Read Kaqchikel Jer 42 Bible Online

Jer 42 - Kaqchikel bible

Jer 42

¹K'ari' konojel ri aj-raqen kichin ri aj-labal, ri Johanán, ri Azarías ruk'ajol ri Hosías y konojel ri winaqi' xejel-apo

²wik'in yin Jeremías y xkibij chuwe: Niqak'utuj utzil chawe, kach'on rik'in ri Jehová ri qa-Dios pa qavi' roj, ri xojkolotej kan, roma re wakami xa oj ka'i-oxi' chik ok, y ri rubanon-pe janila oj k'iy.

³Tak'utuj chire ri Jehová ri qa-Dios richin nuk'ut ri bey chiqawech ri akuchi yojbe-wi y ri k'atzinel chi niqaben, xecha'.

⁴K'ari' xinbij chike: Xinwak'axaj ri xibij, wakami k'a yich'on na rik'in ri Jehová ri qa-Dios, achi'el ri xibij chuwe. Ronojel ri xtubij-pe ri Jehová chuwe, kan xtinq'axaj chiwe rix y man jun k'a xtinwewaj chiwech, xicha' chike.

⁵K'ari' ri winaqi' xkibij chik chuwe: Ja ri Jehová ri xtiq'aton-tzij pa qawi', wi man niqaben ta ri xtubij-pe chawe richin niqaben roj.

⁶Utz o man utz ta ri xtubij-pe, roj kan xtiqanimaj rutzij ri Jehová ri qa-Dios, ri achoq ik'in xatqateq-wi richin chi utz yojbe y kan qitzij na wi xtiqanimaj rutzij ri Jehová ri qa-Dios, xecha'.

⁷Xk'uluwachitej k'a chi ri pa lajuj q'ij, ri Jehová xch'on-pe wik'in.

⁸Y yin xinwoyoj ri Johanán ruk'ajol ri Caréah, konojel ri aj-raqen ri ek'o pa kiwi' ri aj-labal y konojel ri winaqi' ri nitiker-el rik'in ri más ch'uti'n k'a rik'in ri más nim.

⁹Y xinbij chike: Kere' rubin ri Jehová ri qa-Dios richin Israel, ri achoq ik'in xiniteq-wi richin xink'utuj chire pan ibi' rix:

¹⁰Wi rix xkixk'oje-qa chupan re ruwach'ulew re', yin xtinpaba' chik q'anej y man jun bey chik xtinwulaj. Kan xkixinya' wawe' y man xkixinwelesaj ta el roma kan janila yibison roma kere' xinben chiwe.

¹¹Man tixibij-iwi' chuwech ri rey richin Babilonia, roma yin kan ink'o iwik'in richin yixinkol y yixinto' pa ruq'a'.

¹²Yin xtinjoyowaj iwech y xtinben chi rija' chuqa' xtujoyowaj iwech y xtuya' q'ij chiwe chi xkixtzolin pan iruwach'ulew. Kere' nubij ri Dios.

¹³Jak'a, wi rix man niwajo' ta yixk'oje' kan chupan re ruwach'ulew re' y xa man ninimaj ta rutzij ri Jehová ri qa-Dios,

¹⁴y nibij chi rix kan niwajo' yixk'oje' pa ruwach'ulew Egipto akuchi ri man xtitz'et ta chik oyowal, ni man xtiwak'axaj ta chik ri trompeta, ni man xkixken ta roma wayjal,

¹⁵roma ri' tiwak'axaj k'a ri ruch'abel ri Jehová, rix nuwinaq aj-Judá. Kere' nubij ri Jehová k'iytisanel richin ronojel, ri qa-Dios: Wi rix niwajo' yixbek'ase' pan Egipto,

¹⁶xtibanatej k'a chi ri labal y ri wayjal ri achoq chuwech janila nixibij-iwi', xtapon iwik'in chiri' y chiri' xkixken-wi.

¹⁷Keri' xtibanatej iwik'in rix ri yixajowan yixbe pan Egipto richin yixbek'oje' chiri', xkixken k'a chi espada, wayjal y nima-yabil y kan man jun k'a xtikolotej kan chuwech ri ruk'ayewal ri xtinya' pan iwi'.

¹⁸Kere' ninbij yin Jehová k'iytisanel richin ronojel: Xtinya' ruk'ayewal pan iwi' rix wi xkixbe pan Egipto, achi'el ri ruk'ayewal ri xinya' pa kiwi' ri winaqi' aj-Jerusalem. Y rix kan xkixok winaqi' ri xkixetzelex, xkixyojobex y iwoma rix ch'aqa' chik winaqi' xtisach kik'u'x. Y man jun bey chik xtitz'et re iruwach'ulew, xcha' ri Dios.

¹⁹Jare' ri rutzijol ri xuya' ri Jehová chiwe ri k'a ixk'o kan wawe' pa ruwach'ulew Judá. Xubij chiwe chi man kixbe pan Egipto. Kan toqaqa k'a chi'ik'u'x jebel ri xubij chiwe re wakami.

²⁰Rix xa iyon xiq'ol-qa-iwi', roma ja rix ri xixtaqon-el wichin richin xich'on rik'in ri Jehová ri qa-Dios y xibij chuwe: Tak'utuj utzil pa qawi' roj chire ri Jehová ri qa-Dios y ri xtubij chawe, rat xtabij chiqe y roj xtiqaben, xixcha' chuwe.

²¹Wakami yin xinq'alajirisaj chiwech, jak'a rix man ninimaj ta rutzij ri Jehová ri qa-Dios, ri xubij chuwe richin xinbij chiwe.

²²Roma ri' re wakami kan qitzij ninbij chiwe chi xkixken chi espada o rik'in wayjal o rik'in nima-yabil, chiri' akuchi nirayij yixbek'oje-wi, xicha' chike.