Read Kaqchikel Jer 49 Bible Online

Jer 49 - Kaqchikel bible

Jer 49

¹Ri Jehová xuya' k'a re rutzijol re' chuwe pa kiwi' ri aj-Amón y xubij: Janila e k'iy ri e rijatzul kan ri Israel ri ek'o pa ruwach'ulew Gad. ¿Achike roma wakami rix ri itzeqeliben ri dios Milcom xixok chupan ri kiruwach'ulew rije' y kan ixk'o chupan ri kitinamit?

²Wakami k'a yin Jehová ninbij chi xtapon k'a jun q'ij toq xtinben chi xtak'axatej raqoj-chi'ij richin labal iwichin rix ri chiri' pan itinamit Rabá. Ri chiri' kan xkewulex k'a ri tinamit ri' y kan xkeporox. K'ari' ri nuwinaq israelita xtikelesaj chik kan jun bey ri xelesex kan chike rije'. Ja yin Jehová ri yibin.

³¡Wakami k'a rix aj-Hesbón xtiwoq'ej ri itinamit Ai, roma xa xtich'akatej! Chuqa' rix ixoqi' aj-Rabá kan xkixoq' k'a. Xtikusaj k'a tzieq richin bis y xtibajila' k'a ruwa-ik'u'x. Xkixanin, achi'el nikiben ri ch'uja' y xtisokola' k'a iwi', roma ri i-dios Milcom xtibe pa ximonri'il, e rachibilan ri e ru-sacerdote y ri e aj-raqen.

⁴Rix kan ikuquban ik'u'x rik'in ri ibeyomel. Rix ix achi'el jun xten ri man nimey ta tzij y nibij chi man jun ri nitikir nuben oyowal iwik'in.

⁵Wakami k'a, xkenteq winaqi' kichin ch'aqa' chik ruwach'ulew richin xtinbentaqa' nimalej xibinri'il pan awi'. Yin Jehová ri k'o ronojel uchuq'a' pa nuq'a' ri yibin. Chi'ijujunal rix kan xkixoqotex-el y man jun chik ri xtik'amon ta iwech.

⁶Jak'a ri pa ruk'isibel, yin xkixinkol-pe y xtinya' urtisanik pan iwi'. Yin Jehová ri yibin, xcha' ri Dios.

⁷Ri Jehová ri k'o ronojel uchuq'a' pa ruq'a' xuya' chuwe re rutzijol re' pa ruwi' ri ruwach'ulew Edom y xubij chike: Man jun aj-na'oj xtik'oje' chiri' pan iruwach'ulew Temán.*f12* Chuqa' xtik'is ri kinojibal ri etamanela',

⁸y roma ri' rix winaqi' richin ri tinamit Dedán, kixel-pe chi'anin richin tiwewaj-iwi', roma yin xkixink'is rix ri ix rijatzul kan ri Esaú, y kan xtapon k'a jun q'ij richin xtinya' ri rutojbalil-mak pan iwi'.

⁹Toq nik'ol ruwech ri uva, k'a nik'oje' na kan juba' uva. Y toq ye'apon ri eleq'oma' xaxe nikik'uaj-el ri janipe' nikajo' y k'a k'o ri nikiya' kan.

¹⁰Jak'a rix kan man jun xtik'oje' kan chiwe. Y yin kan xinwil ronojel ri akuchi iwewan-wi-iwi' y man yixtikir ta chik niwewaj-iwi' chiri'. Ri iwalk'ual, ri iwachpochel y ri iwachk'uljay xkek'is y man jun chik ri xtik'oje' kan ri nubij ta:

¹¹Ke'aya' kan ri taq ameba' y ri malkani' wik'in richin xkenchajij, xticha' ta.

¹²Yin Jehová ri yibin. Xinya' na k'a ruk'ayewal pa kiwi' ri man ruk'amon ta richin nikik'ul, k'a ta la chik rix aj-Edom.

