Read Kaqchikel Jer 4 Bible Online

Jer 4 - Kaqchikel bible

Jer 4

¹Yin Jehová kere' ninbij: Rix nuwinaq israelita, wi ta niwajo' nitzolin-pe ik'u'x, titzolin k'a pe ik'u'x wik'in yin. Tiwelesaj k'a el chi'ikojol ri wachibel ri kan man utz ta nintz'et y kan man tijech'ej chik el iwi' wik'in yin.

²Y wi rix niya' itzij pa nubi' yin rik'in qitzijri'il y ruchojmilal. Jari' toq yin xtinya' urtisanik y ruwaq'ijaj pa kiwi' ch'aqa' chik ruwach'ulew iwoma rix.

³Yin ninbij chiwe rix aj-Judá y aj-Jerusalem: Man tikowirisaj ri iwánima achi'el ri ulew ri man jun bey samajin y k'o k'ix chupan.

⁴Titzolij-iwi' chiwij y tibana' chuwe richin chi ja yin ri iwajaw. Tiya' k'a pan iwánima ri retal richin ri nujikibel-tzij. Man xa rik'in juba', roma ri itzel taq ibanobal ri ye'ibanala', ri woyowal kan nibejinijo-pe achi'el q'aq', ri man jun nitikir nichupun.

⁵Tiya' k'a rutzijol pa tinamit Jerusalem y pa ruwach'ulew Judá. Tixupuj k'a ri trompeta richin niya' rutzijol chupan ri ruwach'ulew. ¡Kan kow k'a tiraqa' ichi'! y tibij: ¡Tiqamolo-qi' y qojok chiri' pa tinamit richin tobel!

⁶Tiyaka-q'anej jun tzieq retal richin yixanimej pa tinamit Sión. Tikanoj ri akuchi nito-wi-iwi' y man kixpa'e-qa, roma yin k'a kela' pa xaman xtinbentaqa-pe nimalej taq ruk'ayewal y wululen.

⁷Ri nik'ison kichin ri tzobaj winaqi' ruchapon chik pe bey, achi'el jun koj ri xel yan pe pa rusok. Y rija' noruk'isa' ri iruwach'ulew richin chi nuben kan tz'iran chire y richin nuwulaj kan ronojel.

⁸Roma ri' tikusaj k'a tzieq richin bis. Kixoq' y kixjilon roma ri q'axo'n, roma ri Jehová man relesan ta ri nimalej royowal chiqij.

⁹Yin Jehová ninbij chi toq xtapon ri q'ij ri', ri e rey y ri e aj-raqen xkebaybot roma xibinri'il. Chuqa' ri e sacerdote y ri e q'alajirisey nuch'abel janila xtikixibij-ki', xcha' ri Dios.

¹⁰Jari' toq yin xinbij: ¡Ajaw, Jehová! rat xa xaq'ol re atinamit Jerusalem, roma xabij: Chi xtik'oje' uxlanibel-k'u'x iwik'in, rokik ojk'o pa ruk'ayewal, xicha'.

¹¹Y toq xtapon ri q'ij ri', xtibix chire ri tinamit Jerusalem: Jun nimalej meq'en kaq'iq' ri peteneq pa tz'iran ruwach'ulew nuxupuj-pe pa ruchojmilal ri nutinamit. Y man ja ta kaq'iq' ri' ri nik'atzin richin nijosq'ix ri trigo.

¹²Ri kaq'iq' ri xtinteq-pe yin kan más k'a ruchuq'a' y rik'in ri' xtinq'et-tzij pa kiwi' rije'.

¹³Titz'eta' ri e etzelanel iwichin xenaqajub yan pe achi'el ri sutz' y ri ki-carruaje ri e richin oyowal e achi'el nimalej kaq'iq'. Ri kikiej kan tijumin e peteneq achi'el nuben jun kot toq k'o nuchop. Jari' toq rix xtibij: ¡Toq'ex k'a qawech roj ri kan xojk'is yan, xkixcha'!

¹⁴Winaqi' richin Jerusalem, tich'ajch'ojirisaj k'a ri iwánima richin xkixkolotej. Tiya' kan ri itzel taq ich'obonik,

¹⁵roma peteneq itzelej rutzijol chupan chijun ri ruwach'ulew Israel, nitiker-el rik'in ri Dan y napon k'a chuwi' taq juyu' richin Efraín.

