Read Kaqchikel Jer 51 Bible Online

Jer 51 - Kaqchikel bible

Jer 51

¹Ri Jehová nubij: Yin kan xtinbentaqa-pe jun tzobaj aj-labal achi'el jun nimalej kaq'iq' pa ruwi' ri ruwach'ulew Babilonia ri kan xtuk'is ronojel.

²Kan xkenteq k'a ri e etzelanel kichin chikij richin chi niban chike achi'el toq nik'aq ri trigo richin nixupux y keri' xtik'is ri kiruwach'ulew. Xtikiben chi man jun chik wineq xtik'oje' kan pa ruwach'ulew. Toq xtapon ri q'ij richin ri wululen, xabakuchi k'a xkixkichop-wi chi oyowal.

³Rix ri ix etzelanel kichin ri aj-Babilonia, man tiya' q'ij chi rije' nikinaba' ri kich'ab. Chuqa' man tiya' q'ij richin nikikusaj ri rutobal ruwa-kik'u'x. Man k'a tijoyowaj kiwech ri aj-labal aj-Babilonia, jak'a kan ke'ik'isa' kan konojel.

⁴Rije' kan xkepunupuxin kan pa taq bey ri chiri' pa kiruwach'ulew.

⁵Stape' ri aj-Israel y ri aj-Judá xemakun chinuwech yin y kan xkinojisaj chi mak ri kiruwach'ulew, yin Jehová ri k'o ronojel uchuq'a' wik'in, ri in loq'olej ki-Dios, man e numalin ta kan.

⁶Y rix winaqi' israelita, kixanimej-el pa Babilonia. Tukolo-ri' ri nitikir, richin chi man yixken roma kimak rije'. Jare' xapon ri q'ij richin ninya' ri rutojbalil pa kiwi' rije' achi'el ri ruk'amon.

⁷Rubanon kan ri Babilonia kan achi'el jun qumbel ri banon rik'in q'anapueq ri k'o pa nuq'a'. Y ri qumbel ri' nuk'exewachuj ri woyowal. Y yin kan xinya' chike chijun ruwach'ulew richin xkiqum y kan xeq'aber roma. Y toq kiqumun chik, kan xsach k'a kik'u'x jumul.

⁸Jak'a wakami ri aj-Babilonia kan chi'anin k'a xkech'akatej. Roma ri' kan ke'iwoq'ej k'a rije'. Tik'ama' k'a pe aq'om richin ri kisokotajik; rik'in juba' yek'achoj-el, xcha' ri Dios.

⁹Jak'a ri winaqi' richin ch'aqa' chik ruwach'ulew xtikibij: Xqaya' yan kaq'om ri aj-Babilonia, jak'a man xe'aq'omatej ta. Keqaya' kan y qojel-el re wawe'. Jo', pa taq qaruwach'ulew roma ri kamisanik ri nikiben kan napon k'a chila' chikaj y kan nijote' k'a q'anej pa taq sutz', xkecha'.

¹⁰Y ri israelita ri ek'o chiri' xtikibij: Ri Jehová kan xuk'ut k'a ri ruchojmilal kik'in rije' roma ri xkiben qik'in roj. Roma ri' roj tibeqatzijoj chiri' pa tinamit Sión ri xuben ri Jehová ri qa-Dios kik'in.

¹¹Ri Jehová kan nrajo' yeruk'is ri aj-Babilonia y xuben chike ri rey richin ri ruwach'ulew Media, chi xeyakatej chikij ri aj-Babilonia richin yekik'is. Jare' ri rutojbalil ri nuya' rija' roma xkiqasaj ruq'ij ri rachoch y roma ri' nubij chike ri aj-Media chi tikichojmirisaj ri rute-ch'ab y tikichapa' jebel ri kitobal.

