Read Kaqchikel Jer 44 Bible Online

Jer 44 - Kaqchikel bible

Jer 44

¹Ri Dios xch'on chik wik'in richin ninya' re rutzijol re' chike ri nuwinaq ri ek'o wawe' pa ruwach'ulew Egipto chupan ri tinamit Migdol, Tafnes, Menfis y chike ri winaqi' ri ek'o-q'anej pa xokon chire ri ruwach'ulew, y xubij:

²Kere' ninbij yin Jehová k'iytisanel richin ronojel, ri i-Dios: Rix kan xitz'et ronojel ri ruk'ayewal ri xinteq-pe pa ruwi' ri Jerusalem y pa kiwi' konojel tinamit richin Judá. Y roma ri', re wakami kan man jun chik wineq k'o chiri' y kan xwuluwu' kan jumul,

³roma ri imak ri xiben richin xiyek woyowal. Roma kan xixbe richin xibesuju' pom y niyala' kiq'ij ch'aqa' chik dios ri xa man iwetaman ta kiwech, ni rix ni ri iwati't-imama'.

⁴Y beneq k'a ruwech xenteq ri nusamajela' ri e q'alajirisey nuch'abel, richin chi nikibij chiwe chi man ye'iben banobel ri kan man niqa' ta chinuwech y ri kan yenwixowaj yin.

⁵Jak'a rix xa man xinimaj ta nutzij, ni man xiniwak'axaj ta richin chi xitzolij ta iwi' chiwij rik'in ri imak. Chuqa' kan chaq xisuj pom chikiwech ri ch'aqa' chik dios.

⁶Roma ri' kan janila xyakatej woyowal y kan xinwelesaj woyowal pa ruwi' ri ruwach'ulew Judá y pa taq bey richin ri tinamit Jerusalem. Kan xwuluwu' y xtole' kan re tinamit re', k'a re wakami.

⁷Wakami kere' k'a ninbij yin Jehová k'iytisanel richin ronojel: ¿Achike k'a roma rix xik'en-pe re nimalej ruk'ayewal pan iwi' rix, richin chi niben chike chi yeken ri winaqi' aj-Judá: Ri ixoqi', ri achi'a', ri ak'uala' y ja jujun ri k'a juba' ke'alex, xaxe richin chi man jun nik'oje' kan chiri' pa Judá?

⁸Niben chi niyek woyowal rik'in ri xa iq'a' banayon. Chuqa' nisuj pom chikiwech ch'aqa' chik dios wawe' pa ruwach'ulew Egipto, ri akuchi xixok-wi richin chi yixk'ase'. Rix xa xkixk'is chi'iwonojel. Ri winaqi' xkeyojoben chiwij y xkixok richin k'ixbilal chikiwech konojel tzobaj taq winaqi' richin re ruwach'ulew.

⁹¿Kan ximestaj yan k'a ri itzel taq kibanobal ri iwati't-imama', ri kibanobal ri e rey richin Judá, ri kibanobal ri kixjayilal, ri itzel taq ibanobal rix y ri itzel taq kibanobal ri iwixjayilal ri xkiben pa ruwach'ulew Judá y pa taq bey richin Jerusalem?

¹⁰Rix k'a re wakami kan man iqasan ta k'a iwi', ni man jun rukiy chiwech, ni man itaqen ta achi'el ri nikibij ronojel pixa' ri xinya' chiwe rix y chike ri iwati't-imama'.

¹¹Roma ri' kere' ninbij yin Jehová k'iytisanel richin ronojel: Re wakami, yin ninben chi ninteq-pe ri ruk'ayewal pan iwi' y xkixink'is rix aj-Judá.

¹²Xtinben chiwe ri xixpe pan Egipto chi kan xkixink'is. Xkixtzaq chi espada y xkixken roma wayjal. Ri más ko'ol k'a ri más nim, kan xkixinkamisaj y xkixok ya'ol taq k'ix. Iwoma rix ri ch'aqa' chik winaqi' xtikixibij-ki' y chuqa' xtiqaqa itzel pan iwi'.

¹³Kan xtinya' k'a rutojbalil pan iwi' wawe' pan Egipto, achi'el ri rutojbalil ri xinya' pan iwi' chiri' pa Jerusalem. Xkixken chi espada, rik'in wayjal y yabil.

¹⁴Y ri juba' chike ri aj-Judá ri xebe pa ruwach'ulew Egipto richin yebek'oje' chiri', man jun k'a chiwe rix xtitikir xtanimej-el, ni man jun ri xtik'ase' ta kan richin nitzolin ta chik pan iruwach'ulew, stape' nrajo' nitzolin richin nibek'oje' chik chiri'. Ri xkebek'oje' chiri' xa kan xaxe chik k'a ok jujun ri xkekolotej chupan ri kamik, xcha' ri Dios.

¹⁵K'ari' konojel achi'a' ri ketaman chi ri kixjayilal xkisuj pom chike ch'aqa' chik dios y ri ixoqi' ri ek'o-apo chiri', konojel rije' kan janila e k'iy y chuqa' konojel ri winaqi' aj-Judá ri ek'o pa xokon chire ri Egipto xkibij chuwe:

¹⁶Roj man xtiqanimaj ta ronojel ri xabij chiqe pa rubi' ri Jehová.

