Read Kaqchikel Jer 40 Bible Online

Jer 40 - Kaqchikel bible

Jer 40

¹Toq xch'akatej yan ri Jerusalem, yin kan in ximon k'a rik'in cadena chikikojol ri nuwinaq aj-Judá richin yojuk'uex yan el pa Babilonia. Y chiri' pa tinamit Ramá xapon ri Nebuzaradán aj-raqen pa kiwi' ri aj-labal. Jari' toq xiril y xirukol kan. Y jari' toq ri Jehová xch'on wik'in.

²Y ri Nebuzaradán xubij chuwe: Ri Jehová ri a-Dios xubij yan re jun ruk'ayewal re' pa ruwi' re aruwach'ulew.

³Y kan xuben achi'el xubij, roma rix xixmakun chuwech y man xiwak'axaj ta ri xubij chiwe. Roma ri' xpe re ruk'ayewal re' pan iwi' rix.

⁴Wakami yin ninwelesaj ri cadena ri achoq ik'in ximon-wi ri aq'a'. Wi rat nawajo' yabe chuwij pa Babilonia. Jo' y yin xkatinchajij y wi rat man nawajo' ta yabe, kak'oje' k'a kan. Re ruwach'ulew re' k'o chawech rat, kabiyin ri akuchi niqa' chawech y utz nana' yak'oje', xcha' chuwe.

⁵Jak'a toq xinpiskolij-wi' richin yibe, rija' xubij chik chuwe: Wi más niqa' chawech yakanej kan, más utz katzolin rik'in ri Guedalías ri ruk'ajol ri Ahicam y rumam ri Safán, roma ri rey richin Babilonia xuya' kan richin nuq'et-tzij pa kiwi' ri tinamit richin Judá. Y roma ri' kak'oje' kan rik'in rija' y kik'in ri awinaq. Kabiyin akuchi ri más niqa' chawech rat, xcha'. Xeri' ri Nebuzaradán xuya-el sipanik chuwe y ri nik'atzin chuwe y xuya-el q'ij richin xibe.

⁶K'ari' yin xipe rik'in ri Guedalías chiri' pa Mispá y xik'oje' k'a kik'in ri winaqi' aj-Judá ri man xe'uk'uex ta el pa Babilonia.

⁷Toq ri aj-raqen kichin ri achi'a' ri kitalun-ki' pa k'echelaj xkak'axaj chi ri rey richin Babilonia xuya' kan ri Guedalías pa ruwi' ri ruwach'ulew richin nuq'et-tzij y chuqa' xujech kan pa ruq'a' rija' konojel winaqi' y ri winaqi' ri man jun ok k'o kik'in ri ek'o chiri', ri man xe'uk'uex ta el pa Babilonia,

⁸jari' toq xebe rik'in rija' pa Mispá. Y ri xe'apon rik'in ri Guedalías ja ri Ismael ruk'ajol ri Netanías, ri Johanán y ri Jonatán e ruk'ajol ri Caréah, ri Seraías ruk'ajol ri Tanhúmet, ri e ruk'ajol ri Efai ri aj-Netofá y ri Jezanías ruk'ajol jun achin aj-Maacat. Xe'apon k'a konojel rije' y ri e aj-labal.

⁹K'ari' ri Guedalías xuya' rutzij chike rije' y xubij: Man tixibij-iwi' richin ye'iwilij ri aj-Babilonia. Kixk'ase' k'a wawe' chupan re qaruwach'ulew y tisamajij ri rey richin Babilonia richin utz xkixbe.

¹⁰Y yin xkik'ase' re wawe' pa Mispá richin yenk'ul-apo ri aj-Babilonia ri xkepe qik'in. Jak'a rix tiwuxu' ri uva y tibana' vino chire. Chuqa' tiwuxu' ruwech taq che' richin yetij y ri aceite. Ke'iyaka' kan jebel pa taq yakonabel y kixk'oje' k'a chiri' pa taq tinamit ri akuchi xkixk'oje-wi, xcha' chike.

¹¹Toq ri aj-Babilonia kichapon oyowal, jari' toq ch'aqa' chike ri winaqi' aj-Judá xe'animej-el. Jujun chike rije' xebe pa ruwach'ulew Moab, ri Amón y ri Edom. Y toq xkak'axaj chi ri rey richin Babilonia xeruya' kan jujun winaqi' pa Judá y ja ri Guedalías ri xk'oje' kan pa kiwi', jari' toq

¹²konojel rije' xetzolin-pe ri akuchi e talutajineq-wi y xe'apon rik'in ri Guedalías pa Mispá. Y rije' xkiwux k'a ri uva y k'iy ruwech taq che' richin yetij.

¹³Y ri Johanán ruk'ajol ri Caréah y konojel ri aj-raqen pa kiwi' ri aj-labal ri e kitalun-ki' pa k'echelaj, xepe rik'in ri Guedalías chiri' pa Mispá.

¹⁴Y xkibij k'a chire: ¿Man awetaman ta k'a chi ri Baalís rey pa kiwi' ri aj-Amón xuteq-pe ri Ismael ruk'ajol ri Netanías richin yarukamisaj?, xecha'. Jak'a ri Guedalías man xerunimaj ta.

¹⁵K'ari' ri Johanán xch'on pan ewel rik'in ri Guedalías y xubij chire: Taya' q'ij chuwe richin ninbenkamisaj kan ri Ismael y man jun xtetaman. ¿Achike ta k'a roma xkarukamisaj? roma wi keri', konojel ri winaqi' aj-Judá ri xkimol-pe-ki', xtikitaluj chik el ki' y keri' ri winaqi' aj-Judá xkek'is.

¹⁶Jak'a ri Guedalías xubij chire ri Johanán chi man tuben keri', roma ri nubij chirij ri Ismael xa man qitzij ta.