¹⁶Tiya' rutzijol chike ri tzobaj winaqi' richin ch'aqa' chik ruwach'ulew; y kere' chuqa' tibix chiri' pa Jerusalem: E peteneq e etzelanel kichin ri nej yepe-wi y nikireq kichi' rik'in koyowal chikij ri tinamit richin Judá. Xtisutix-kij ri itinamit, achi'el nichajix jun juyu', roma xixyakatej chuwij yin. Yin Jehová ri yibin.

¹⁸Ri itzel ibey y ri itzel taq ibanobal, jari' ri nibanon chiwe richin kere' xtik'uluwachij. Roma ri imak xtiqaqa re jun ruk'ayewal re' pan iwi'. Janila ruk'ayewal, roma kan xapon k'a pan iwánima, xcha' ri Dios.

¹⁹Y yin Jeremías xinbij: Ri wánima janila nitino y niq'axon. Nuyitz'itz'ej-ri' nupan y man yitikir ta ninq'et rik'in ri jiloj roma xinwak'axaj jun raqoj-chi'ij richin labal y nixupux ri trompeta.

²⁰Beneq k'a ruwech k'o rutzijol richin chi peteneq wululen chirij chijun re qaruwach'ulew. Chaq k'ate' xtiyoj kan ri akuchi ojk'o-wi-qa. Chuqa' chaq k'ate' xkewulex k'a ri taq qachoch ri e banon rik'in tzieq.

²¹¿K'a janipe' k'a yitane' richin chaq xtintz'et ri tzieq ruk'exewach ri ruwach'ulew y chuqa' k'a janipe' k'a ninwak'axaj ri trompeta?

²²Ri nuwinaq kan maneq kina'oj, man ketaman ta nuwech. Kan e alk'ualaxela' ri maneq ketamabal y kan man jun niq'ax chikiwech. Kan janila e nowineq richin nikiben etzelal, jak'a man ketaman ta nikiben ri utz.

²³Xintzu' k'a ri ruwach'ulew y xintz'et chi maneq chi ruchojmilal y man jun chik k'o chuwech. Xitzu'un k'a chikaj y man jun k'a saqil k'o.

²⁴Toq xintz'et ri nima'q taq juyu', rije' kan yebaybot y konojel ri ch'uti'n ruwi' taq juyu' kan yek'ark'ot.

²⁵Toq xinnabej, xa man jun chik wineq k'o chiri' y konojel ri aj-xik' taq chikopi' xa xe'animajlan yan el.

²⁶Chuqa' xintz'et chi ronojel ri qasanbel-ulew, ri jebel tiko'n nuya', xe'ok tz'iran. Ronojel tinamit e wulatejineq chik kan, roma ri royowal ri Jehová.

²⁷Ri Jehová xubij: Chijun ri ruwach'ulew xtitole' kan, stape' man xtink'is ta jumul.

²⁸Y roma ri wululen ri', ri ruwach'ulew xtik'oje' pa bis y ri kaj kan xtiq'equmer ruwech. Roma xinbij, xinch'ob y man xtintzolij ta wi' chuwij, kan man xtinjel ta chik ri nuch'obonik.

²⁹Konojel ri winaqi' richin ri ruwach'ulew ye'animej chuwech ri raqoj-chi'ij kichin ri achi'a' e beneq chirij kiej y chikiwech ri achi'a' ch'abnela'. Ri winaqi' ri' nibekewaj-ki' pa taq q'ayis ri janila q'equ'm rupan y yejote-q'anej pa ruwi' nima'q taq abej. Konojel k'a ri tinamit kan xetole' kan y kan man jun chik xk'ase' kan chiri'.

³⁰Y rix ri yixk'is yan, ¿achike k'a xtiben? Stape' niwiq-iwi' rik'in keq tzieq y niwiq-iwi' rik'in wiqobel ri banon rik'in q'anapueq, stape' chuqa' niya' aq'om chuchi' runaq' taq iwech, xa man jun nuq'ajuj ri keri' niben. Ri ye'ajowan iwichin xa man xkixkajo' ta chik; ri nikajo' rije' ja ri nikelesaj ik'aslen.

³¹Roma xinwak'axaj jun raqoj-chi'ij richin q'axo'n, achi'el richin jun ixoq ri nalex yan ri nabey ti ral. Ri raqoj-chi'ij ri' kichin ri ri winaqi' richin tinamit Sión, ri nijilon y nuya-apo ruq'a' y nubij: Toq'ex qawech roj, roma ri qánima nimayamo' chikiwech ri kamisanela', xkixcha'.