Read Kaqchikel Jer 38 Bible Online

Jer 38 - Kaqchikel bible

Jer 38

¹Y ri Sefatías ruk'ajol ri Matán, ri Guedalías ruk'ajol ri Pashur, ri Jucal ruk'ajol ri Selemías y ri jun chik Pashur ruk'ajol ri Malquías xkak'axaj ri ninbij chike konojel ri winaqi' toq xinbij chi

²ri Jehová nubij chi ri wineq ri xtikanej kan chupan re tinamit re' xtiken chi espada o rik'in wayjal, o yabil. Jak'a ri xtujech-ri' pa kiq'a' ri aj-Babilonia kan xtik'ase'.

³Chuqa' yin xinbij chi ri Jehová nubij chi re tinamit re' xtijach pa kiq'a' ri aj-labal ri e richin Babilonia y kan xtok k'a kichin rije'.

⁴Y ri aj-raqen xkibij chire ri rey: ¡Tikamisex re achin re'!, roma rik'in re ch'abel re nubij, nuben chike ri juba' aj-labal ri k'a ek'o kan, chi nikimalij kik'u'x y keri' chuqa' nuben chike ri winaqi' ri ek'o kan chiri' pa tinamit, roma re achin re' man ja ta ri utz nukanoj pa ruwi' re tinamit re', xa ja ri itzel ri nukanoj!, xecha'.

⁵Y ri rey Sedequías xubij chike chi tikibana' ri niqa' chikiwech rije' roma pa kiq'a' k'o-wi, jak'a rija' man jun nitikir nuben kik'in rije'.

⁶Xeri' ri achi'a' ri' xinkichop richin xinkiya-qa pa jul ri k'o pa rachoch ri Malquías ruk'ajol ri rey, ri k'o chiri' chuwa-jay ri akuchi yechajin-wi. Rik'in k'a kolo' xinkiqasaj-qa pa jul y ri jul ri' xa maneq k'a ya' chupan; xa ch'abeq ri k'o chupan y yin xisoboso-qa chupan ri ch'abeq ri'.

⁷K'o k'a jun achin aj-Etiopía, rubini'an Ebed-mélec, jun chike ri aj-raqen chiri' pa rachoch ri rey, xrak'axaj k'a chi yin xiya'ox-qa chiri' pa jul. Y ri rey k'o pa jun molojri'il chiri' akuchi ye'el-ye'ok-wi pan okibel richin ri Benjamín.

⁸K'ari' ri Ebed-mélec xapon akuchi k'o-wi ri rey y xubij chire:

⁹Rat rey ri wajaw, re achi'a' re' man utz ta xkiben rik'in ri Jeremías, roma kan xkiya-qa chiri' pa jul. Y chiri' xtiken-wi roma wayjal, roma maneq chik kaxlan-wey pa qatinamit, xcha' chire.

¹⁰Xeri' ri rey xuteq-el ri Ebed-mélec y xubij-el chire chi keruk'uaj-el e juwineq lajuj achi'a' richin yinkelesaj-pe chupan ri jul richin man yiken ta qa chiri'.

¹¹K'ari' ri Ebed-mélec xeruk'uaj-el ri e juwineq lajuj achi'a' ri' y xok-ok chiri' pa rachoch ri rey ri k'o qa pa xulan chire ri rachoch ri akuchi k'o-wi ri yakonabel. Y chiri' xuk'en k'a el tzia'q taq tzieq y xuya-qa chutza'n kolo' chuwe.

¹²Y xubij-qa chuwe chi tinya' k'a pe re tzieq re' pa nuk'alk'a'x richin chi ri kolo' man yirusok ta. Y yin kan keri' xinben.

¹³Keri' rubanik toq xinkelesaj k'a pe rik'in kolo' ri chiri' pa jul y k'ari' xinkiya' kan ri chiri' chuwa-jay akuchi k'o-wi ri cárcel.

¹⁴K'ari' ri rey Sedequías xuteq nuk'amik y xuben chi xinapon k'a akuchi k'o-wi rija', chiri' pa rox okibel richin ri rachoch ri Jehová. Y xubij chuwe: Yin k'o jun ri ninwajo' nink'utuj chawe y kan ninwajo' chi ronojel nabij chuwe y man jun nawewaj chinuwech, xcha'.