¹²K'o chi nikiyek-q'anej ri retal richin nikiwulaj ri tz'aq richin ri tinamit Babilonia. K'o chi yekiya' más achi'a' richin yechajin jebel, y k'o chi yekiyala' pikbel, roma ri Jehová k'o runojin chi nuben y ri runojin pa kiwi' ri winaqi' aj-Babilonia, kan xtuben k'a.

¹³Rix aj-Babilonia ri ixk'o chunaqaj ri raqen-ya' y kan k'o janila beyomel iwik'in, xapon k'a ri q'ij richin yixk'is. Xapon k'a ri q'ij richin yixken.

¹⁴Roma ri' ri Jehová ri k'o ronojel uchuq'a' pa ruq'a' kan nuya' rutzij pa rubi' rija', chi xtuben chi xke'apon e k'iy achi'a' e etzelanel iwichin, ri man jun nitikir ye'ajlan, roma kan janila e k'iy, kan achi'el ri kajlabal ri sak'. Y rije' xtikireq k'a kichi' richin ch'akonik, xkecha'.

¹⁵Rat Jehová, rik'in ri nimalej awuchuq'a' xaben ri ruwach'ulew y rik'in ri ana'oj xajikiba' kan y rik'in ri anojibal xajikiba' ri kaj.

¹⁶Naben chi nel-el ri sutz' chuwech re ruwach'ulew. Y toq najin job, naben chi nisaqirisan ri koyopa' y chuqa' ja rat ri yabanon chi niq'ajan-pe ri koqolajay. Y ja rat ri yabanon richin nipe ri kaq'iq'.

¹⁷Konojel ri yebanon kichin ri wachibel ri' xa e nakaneq roma maneq ketamabal y kan xkek'ixbitej k'a, roma ri wachibel xa man e qitzij dios ta y maneq kik'aslen.

¹⁸Kan man jun k'a kejqalen y toq xtapon ri q'ij richin ri aq'atbel-tzij, k'ari' xke'ak'is.

¹⁹Ja rat ri xabanon ronojel ri k'o chuwech re ruwach'ulew. Y ja rat ri at qa-Dios, ri oj rijatzul kan ri Jacob. Ja rat xacha'on qichin richin xojok atinamit. Y ri abi' rat, ja ri Jehová k'iytisanel richin ronojel.

²⁰Rix winaqi' aj-Babilonia ja rix ri xixok achi'el jun bajibel, richin xe'ikamisaj ri e etzelanel iwichin. Y yin Jehová ninbij chiwe chi iwik'in rix xenk'is tzobaj winaqi' richin re ruwach'ulew. Iwik'in rix xenk'is ri q'atbel taq tzij richin ch'aqa' chik ruwach'ulew.

²¹Ja rix ri xixinkusaj richin xe'ik'is ri kiej y ri yech'oke' chikij taq kiej, y richin chuqa' xenk'is ri carruaje y ri ye'uk'uan kichin.

²²Ja rix ri xixinkusaj richin xenk'is ri achi'a' y ri ixoqi', richin xenk'is ri e rijita'q y ri k'a e k'ajola' na, chuqa' richin xenk'is ri alaboni' y ri xtani'.

²³Ja rix ri xixinkusaj richin xenk'is ri yuq'unela' y ri tzobaj karne'l, richin xenk'is ri achi'a' ri yesamajin ri ulew y ri kibóyix, richin chuqa' xenk'is ri q'atbel taq tzij y ri aj-raqen.

²⁴Chikiwech k'a ri nuwinaq israelita, xtinya' ri rutojbalil-mak pan iwi' rix aj-Babilonia, achi'el ri ruk'amon roma ri itzel ri xiben chiri' pa tinamit Sión.

²⁵Rix kan xik'is chijun ri ruwach'ulew y kan ix kow nina' achi'el jun juyu'. Jak'a yin kan in yakatajineq chiwij rix. Y roma ri' kan xtintzeqej k'a ri nuq'a' pan iwi' richin ninya' rutojbalil chiwe. Pa ruk'exel ninben achi'el jun juyu' chiwe, xa xtinben achi'el jun abej ri xtinbensururej-pe pa ruwi' ri juyu'. Y kan xkixok jun juyu' k'atineq.

