Read Kaqchikel Jer 41 Bible Online

Jer 41 - Kaqchikel bible

Jer 41

¹Jak'a chupan ri ik' wuqu', ri Ismael ruk'ajol ri Netanías y rumam ri Elisamá, jun chike ri rijatzul kan ri David, e rachibilan e lajuj aj-labal, xe'apon rik'in ri Guedalías chiri' pa Mispá y xewa' rik'in. Y rokik k'a yewa',

²ri Ismael y ri e lajuj achi'a' ri e rachibilan-el, xeyakatej y xkikamisaj k'a chi espada ri Guedalías. Y keri' xkikamisaj ri q'atoy-tzij pa ruwi' ri Judá, ri rucha'on kan ri rey richin Babilonia.

³Keri' chuqa' ri Ismael xerukamisaj kan ri winaqi' ri yewa' rik'in y chuqa' ri aj-labal aj-Babilonia ri e ya'on kan rik'in ri Guedalías ri chiri' pa Mispá.

⁴Pa ruka'n q'ij toq xkamisex yan ri Guedalías y toq k'a man jajun etamayon chirij ri',

⁵xe'apon k'a jumuch' achi'a' ri e peteneq pa Siquem, pa Siló y pa Samaria. Y rije' kan kisokan k'a pe ri rusumal-kichi', kikusan-pe tzeretzeq kitziaq y ri kich'akul nojineq chi sokotajik ri ja rije' e banayon-qa; re' retal richin bis. Chuqa' kik'amon-pe jalajoj ruwech ixin y pom richin nikisuj chuwech ri Jehová chiri' pa rachoch pa Jerusalem.

⁶K'ari' ri Ismael xel-pe ri chiri' pa Mispá richin xeberuk'ulu'. Y rija' kan noq' beneq pa bey. Y toq xkik'ul-ki', xubij chike: Kixanpe richin no'itz'eta' kan ri Guedalías.

⁷Y toq xe'apon pa tinamit, ri Ismael y ri achi'a' ri e beneq rik'in xekikamisaj y xekiya' pa jun jul.

⁸Jak'a chikikojol ri achi'a' ri', ek'o e lajuj ri xkibij chire ri Ismael chi man kerukamisaj, roma rije' kewan kan trigo chiri' pa juyu', chuqa' cebada, aceite y kab ri nikiya' taq chikopi'. Roma ri' ri Ismael xutzolij-ri' chirij y man xerukamisaj ta chik, achi'el xuben chike ri ch'aqa'.

⁹Y ri jul ri akuchi xeruya-wi ri kich'akul ri kaminaqi' ri xerukamisaj ri Ismael, ja jul ri' ri xuben ri rey Asá ojer kan, richin xuto-ri' chuwech ri Baasá, rey richin ri tinamit Israel. Jak'a ri Ismael kan xnojisaj chi kaminaqi'.

¹⁰Chuqa' rija' xeruk'uaj-el ri e rumi'al kan ri rey y ri winaqi' ri ek'o kan chiri'. Y re winaqi' re' e jachon kan pa ruq'a' ri Guedalías roma ri Nebuzaradán, richin yeruchajij. Y ri Ismael xeruxim richin xeruk'uaj-el pa ruwach'ulew kan ri Amón.

¹¹K'ari' ri Johanán y konojel ri aj-raqen ri ek'o rik'in rija' xkak'axaj ronojel ri itzel ri xuben ri Ismael.

¹²Jari' toq rije' xekimol konojel ri achi'a' y xebe richin xbekibana' oyowal rik'in ri Ismael. Y xbekila' chunaqaj ri yakbel-ya' ri k'o pa tinamit Gabaón.

¹³Y ri winaqi' ri e ximon-el ri e ruk'uan-el ri Ismael, toq xkitz'et ri Johanán y ri ruwinaq e peteneq, rije' janila xekikot.

¹⁴K'ari' konojel rije' xetzolin chikij y xeq'ax rik'in ri Johanán.

¹⁵Jak'a ri Ismael y waqxaqi' chike ri rachibil xa xe'animej-el chuwech ri Johanán y xbekewaj-ki' pa ruruwach'ulew kan ri Amón.

¹⁶K'ari' ri Johanán y konojel ri aj-raqen pa kiwi' ri aj-labal ri e beneq rik'in, xekik'uaj-el konojel winaqi' ri xeruk'uaj-el ri Ismael, toq xukamisaj yan kan ri Guedalías. Xeruk'uaj k'a el ri aj-labal, ri ixoqi', ri ak'uala' y ri e aj-raqen ri xeruk'en-pe pa Gabaón,

¹⁷richin choj yebe pan Egipto. Y xe'uxlan-qa juba' chiri' pa tinamit Guerut-quimam, ri k'o chunaqaj ri Belén.

¹⁸Rije' xe'animej chikiwech ri aj-Babilonia roma kan janila nikixibij-ki' chikiwech, roma ri Ismael xukamisaj ri Guedalías. Y ja ri rey richin Babilonia ri xya'on kan richin nuq'et-tzij pa ruwi' ri kiruwach'ulew Judá.