nintz'ibaj, xcha'.

¹⁹K'ari' xkibij chire ri Baruc: Rat y ri Jeremías más utz tibewewaj-iwi' y man jun tetaman akuchi xkixbek'oje-wi, xecha' chire.

²⁰Ri achi'a' ri' xkiya' kan ri boton wuj pa rachoch ri Elisamá ri tz'ibanel, k'ari' xe'ok k'a apo chuwa-jay akuchi k'o-wi ri rey y xkibij chire ronojel ri nubij ri wuj ri'.

²¹Xeri' ri rey xuteq-el ri Jehudí richin niberuk'ama' ri wuj chiri' pa rachoch ri Elisamá. Y toq ruk'amon chik pe, k'ari' xusik'ij chuwech ri rey y chikiwech konojel achi'a' ri k'o kiq'ij ri ek'o-apo chiri'.

²²Pa beleje' ik' chire ri juna' ri', pa taq ruq'ijul ri job, jari' toq ri rey k'o chiri' pa jay richin tew y chiri' tz'uyul-apo chunaqaj jun bojo'y ri k'o q'aq' chupan.

²³Y xbanatej k'a chi toq ri Jehudí xusik'ij yan juba' chire ri wuj ri', jari' toq ri rey najin chuqupixik rik'in ri qupibel richin ri tz'ibanel, k'ari' nuya-qa chupan ri bojo'y ri k'o q'aq' chupan, keri' xuben k'a toq xuk'is na ruporoxik ri boton wuj ri'.

²⁴Y stape' ri Elnatán, ri Delaías y ri Guemarías xkik'utuj utzil chire ri rey chi man tuporoj ri wuj, rija' kan man xunimaj ta kitzij. Y man xkik'en ta k'a rukiy y man xkiretz ta k'a ri kitziaq chikij retal richin yebison, ni ri rey, ni konojel ri aj-raqen ri xkak'axaj ronojel ri xusik'ij ri Baruc.

²⁶Ri rey xroyoj ri Jerahmeel ri ruk'ajol, ri Seraías ruk'ajol ri Azriel y ri Selemías ruk'ajol ri Abdeel y xeruteq richin chi yekichop ri Jeremías y ri Baruc ri rutz'ibanel. Jak'a ri Jehová xa xerewaj chikiwech ri e etzelanel kichin.

²⁷Toq ri rey xuk'et yan ri boton wuj, ri achoq chupan tz'iban-wi ronojel, ri Jehová xch'on chik k'a pe wik'in y xubij chuwe:

²⁸Tabek'ama' chik pe jun boton wuj y tatz'ibaj chik jun bey chupan achi'el ri xatz'ibaj pa nabey, ri xuk'et ri Joaquim.

²⁹Y chuqa' tabij chire chi kere' nubij ri Jehová: Rat xak'et re jun re' y xabij: ¿Achike roma xatz'ibaj chupan ri wuj ri' ri nubij chi xtipe ri rey richin Babilonia y xtiberuk'isa' re ruwach'ulew re' y xtuben chi man jun chik xtik'oje' kan chupan, ni winaqi', ni ri chikopi'?, xacha'.

³⁰Roma ri' kere' ninbij pan awi' rat Joaquim: Man jun chike ri awijatzul ri xtik'oje' kan pa rutz'uyubal ri David. Y toq xkaken, ri ach'akul xtili'e' kan chuwech ri q'ij y chuwa-raxq'ab ri niqaqa chi'aq'a'.

³¹Y kan xtinya' rutojbalil ri itzel taq abanobal, rat y ri kibanobal ri awijatzul, ri aj-raqen, ri aj-Jerusalem y pa kiwi' ri ch'aqa' chik winaqi' aj-Judá. Ronojel ri man utz ta rutzijol ri xinya' yan chiwe, kan qitzij chi xtibanatej, xcha' ri Jehová.

³²K'ari' xinbenk'ama' chik pe jun boton wuj y xinya' chire ri Baruc ri nutz'ibanel. Y rija' xutz'ibaj chupan ri wuj ronojel ri ninbij chire richin xutz'ibaj chupan ri jun chik wuj, ruk'exel ri xuporoj ri Joaquim rey richin Judá y chuqa' xutz'ibaj chik el ch'aqa' ch'abel chupan.