²⁶Man jun k'a chike ri abej ri e wulan pan itinamit, xtik'atzin richin nipabex ta q'anej jun jay chire o richin niban ta qa ri ruxe'. Ri itinamit kan xtok k'a jun tz'iran ruwach'ulew richin q'asen.

²⁷Ri Jehová nubij chike ri ch'aqa' chik ruwach'ulew: Tijotoba' k'a ri tzieq retal richin oyowal; tixupuj k'a ri trompeta richin niya' rutzijol chike ri winaqi'. Y tinaba-iwi' rix winaqi' richin re ruwach'ulew. Kixyakatej k'a chikij ri aj-Babilonia. Ke'ibeyaka-pe ri q'atbel taq tzij richin ri ruwach'ulew Ararat, ri Miní y ri Asquenaz. Tikanoj jun achin ri más k'o ruq'ij richin nok aj-raqen kichin ri aj-labal. Kan ke'ik'uaj k'a ri achi'a' ri e beneq chikij kiej, ri e achi'el kajlabal ri sak'.

²⁸Timolo' k'a kichi' ri tzobaj winaqi' richin re ruwach'ulew Media, konojel ri ki-rey, ri e q'atoy taq tzij, konojel ri aj-raqen y konojel ri winaqi' ri k'o pa kiq'a'.

²⁹Ri ruwach'ulew Babilonia nisilon y nibaybot roma kan najin ronojel ri nubin yin Jehová pa ruwi' ri ruwach'ulew ri', roma kan xtok kan jun tz'iran.

³⁰Ri achi'a' ri maneq xibinri'il chikiwech ri aj-Babilonia kan man xtikiben ta chik oyowal y kan xkek'oje' kan chiri' pa taq tobel ri e tz'apen chi tz'aq. Kan xtik'is ri kuchuq'a' y kan xtikixibij-ki' achi'el ixoqi'. Xtikiq'ej k'a ri tz'apebel ruchi' ri tinamit y k'ari' xtiporox k'a ri kachoch.

³¹Xke'el-xke'ok ri uk'uey rutzijol richin xtikibij chire ri rey richin Babilonia chi ri kiruwach'ulew xch'akatej yan,

³²chi rix kan xkixk'oje-qa ri akuchi xax rupan ri raqen taq ya' y chi kan xiporoj kan ri taq kitobal. Roma ri' ri aj-labal kichin rije' kan janila xkixibij-ki'.

³³Yin Jehová ri k'o ronojel uchuq'a' wik'in, ri ki-Dios ri israelita ri yibin. Ri Babilonia achi'el ri akuchi nich'ay-wi trigo, roma kan nipalibex chupan ri q'ij richin ch'eyoj y kan napon yan k'a ri q'ij richin niwachin ri tiko'n, xcha' ri Dios.

³⁴Ri winaqi' aj-Jerusalem nikibij: Ri Nabucodonosor rey richin Babilonia kan xusech qak'u'x y kan xojruk'ux richin xojruk'is. Kan xuben k'a chiqe achi'el jun leq ri man jun chik rupan. Kan xojrubeq' achi'el nuben jun nimalej chikop ri k'o pa palou. Kan xnoj k'a rupan rik'in ri jebelej ri k'o qik'in y ri man xuk'is ta xuchubaj-el.

³⁵Tiqaqa k'a ri ruk'ayewal pa kiwi' ri aj-Babilonia roma ronojel ri xkiben qik'in. Tiqaqa k'a rutojbalil pa kiwi' rije' roma ri qawinaq ri xekikamisaj, xecha'.