¹³Yin Jehová ninya' nutzij pa nubi-qa yin chi ri tinamit Bosrá xtiwulex kan y xtok kan tz'iran. Ri wineq xtiqaqa itzel pa ruwi' y xtik'oje' k'a kan achi'el jun k'ambel-tzij richin qasanri'il. Y konojel ri rutinamit xkewuluwu' kan richin jantape'.

¹⁴Xinteq jun ya'ol rutzijol chikikojol ri tzobaj winaqi' ri e richin ri ruwach'ulew, richin rije' nikimol-ki' y yeyakatej chiwij rix. Tichojmirisaj k'a iwi' richin ri oyowal.

¹⁵Yin kan xtinben k'a chiwe richin chi ja rix ri más ix ko'ol ok chikikojol ri ruwach'ulew y kan ja rix ri más ix etzelan chikikojol ri winaqi'.

¹⁶Rix kan ye'ixibij ch'aqa' chik y kan janila inimirisan-iwi', roma kan ikuquban ik'u'x kik'in ri nimalej taq abej. Jak'a stape' xixjote' pa ruwi' nima taq juyu' y stape' ibanon isok k'a janila nej achi'el nuben ri kot, yin kan xkixinqasaj-pe k'a chiri'.

¹⁷Ri wululen ri xtipe chirij ri iruwach'ulew Edom kan janila nim y roma ri' konojel k'a winaqi' ri xkeq'ax-el chiri' kan xtikik'en rukiy toq xtikitz'et ri rutojbalil ri qajineq pan iwi'. Y xketze'en chiwij.

¹⁸Kan xtik'is achi'el ri tinamit Sodoma y Gomorra y ri tinamit ri ek'o chunaqaj. Kan man jun chik k'a xtik'ase' kan chiri'.

¹⁹Yin Jehová ri yibin. Xkipe k'a chiwij rix richin yixinwoqotaj, achi'el nuben jun koj ri nel-pe pa taq q'ayis richin ri raqen-ya' Jordán toq nibe pa jun soq'olbel richin yeroqotaj ch'aqa' chik chikopi'. Y ri iyuq'unela' man xketikir ta chuwij. Y chiri' xtinben chiwe chi xkixanimej-el chupan ri iruwach'ulew. Rix man iwetaman ta achike xtinteq-el richin yixroqotaj-el y ja yin ri'.

²⁰Roma ri' tiwak'axaj k'a ri nuch'obonik yin Jehová ri nubanon pan iwi' rix aj-Edom. Kan xke'uk'uex-el ri taq iwalk'ual, achi'el niban kik'in ri taq karne'l ri más taq e kokoj. Y pa ruwi' ri' kan xtink'is ri iruwach'ulew.

²¹Toq xkixch'akatej rix aj-Edom, ri iruwach'ulew kan xtisilon y janila xtiq'ajan. Y toq rix xtireq-ichi' richin nik'utuj to'onik, xtak'axatej k'a pa Kaqa-Palou.

²²Ri e etzelanel iwichin kan xtikik'eq-ki' chirij ri itinamit Bosrá, achi'el nuben jun kot toq rurik'on ri ruxik'. Y chupan ri q'ij ri', ri aj-labal iwichin rix kan xtiq'axon ri kánima, achi'el niq'axon jun ixoq toq nik'oje' yan ti ral, xcha' ri Dios.

²³Jare' ri rutzijol ri xuya' ri Dios chike ri aj-Damasco: Ri tinamit Hamat y ri Arpad janila e k'ixbitajineq, roma xapon jun man utz ta rutzijol kik'in. Kan janila k'a kixibin-ki' y yebe-kela' yebe-kela' achi'el nuben ri palou toq nibolqo't.

²⁴Rix aj-Damasco maneq chik iwuchuq'a' y nich'ob chi yixanimej-el roma xibinri'il, roma bis y roma q'axo'n, achi'el ri ruq'axo'n jun ixoq ri nik'oje' yan ti ral.

