Read Kaqchikel Jer 47 Bible Online

Jer 47 - Kaqchikel bible

Jer 47

¹Jare' ri rutzijol ri xuya' ri Jehová chuwe pa kiwi' ri aj-Filistea, toq ri aj-Egipto man jani tikichop chi oyowal ri tinamit Gaza.

²Kere' nubij ri Jehová: Kere' pa xaman e peteneq jun nimalej tzobaj winaqi', achi'el jun nimalej raqen-ya'. Y re raqen-ya' re' kan nibulbu'x y xtumuq ri iruwach'ulew, ri itinamit y konojel ri ixk'o chuwech. Y chi'iwonojel rix kan xkixsik'in roma q'axo'n.

³Kan xtik'en janila kikiy toq xtiwak'axaj ri kitabek ri kiej, ri kich'abel ri carruaje y chuqa' toq yeqitz'iqot ri ki-rueda. Jari' toq rix te'ej-tata'aj xke'imalij kan ri iwalk'ual roma xtik'is ri iwuchuq'a'.

⁴Xtapon ri q'ij richin xkixk'is rix aj-Filistea y man xkixtikir ta chik xke'ito' ri aj-Tiro y ri aj-Sidón, roma yin Jehová xkik'ison iwichin rix ri xixpe richin xo'ito-iwi' pa ruwach'ulew Creta.

⁵Rix winaqi' aj-Gaza xtijuk'-el ri rusumal-iwi'. Rix winaqi' richin ri Ascalón xkixmemur. Rix ri ix kijatzul kan ri achi'a' ri nima'q kipalen, ¿k'a janipe' k'a man nisok ta chik iwi', retal richin nik'ut chi ixk'o pa jun q'axo'n?

⁶Rix nibij chuwe chi ri nu-espada titzolin pa ruk'ojelibal richin man nuben ta chik kamik.

⁷Jak'a ri espada ri' man nitikir ta nuben keri' roma ja yin in biyon chire richin yerukamisaj ri aj-Ascalón y chijun ruwach'ulew ri k'o pa taq'aj, xcha' ri Dios.