Read Kaqchikel Jer 43 Bible Online

Jer 43 - Kaqchikel bible

Jer 43

¹Xbanatej k'a toq xitane' yan qa chi ch'owen kik'in ri nuwinaq y kan xinbij yan ronojel ri xubij-pe ri Jehová chuwe,

²jari' toq ri Azarías ruk'ajol ri Hosaías y ri Johanán ruk'ajol ri Caréah y konojel ri achi'a' ri nima'q nikina-ki' xkibij chuwe: Ri nabij xa man qitzij ta. Ri Jehová ri qa-Dios man xubij ta pe chawe richin chi nabij chiqe chi man yojbe ta pan Egipto richin yojbek'oje' chiri'.

³Xa ja ri Baruc yataqchi'in richin yojaq'ol, xaxe richin chi yojajech pa kiq'a' ri aj-Babilonia, richin chi yojkikamisaj o yojkik'uaj-el, xecha'.

⁴Ni ri Johanán, ni ta ri aj-raqen kichin ri aj-labal, ni ta ri winaqi' ri k'a ek'o na kan chiri', man xkinimaj ta rutzij ri Jehová toq xubij chi kek'oje' kan chupan ri kiruwach'ulew.

⁵Ri Johanán y konojel ri aj-raqen xa xekimol k'a ri winaqi' ri ek'o pa Judá, ri xetzolin-pe pa taq ruwach'ulew ri akuchi e animajineq-wi-el, richin chi yebe pan Egipto.

⁶Chuqa' xeruk'uaj-el konojel winaqi' ri e jachon kan pa ruq'a' ri Guedalías y chuqa' ri e rumi'al ri rey. Chuqa' xuk'uaj-el ri Baruc y yin.

⁷Konojel rije' man xkinimaj ta rutzij ri Jehová y chiri' k'a pa tinamit Tafnes pa ruwach'ulew Egipto xojk'oje-wi-qa.

⁸Chiri' pa tinamit Tafnes ri Jehová xch'on wik'in y xubij chuwe chi

⁹tink'uaj-el ka'i-oxi' nima'q abej y chikiwech ri nuwinaq nink'ot-qa ri ruwa-jay y ninmuq kan ri abej ri', chiri' chuchi' ri rachoch ri rey richin Egipto.

¹⁰Y xubij chuwe chi tinbij: Kere' nubij ri Jehová k'iytisanel richin ronojel: Yin kan xtinben richin xtipe ri nusamajel Nabucodonosor, rey richin Babilonia. Y re wawe' rija' xtiberubana' rachoch y xtuya' ri rutz'uyubal pa ruwi' re abej re'.

¹¹Rija' xtipe richin xtoruya' ruk'ayewal pa ruwi' ri ruwach'ulew Egipto. Ri winaqi' ri k'o chi yeken, kan xkeken; ri xkebe pa ximonri'il, kan xkebe pa ximonri'il y ri xkekamisex chi espada, kan chi espada xkeken-wi.

¹²Y xtuya' ruq'aq'al ri kachoch ri e ki-dios ri aj-Egipto y xkeruk'uaj-el ri ruwachibel ri ki-dios ri ek'o kik'in. Xtuben kik'in ri aj-Egipto, achi'el nuben jun yuq'unel toq yerujunaj-el uk' chirij ri rutziaq. Chuqa' xkerupaxij ri pilar ri ek'o pa rachoch ri dios richin ri q'ij y xkeruporoj kan ri ch'aqa' chik kachoch ri e ki-dios. Y rik'in k'a uxlanibel-k'u'x ri Nabucodonosor xke'el-el wawe', roma kan man jun chik xtinaqo kichin, xcha' ri Dios.