²⁵¿Achike kami roma man jani timalij kan ri itinamit Damasco, ri ojer kan, yin kan janila xikikot iwik'in?

²⁶Roma ri' wakami konojel ri alaboni' ri ek'o wawe' kan xkepunupuxin kan pa taq bey y konojel ri aj-labal xkeken chupan ri q'ij toq yin xtinq'et-tzij pan iwi'. Ja yin Jehová ri k'o ronojel uchuq'a' pa nuq'a' ri yibin.

²⁷Kan xtinbenya' ruq'aq'al ri tz'aq ri k'o chirij ri itinamit y re' kan xtuk'is chuqa' ri rachoch ri rey Ben-hadad ri akuchi niq'aton-wi-tzij, xcha' ri Dios.

²⁸Jare' ri rutzijol ri xuya' ri Jehová pa kiwi' ri e rijatzul kan ri Quedar y pa kiwi' ri aj-raqen richin ri kokoj taq tinamit richin ri Hasor ri ek'o pa relebel-q'ij, toq ri Nabucodonosor rey richin Babilonia man jani keruch'ek. Y xubij chike: Ri Nabucodonosor nipe yan richin yixruchop chi oyowal y yixruk'is.

²⁹Xke'ok k'a kichin rije' ri iwachoch ri e banon rik'in tzieq y ri tzobaj ikarne'l. Xtikik'uaj ri iwachoch y ronojel ri isamajibal. Y chuqa' xtikimej ri i-camello. Y rix xtiraqaqej-ichi' y xtibij: ¡K'o xibinri'il xabakuchi!, xkixcha'.

³⁰Chuqa' rix winaqi' aj-Hasor, tibewewaj-iwi' pa taq jul ri ek'o pa juyu', roma ri Nabucodonosor kan k'o k'a ri ruch'obon-pe pan iwi' rix.

³¹Roma ja yin in biyon chike richin yixkichop chi oyowal, stape' rix kan man jun nimey, ni man iya'on ta ruchi' ri itinamit y kan iyon ixk'o.

³²Xtikeleq'aj k'a ri i-camello y ronojel ri iwawej. Y pa ruwi' re' yin kan xkixinbentaluj pa ruwi' ronojel ruwach'ulew. Y kan xtinya' tijoj-poqonal pan iwi' xabakuchi. Yin Jehová ri yibin.

³³Ri iruwach'ulew Hasor kan richin jantape' xtok jun tz'iran ruwach'ulew y chuqa' xtok kik'ojelibal ri utiwa'. Kan man jun chik xtibek'ase' chiri', ni man jun chik wineq xtibeq'ax keri', xcha' ri Dios.

³⁴Toq ri Sedequías xuchop niq'aton-tzij pa ruwi' ri ruwach'ulew Judá, jari' toq ri Jehová xuya' re rutzijol re' chuwe richin ninbij chike ri aj-Elam.

³⁵Yin Jehová ri k'o ronojel uchuq'a' pa nuq'a' ninbij: Yin ninbenq'aja' yan ri rute-ich'ab, ri achoq ik'in nito-iwi'.

³⁶Xabakuchi k'a xkepe-wi ri e etzelanel iwichin y xabakuchi xkixintaluj-wi-el chupan chijun ri ruwach'ulew.

³⁷Xtinben chiwe richin kan xkixbaybot chikiwech ri e etzelanel iwichin y kan xtinteq-pe ruk'ayewal pan iwi'. Kan xtinwisq'opej ri woyowal pan iwi' rix y kan xtinteq-pe labal chiwij k'a toq xkixk'is na jumul.

³⁸Xtinya' ri nuq'atbel-tzij pan iwi' y xtinben chi xtiken ri i-rey y ri e aj-raqen. Yin Jehová ri yibin.

³⁹Jak'a chiqawech-apo, yin kan xtinya' chik urtisanik pan iwi'. Yin Jehová ri yibin, xcha' ri Dios.