³⁶Ri Jehová nubij: Yin ninbenq'ata-tzij pa kiwi' ri aj-Babilonia, y kan xtinya' ri ruk'ayewal pa kiwi'. Kan xkenchaqirisaj k'a ri raqen taq ya' y ronojel ri alaxibel taq ya' ri ek'o chiri'.

³⁷Ri kitinamit kan xtok k'a jun tzubaj ulew y xtok k'a kachoch ri utiwa'. Y konojel ri xketz'eton kichin kan xtikik'en rukiy y xtikixibij-ki' chuwech.

³⁸Konojel rije', xtikireq kichi' achi'el ri koj y ri taq alaji' koj kan nikiben chike ri winaqi' richin nikixibij-ki' chikiwech.

³⁹Jak'a toq janila yakatajineq koyowal, yin xtinya' ya' ri niq'abarisan chike richin xkeq'aber y xtisach kik'u'x. Keri' xtipe kiwaran y man xkek'astej ta chik jumul. Yin Jehová ri yibin.

⁴⁰K'ari' xkenk'uaj pa kamisabel achi'el toq ye'uk'uex ri taq alaji' achija' karne'l, ri achija' karne'l y ri achija' tzuntzun.

⁴¹Re wakami ri Babilonia kan janila eleneq utzilej rutzijol chuwech chijun ruwach'ulew. Jak'a xa xtich'akatej y ri ch'aqa' chik ruwach'ulew toq xtikitz'et, kan janila xtikixibij-ki' chuwech.

⁴²Ri e etzelanel kichin xkeyakatej chikij achi'el nibolqo't ri palou y xtikinojisaj ri ruwach'ulew.

⁴³Ri kitinamit xke'ok tz'iran, chaqi'j y kan xtitole' kan. Y kan man jun chik ri xtik'oje' chiri' y man jun chik xtiq'ax keri'.

⁴⁴Kan xtinya' k'a ri rutojbalil-mak pa ruwi' ri Bel, dios richin ri Babilonia. Kan xtinben chire chi xtuxa-el ri rubeq'on. Y ri tzobaj winaqi' richin ri ruwach'ulew man jun bey chik xke'apon rik'in rija'. Xtitzaq ri tz'aq richin ri ruwach'ulew Babilonia.

⁴⁵Nuwinaq israelita, kixel-el chiri' pa Babilonia. Chi'ijujunal tikolo-el ri ik'aslen rokik man jani tiqaqa ri ruq'aq'arinen ri woyowal.

⁴⁶Man timayamo-qa ri iwánima y man tixibij-iwi' roma ri rutzijol ri xtapon iwik'in. Roma ronojel juna' jun wi ri rutzijol xtiya'ox chiwe, rutzijol richin kamisanik chupan re ruwach'ulew Babilonia y oyowal chikikojol ri q'atbel taq tzij.

⁴⁷Keri' xtipe ri q'ij toq xtinya' rutojbalil pa kiwi' ri wachibel ri nikiya' kiq'ij ri aj-Babilonia. Konojel kitinamit xtiqasex kiq'ij y xtinoj chi kaminaqi'.

⁴⁸Chijun ri kaj y ri ruwach'ulew y ronojel ri ek'o chuwech kan xkekikot toq xtich'akatej ri Babilonia, roma pa xaman xkepe-wi ri xkek'ison kichin. Yin Jehová ri yibin.

⁴⁹Ri Babilonia k'o chi xtik'is roma ri kamik ri xuben kik'in ri israelita y ri kamik ri xuben chijun ri ruwach'ulew.

⁵⁰Rix israelita ri xixkolotej kan chire ri kamik, kixanimej-el y man kixpa'e-qa. Y toq ixk'o nej kan kinich'obo' k'a yin, toqaqa chi'ik'u'x ri itinamit Jerusalem.

⁵¹Rix nibij chi kan janila yixk'ix toq niwak'axaj chi janila yixyoq' koma ri winaqi' aj juk'an chik ruwach'ulew ri xe'ok chiri' pa wachoch ri akuchi kan loq'olej-wi.