¹⁷Y pa ruwi' ri' roj xa kan xtiqaben ri qach'obon chik. Kan xtiqasuj pom chuwech ri reina richin ri kaj. Chuqa' kan xtiqasuj vino chuwech, achi'el ri qabanon-pe y chuqa' achi'el kibanon-pe ri qate-qatata', ri qa-rey y ri e aj-raqen chupan ri tinamit Jerusalem y ri ch'aqa' chik tinamit richin ri Judá. Y toq xqaben keri', kan pa ruk'iyal ri qaway xk'oje'. Xojkikot y kan utz k'a oj beneq y kan man jun ruk'ayewal ri xpe pa qawi'.

¹⁸Jak'a toq man xqasuj ta chik pom y vino chuwech ri reina richin ri kaj, kan ronojel k'a xk'is chiqawech y chuqa' ri qawinaq kan yeken roma wayjal o yeken pa labal, xecha' chuwe.

¹⁹Y ri ixoqi' xkibij chuqa' chuwe: Toq roj niqasuj pom y niqatix vino pa ruwi' ri porobel richin niqaya' ruq'ij ri reina richin ri kaj, ronojel re' xqaben roma ri qachijilal kiya'on q'ij chiqe richin niqaben y chuqa' kan qabanon ponon kaxlan-wey achi'el ri ruwachibel rija', xecha' chuwe.

²⁰K'ari' yin xich'on kik'in ri winaqi' ri', ri xebin ri ch'abel ri' y xinbij:

²¹¿Nich'ob rix chi ri Jehová man nutz'et ta pe ri ibanobal ri ye'iben rix y ri xkiben ri iwati't-imama', ri i-rey y konojel winaqi' richin re tinamit toq nisuj pom chikiwech ch'aqa' chik dios, pa taq tinamit richin Judá y pa taq bey richin Jerusalem?

²²Jak'a ri Jehová man nukoch' ta chik ri itzel taq ibanobal ri ye'ibanala'. Roma ri' ri qaruwach'ulew wakami k'o pa wululen y man jun k'o chiri'. Kan xok k'a jun k'ambel-tzij richin qajineq itzel pa ruwi', y wakami kan nak'en rukiy toq natz'et.

²³Roma xixmakun chuwech ri Jehová y xisuj pom chikiwech ch'aqa' chik dios y man xinimaj ta ri xubij chiwe y man xitaqej ta ronojel pixa' ri ya'on chiwe, roma ri' xpe k'a re jun ruk'ayewal re' pan iwi' achi'el re wakami.

²⁴K'ari' ri Jeremías xubij chik chike konojel ri winaqi': Tiwak'axaj k'a ri ruch'abel ri Jehová, chi'iwonojel rix ri ix aj-Judá ri ixk'o pa ruwach'ulew Egipto.

²⁵Kere' k'a xubij ri Jehová k'iytisanel richin ronojel, ri qa-Dios: Rix y ri iwixjayilal, kan ja rix k'a xixbin chi k'o chi nisuj pom y vino chuwech ri reina richin ri kaj y kan k'o chi niben ri isujun. Y kan ja rix ri xixbanon. Wakami k'a kan tibana' ri ibin.

²⁶Roma ri' kan tiwak'axaj ri ruch'abel ri Jehová rix ri ixk'o pan Egipto ri ninbij yin chiwe: Kan nuya'on nutzij pa rubi' ri nimalej nubi', chi man xtinatex ta chik ri nubi' wawe' pa ruwach'ulew Egipto koma ri aj-Judá y xtikibij ta: Kan k'es ri Jehová, ri Ajaw.

²⁷Roma yin kan ixintzuliben richin xtinya' k'a pe ruk'ayewal pan iwi' rix ri ixk'o pa ruwach'ulew Egipto y kan xkixink'is chi espada o rik'in wayjal.

²⁸Pa ruwi' ri', rix ri xkixkolotej kan y xkixtzolin chupan ri qaruwach'ulew, xa ix juba' ok. Y keri' k'a chi'iwonojel rix ri k'a ixk'o na kan pa ruwach'ulew Judá, ri xkixok pa ruwach'ulew Egipto kan xtiwetamaj achoq ch'abel na k'a ri xtik'uluwachitej; wi kan ja ri nuch'abel yin Jehová, o ja ri ich'abel rix.

²⁹Xtink'ut k'a chiwech jun retal richin yin kan ninjikiba' chi ninya' ruk'ayewal pan iwi'. Richin keri' toq xtitz'et ri etal ri', xtiwetamaj chi xtibanatej ri ruk'ayewal chupan re ruwach'ulew re'.

³⁰Y ri retal ri' chi yin kan xtinjech ri Hofra rey richin Egipto pa ruq'a' ri Nabucodonosor rey richin Babilonia, ri nukanoj richin nrelesaj ruk'aslen, achi'el xinjech ri Sedequías rey richin Judá pa ruq'a' rija'. Yin Jehová ri yibin, xicha' chike.