¹⁵Y yin xinbij chire: Wi ninq'alajirisaj chawech, rat nateq rubixik chi yikamisex; y wi yatinpixabaj, man nanimaj ta ri ninbij chawe, xicha' chire.

¹⁶K'ari' ri rey Sedequías xuya' rutzij pan ewel chuwe y xubij: Ninjikiba' nutzij chuwech ri Jehová ri xya'on ri qak'aslen chi man xtinteq ta akamisaxik y man xkatinjech ta pa kiq'a' ri nikajo' yatkikamisaj, xcha'.

¹⁷Jari' toq xinbij chire ri rey: Ri Jehová k'iytisanel richin ronojel, ri Dios richin Israel nubij: Wi rat najech-awi' pa kiq'a' ri aj-Babilonia, xtakol ri ak'aslen y re tinamit re' man xtiporox ta. Keri' xkak'ase' rat y ri aj pan awachoch.

¹⁸Jak'a wi man najech ta awi', re tinamit re' xtijach pa kiq'a' rije' y xtikiporoj y rat man xkakolotej ta kan pa kiq'a', xicha' chire.

¹⁹K'ari' ri rey Sedequías xubij chuwe chi rija' nuxibij-ri' chikiwech ri aj-Judá, ri xeq'ax-apo kik'in ri aj-Babilonia y wi xtujech-ri' pa kiq'a', rije' kan xtikich'ey janila.

²⁰Y yin xinbij chire: Ni, wi rat xtajech-awi' pa kiq'a' ri aj-Babilonia, rije' man xkatkijech ta pa kiq'a' ri qawinaq. Roma ri' wakami tabana' utzil tawak'axaj ri ruch'abel ri Jehová ri xtinbenbij chawe, richin utz xkatel y xtakol ri ak'aslen.

²¹Jak'a ri Jehová xuk'ut yan chinuwech ri xtibebanatej wi rat man nawajo' ta xtajech-awi'.

²²Konojel k'a ri ixoqi' ri xkekanej kan pan awachoch xkejach-el chike ri aj-raqen aj-Babilonia. Y chupan ri q'ij ri' ri ixoqi' xtikibij chawe: Ri awachibil ri xakuquba' ak'u'x kik'in xa xatkiq'ol y xatkik'uaj pa jun chik bey. Xa xkiya' q'ij richin eqal-eqal xasoboso-qa pa ch'abeq y kan man xatkito' ta chik, xkecha' chawe.

²³Chuqa' ri awixjayilal y ri awalk'ual xkejach pa kiq'a' ri aj-Babilonia.Y rat man xtakol ta kan awi', xa kan xkatzaq k'a pa ruq'a' ri Nabucodonosor. Y re tinamit re' kan xtiya'ox ruq'aq'al, xicha' chire.

²⁴K'ari' ri rey Sedequías xubij chuwe: Wi rat nawajo' ri ak'aslen, man jun achoq chire xtabij-wi re'.

²⁵Rik'in juba' ri aj-raqen xtikak'axaj chi yin xich'on awik'in y xkepe awik'in y xtikibij chawe: Tabij chiqe achike xatzijoj rik'in ri rey y tabij chiqe achike xubij rija' chawe, man tawewaj chiqawech y man xkatqakamisaj ta, xkecha' chawe.

²⁶Wi keri', xtabij chi xaxe xak'utuj utzil chuwe richin man yatink'uaj ta chik pa rachoch ri Jonatán richin chi man chiri' ta yaken-wi, xcha' chuwe.

²⁷Y kan xech'on na wi konojel ri e aj-raqen wik'in y xkik'utuj chuwe achike xqatzijoj rik'in ri rey. Jak'a yin xaxe xinbij chike ri xubij ri rey chuwe richin ninbij. K'ari' xinkiya' kan; roma toq roj xojtzijon kan man jun xojak'axan.

²⁸Y yin xik'oje' chiri' chuwa-jay, k'a ja ri q'ij toq xch'akatej ri Jerusalem.