Read Kaqchikel Jer 46 Bible Online

Jer 46 - Kaqchikel bible

Jer 46

¹Ri Jehová xch'on chik k'a wik'in pa kiwi' ri tzobaj winaqi' richin re ruwach'ulew.

²Jare' ri rutzijol ri xuya' pa ruwi' ri ruwach'ulew Egipto y chikij ri aj-labal ri e richin ri rey Necao. Rija' xuch'ek ri Nabucodonosor rey richin Babilonia chiri' pa tinamit Carquemis chunaqaj ri raqen-ya' Éufrates, chupan ri rukaj juna' chire ri q'atbel-tzij richin ri Joaquim rey richin Judá. Y ri Dios xubij:

³Tinaba' ri itobal ¡Kixbiyin k'a pan oyowal!

⁴Rix achi'a' ri yixch'oke' chirij kiej, tiya' ri ruxalma ri ikiej y kixch'oke' k'a el chirij. Rix ri ix beneq chi'iwaqen, tijosq'ij-el ri ikum. Tikusaj k'a el ri rutobal ri ijolon y tikusaj k'a el rutobal ri ruwa-ik'u'x y kixbiyin k'a pa taq cholaj.

⁵Jak'a rix xa xkixtzolin chiwij y janila xtixibij-iwi'. Rix ri ix aj-labal aj-Egipto xa xtitaluj-el-iwi', roma xa xkixbech'akatej. Xkixbe k'a anineq y man jun chik ri xtitzu'un kan chirij. ¡Xabakuchi k'o janila xibinri'il!

⁶Rix ri kan janila yixtikir yixanin, man xkixtikir ta chik xkixanimej. Rix ri kan janila iwuchuq'a', man xkixtikir ta chik xtito-iwi'. Ri pa xaman chunaqaj ri raqen-ya' Éufrates xtipajk'ij iwaqen y xkixtzaq.

⁷Ri rajawaren ri Egipto nimirineq achi'el ri raqen-ya' Nilo, ri janila nibolqo't ruwi'. Y ri winaqi' nikibij: Roj kan xqojyakatej y ri qajawaren xtinimer chuwech chijun ruwach'ulew y kan nibeqak'isa' konojel tinamit y ri winaqi' ri ek'o chiri', yecha'.

⁹Jak'a yin ninbij: Kixq'ax rix achi'a' ri yixch'oke' chirij kiej. Chuqa' kebe ri i-carruaje. Rix aj-labal aj-Etiopía y aj-Libia ri nik'uaj ri itobal y rix aj-Lidia ri kan jebel yixtikir yixk'aqon rik'in ch'ab, tichapa' ibey.

¹⁰Jak'a q'ij re' wichin yin Jehová k'iytisanel richin ronojel, jun q'ij toq xtinya' ri rutojbalil pa kiwi' ri e etzelanel wichin. Ri espada kan xkerukamisaj k'a konojel, k'a toq man nitikir ta chik, roma yin Jehová k'iytisanel richin ronojel xkixinkamisaj chi'iwonojel achi'el niban kik'in ri taq chikopi' richin kamelabel, chiri' chunaqaj ri raqen-ya' Éufrates, chiri' pa xaman.

¹¹Y man jun chik k'a iwaq'omal chire ri isokotajik ri', stape' xkixbe pa Galaad chukanoxik aq'om, roma xa maneq chik raq'omal.

¹²Ri nima'q taq tzobaj winaqi' richin ri ruwach'ulew xtiketamaj chi xqasex yan aq'ij y chijun ruwach'ulew nrak'axaj ri iraqoj-chi'ij. Chuqa' ri aj-labal nikipojila-ki' chikiwech y junan yetzaq-qa pan ulew, xcha' ri Dios.

¹³Ri Jehová xch'on chik k'a wik'in, chirij ri Nabucodonosor, rey richin Babilonia toq beneq richin niberubana' oyowal rik'in ri ruwach'ulew Egipto y xubij chi

¹⁴tinya' rutzijol chijun ri ruwach'ulew Egipto y ri pa taq tinamit Migdol, ri Menfis y ri Tafnes. Y tabij k'a: ¡Kixyakatej y tinaba-iwi', roma ri espada najin chik chi kamisanik!