⁵²Jak'a yin Jehová ninbij chi xtapon k'a jun q'ij toq xtinya' ri rutojbalil-mak pa kiwi' ri wachibel ri niya'ox kiq'ij. Y chijun ri winaqi' richin ri ruwach'ulew ri' xkejilon roma ri kisokotajik.

⁵³Y stape' ri aj-Babilonia xtikipaba' ta q'anej jun tz'aq ri k'a nej jotol chikaj, k'a chiri' xkenteq ri e etzelanel chikij richin yekik'is. Yin Jehová ri yibin.

⁵⁴Xtak'axatej k'a raqoj-chi'ij ri xtikiben ri aj-Babilonia y ri nimalej wululen ri k'o pa kiruwach'ulew.

⁵⁵Roma ja yin Jehová xkik'ison kichin y xtinben chi xtik'is ri raqoj-chi'ij ri xtikiben, roma ri e etzelanel kichin kan xkeq'ajan achi'el xa ta janila ya' ri peteneq y xtoqaqa pa kiwi'.

⁵⁶Xkepe k'a richin nokik'isa' ri ruwach'ulew Babilonia. Xkekichop ri aj-labal y kan xtikiq'ej ri kik'aqbal-ch'ab. Roma yin Jehová in jun Dios ri kan chike chikijujunal ninya' ri rutojbalil-mak ri kan ruk'amon.

⁵⁷Yin Jehová ri k'o ronojel uchuq'a' wik'in y ri in rey ninbij chi ri e aj-raqen richin ri ruwach'ulew Babilonia, ri e aj-na'oj y ri e q'atbel taq tzij y ri e aj-labal kan xkenq'abarisaj y kan xkeken k'a chi waran richin q'asen y kan man xkek'astej ta chik pe.

⁵⁸Ri nima'q ruwech taq tz'aq richin ri Babilonia kan xkeqasex jumul y ri nima'q taq ruchi' ri tinamit xkeporox y xa man jun k'a xuq'ajuj chi janila xesamej ri tzobaj taq winaqi', roma ronojel ri kisamaj xtuk'is q'aq'. Yin Jehová ri k'o ronojel uchuq'a' wik'in ri yibin, xcha' ri Dios.

⁵⁹Chupan ri rukaj juna' chire ri q'atbel-tzij richin ri rey Sedequías, ruk'ajol ri Nerías y rumam ri Maaseías, jari' toq yin Jeremías xinya' k'a jun taqikil chire ri Seraías, rachibil k'a ri rey Sedequías toq xbe pa Babilonia.Y ri Seraías ja rija' ri k'o chi nichojmirisan ri akuchi nik'oje-wi ri rey.

⁶⁰Y yin kan xintz'ibaj chik pa jun wuj ronojel ri ruk'ayewal ri xtiqaqa pa ruwi' ri ruwach'ulew Babilonia.

⁶¹K'ari' xinbij chire ri Seraías, chi toq xtapon pa Babilonia, kan tusik'ij ronojel chikiwech ri winaqi'.

⁶²Y chuqa' tubij chire ri Jehová chi rija' kan xubij chi xtik'is re ruwach'ulew re' y man jun chik ri achike xtibek'ase' wawe', ni winaqi' ni chikopi' y xtuben chire re wawe' richin xtok jun tz'iran ruwach'ulew richin q'asen.

⁶³Y xinbij chire ri Seraías chi toq rija' xtitane' chusik'ixik re jun wuj re', xtuxim jun abej chutza'n y xtuya-el pa raqen-ya' Éufrates,

⁶⁴y xtubij: Kere' xtibe pa xulan ri Babilonia y man xtiyakatej ta chik chupan ri ruk'ayewal ri xtuteq-pe ri Jehová chirij, xicha' chire. Wawe' nitane-wi ri nuch'abel yin Jeremías ri in q'alajirisey ruch'abel ri Dios.