Read Kaqchikel Jer 39 Bible Online

Jer 39 - Kaqchikel bible

Jer 39

¹Chupan k'a ri lajuj ik' chire ri beleje' juna' richin ri q'atbel-tzij richin ri rey Sedequías pa ruwi' ri Judá, ri Nabucodonosor rey richin Babilonia, e rachibilan-pe ri aj-labal xepe richin xokisutij-rij ri tinamit Jerusalem.

²Chupan ri juna' julajuj chire ri rukaj ik', chire ri q'ij beleje', toq niq'aton-tzij ri rey Sedequías, jari' toq ri aj-Babilonia xkijeq jun bey chiri' chupan ri tz'aq.

³Xeri' xe'apon ri aj-raqen pa kiwi' ri aj-labal richin ri rey aj-Babilonia y je kibi' re': Ri Nergal-sarézer aj-Samgar, ri Sarsequim y ri ch'aqa' chik aj-raqen. Konojel rije' xek'oje' chiri' chunaqaj ri okibel richin ri tinamit ri k'o pa nik'aj chire ri tz'aq.

⁴Toq ri rey Sedequías y ri aj-labal xkitz'et ri xkiben ri aj-Babilonia, jari' toq xe'animej ri chi'aq'a' ri' chupan ri bey ri akuchi tikon-wi kotz'i'j richin ri rey, chupan ri okibel ri k'o chukojol ka'i' tz'aq. Y choj xebe chupan ri bey ri napon pa taq'aj chuchi' ri raqen-ya' Jordán.

⁵Jak'a ri aj-labal richin Babilonia xekitzeqelibej y xebekiq'i' ri Sedequías pa taq'aj richin Jericó. Xkichop y xkik'uaj-q'anej pa tinamit Riblá ri k'o pa ruwach'ulew Hamat, akuchi k'o-wi ri Nabucodonosor. Y chiri' xuq'et-tzij pa ruwi' ri Sedequías.

⁶Y ri Nabucodonosor xuteq kikamisaxik ri e ruk'ajol ri Sedequías, chiri' chuwech rija'. Keri' chuqa' xuben kik'in konojel ri aj-raqen ri e richin Judá.

⁷Y xuteq rubixik chi telesex runaq' taq ruwech ri Sedequías. Xuxim-el rik'in cadena ri banon rik'in q'enq'oj-pueq y xuk'uaj-el pa Babilonia.

⁸Y ri ch'aqa' chik aj-Babilonia xkiya' kan ruq'aq'al ri rachoch ri rey chiri' pa Jerusalem y chuqa' ri ch'aqa' chik jay ri ek'o pa tinamit y xkiwulaj ri tz'aq richin ri tinamit ri'.

⁹Y ri Nebuzaradán ri k'o pa kiwi' ri aj-labal, xeruk'uaj-el pa Babilonia ri winaqi' ri k'a ek'o kan chupan ri tinamit, chuqa' ri winaqi' ri xkijech-ki' pa kiq'a' rije' y xeruk'uaj-el chuqa' konojel winaqi' richin ri ruwach'ulew.

¹⁰Xaxe k'a xeruya' kan pa ruwach'ulew Judá jujun chike ri winaqi' ri man jun ok k'o kik'in y xuya' ulew chike ri tikon chik uva chuwech y ulew richin jalajoj kiwech tiko'n.

¹¹Ri Nabucodonosor rey richin Babilonia, xubij k'a chire ri Nebuzaradán pa ruwi' ri Jeremías y xubij:

¹²Tak'uaj-el y tachajij jebel y man jun k'a itzel xtaben chire, xa kan taya' k'a chire ronojel ri nuk'utuj chawe, xcha' chire.

¹³K'ari' ri Nebuzaradán rachibilan ri Nebusazbán, ri Nergal-sarézer y ri ch'aqa' chik aj-raqen aj-Babilonia,

¹⁴xkiteq welesaxik chiri' chuwa-jay ri akuchi k'o-wi ri cárcel, k'ari' xinkijech kan chire ri Guedalías ruk'ajol ri Ahicam, rumam ri Safán, richin yiruk'uaj-el pa wachoch. Y keri' xik'oje' chikikojol ri nuwinaq.

¹⁵Ri Jehová xch'on k'a pe wik'in toq k'a ink'o na chuwa-jay ri akuchi k'o-wi ri cárcel y xubij chuwe:

¹⁶Kabiyin richin yabech'on rik'in ri Ebed-mélec ri aj-Etiopía y tabij chire: Kere' nubij ri Jehová k'iytisanel richin ronojel, ri Dios richin Israel: Re wakami yin xtinben ri nubin pa ruwi' re tinamit re' chi xtinya' ruk'ayewal pa ruwi', y man richin ta ri utz. Y ri q'ij ri richin ri ruk'ayewal ri' chawech k'a rat xtibanatej-wi.

¹⁷Jak'a yin chupan ri q'ij ri', xkatinkol chuwech ronojel y keri' kan man xkaqaqa ta pa kiq'a' ri achoq chuwech janila naxibij-awi'.

¹⁸Yin kan xkatinkol richin chi man xkakamisex ta, roma xakuquba' ak'u'x wik'in. Kere' nubij ri Jehová, xicha' chire.