¹⁵¿Achike roma xe'animej ri achi'a' ri k'o janila kuchuq'a'? Rije' kan man yetikir ta chik yepa'e' kow, roma kan ja yin ri xiwulan kichin.

¹⁶Ri achi'a' ri' kan xtikipajk'ij kaqen y xketzaq. K'ari' xtikibij chikiwech chi rije' xketzolin pa kitinamit y pa kiruwach'ulew ri akuchi xe'alex-wi, nej chire ri espada ri yeruk'is.

¹⁷K'ari' xesik'in y xkibij: Ri rey richin Egipto, janila k'iy ri xusuj, jak'a man jun xuya'.

¹⁸Yin Jehová ri k'o ronojel uchuq'a' pa nuq'a', kan ninya' nutzij pa nubi' chi ri winaqi' ri xkepe chiwij, kan janila nima'q kipalen, achi'el ri juyu' Tabor y ri juyu' Carmelo ri kan nej e jotol chuwech ri palou.

¹⁹Rix winaqi' richin re ruwach'ulew Egipto, kan tichojmirisaj k'a iwi' richin rix yixtalutej-el, roma ri tinamit Menfis kan xtok kan jun tz'iran, kan xtiwuluwu' y man jun chik xtibek'oje' chiri'.

²⁰Ri Egipto achi'el jun jebejoj nima-alaj achij wákix, jak'a xa xtipe jun amolo' chirij kere' pa xaman ri xkeruti' ri ek'o chiri'.

²¹Ri aj-labal ri kan e rutojon richin nikiben oyowal, xa kan e achi'el wákix ri janila e ti'ojirisan. Y ri achi'a' ri' kan junanin k'a xke'animej-el roma man xketikir ta xtikikoch' ri ruk'ayewal toq xtapon ri q'ij richin ri rutojbalil.

²²Y rix aj-Egipto kan xkixanimej k'a, achi'el rubanik toq nijusus nanimej-el jun kumetz. Xkixanimej-el toq xkenaqajub-apo ri aj-labal aj-Babilonia.Y rix kan xkixchoy-el rik'in ri ikej, achi'el nichoy jun che'.

²³Xkixkichoy-el rix stape' janila ix k'iy, achi'el jun k'echelaj. Ri aj-Babilonia kan más k'a janila e k'iy chikiwech ri sak' y kan man jun k'a nitikir najlan kichin.

²⁴Rix aj-Egipto kan xtiqasex k'a iq'ij y xkixch'akatej pa kiq'a' ri aj-Babilonia, ri ek'o pa xaman.

²⁵Yin Jehová ri k'o ronojel uchuq'a' pa nuq'a', ri Dios richin Israel ninbij chi ninbenya' ruk'ayewal pa ruwi' ri Amón ri ki-dios ri aj-Tebas y chuqa' pa kiwi' konojel ri aj-Egipto, ri e ki-dios, ri e ki-rey y konojel ri ch'aqa' chik ri kikuquban kik'u'x rik'in.

²⁶Y xtinben chi xketzaq pa kiq'a' ri aj-Babilonia richin chi yekikamisaj. Jak'a chirij re' ri aj-Egipto xkek'ase' chik jun bey pa kiruwach'ulew, achi'el ri kibanon-pe. Yin Jehová ri yibin.

²⁷Jak'a rix ri ix rijatzul kan ri Jacob ri nusamajel, man tixibij-iwi'. Man kixmayamo-qa rix israelita, roma rix y ri iwalk'ual kan xkixinkol ri k'a akuchi ix talutajineq-wi. Stape' k'a nej ixk'o-wi, rix xkixtzolin chik pe y xkixk'ase' rik'in uxlanen jun bey chik. Kan xkixch'uch'u' y man jun chik xtixibin iwichin.

²⁸Man tik'en rukiy rix ri ix rijatzul kan ri Jacob roma yin ink'o iwik'in. Stape' xkenk'is k'a konojel tzobaj winaqi' ri akuchi xixintaluj-wi-el, jak'a rix man xkixink'is ta. Xaxe k'a xtinya' jun xik'a'y chiwe richin yixchojmir, ri kan ruk'amon, roma kan man xkixinya' ta kan choj keri'. Yin Jehová ri yibin, xcha' ri Dios.