Read Kaqchikel Jer 52 Bible Online

Jer 52 - Kaqchikel bible

Jer 52

¹Ri Sedequías k'o k'a juwineq jun rujuna' toq xuchop nuq'et-tzij y julajuj juna' ri xuq'et-tzij chiri' pa Jerusalem. Ri rute' rubini'an Hamutal, rumi'al ri jun chik achin rubini'an Jeremías aj-Libná.

²Jak'a ri rubanobal ri Sedequías kan janila itzel xuben chuwech ri Jehová, achi'el xuben ri Joaquim.

³Roma ri' ri Jehová xyakatej janila royowal chikij ri aj-Judá y ri aj-Jerusalem y kan xrelesaj-el ri kik'aslen. Chirij ri' ri Sedequías xyakatej chirij ri rey Babilonia.

⁴Y chupan k'a ri q'ij lajuj chire ri ik' lajuj chupan ri juna' beleje' chire ri q'atbel-tzij richin ri Sedequías, jari' toq ri Nabucodonosor rey richin Babilonia y ri aj-labal, xeyakatej chirij ri Jerusalem richin xek'oje-qa chiri'. Y xkisutij-rij ri tinamit y xkimontonij ulew chirij ri tz'aq.

⁵Y xsutix k'a rij ka'i' juna'.

⁶Chupan ri q'ij beleje' chire ri ik' kaji' chupan ri juna' julajuj chire ri q'atbel-tzij richin ri Sedequías, kan xnimer k'a ri wayjal chiri' pa tinamit y kan man jun chik k'o richin nikitej ri winaqi'.

⁷K'ari' jujun chike rije' xkichop nikiwop jun jul chire ri tz'aq richin ri tinamit, stape' ri aj-Babilonia kisutin-rij ri tinamit. Jak'a ri Sedequías y ri aj-labal aj-Judá xe'animej-el chupan ri aq'a' ri'. Xe'el k'a el chiri' chupan ri okibel ri k'o chukojol ri ka'i' tz'aq ri akuchi tikon-wi kotz'i'j richin ri rey y xkik'uaj-el ri bey ri keri' pa taq'aj kojol juyu' richin ri raqen-ya' Jordán.

⁸Jak'a ri aj-labal aj-Babilonia xkitzeqelibej-el ri Sedequías y xbekiq'i' pa taq'aj kojol juyu' chire ri Jericó. Konojel k'a ri aj-labal aj-Judá xkimalij kan ri Sedequías y xkitaluj-el-ki'.

⁹Jak'a ri aj-Babilonia xkichop kan ri rey Sedequías y xkik'uaj-el chuwech ri rey richin Babilonia chiri' pa tinamit Riblá ri k'o pa ruwach'ulew Hamat. Y chiri', ri Nabucodonosor xubij achike niban rik'in rija'.

¹⁰Ri rey richin Babilonia, kan chuwech k'a ri Sedequías, xuteq kikamisaxik ri e ralk'ual y chuqa' xuteq kikamisaxik konojel aj-raqen richin ri tinamit Judá.

¹¹Y chirij ri' ri Sedequías xelesex ri runaq' taq ruwech y xkixim rik'in cadena banon rik'in q'enq'oj-pueq, richin nuk'uex k'a pa Babilonia, ri akuchi xk'oje-wi pa cárcel k'a toq xken na.

¹²Y chupan ri q'ij lajuj chire ri ik' ro' chupan ri juna' belejlajuj chire ri q'atbel-tzij richin ri rey Nabucodonosor, jari' toq xbe pa Jerusalem ri Nebuzaradán ri aj-raqen pa kiwi' ri aj-labal aj-Babilonia.

¹³Y toq xapon chiri', xuporoj ri rachoch ri Dios, ri rachoch ri rey y ronojel ri jay richin ri tinamit ri'. Y ri xeporox más ja ri jay ri k'o kejqalen.

¹⁴Chirij ri' ri Nebuzaradán y ri aj-labal aj-Babilonia ri e tzeqelibeyon richin xkiqasaj k'a pan ulew ri tz'aq ri k'o chirij ri tinamit Jerusalem.

¹⁵K'ari' ri Nebuzaradán xeruk'uaj pa ximonri'il k'a kela' pa Babilonia, ri winaqi' ri man jun k'o kik'in, ri winaqi' ri k'a xek'oje' na kan pa tinamit, ri winaqi' ri xeq'ax rik'in ri Nabucodonosor y ri winaqi' ri nikiben jalajoj ruwech samaj.

¹⁶Xaxe xeruya' k'a kan jujun chike ri man jun ok k'o kik'in, richin chi nikisamajij ri ulew ri k'o uva chuwech y ri ch'aqa' chik ulew.

¹⁷Ri aj-Babilonia xkiben k'a ruk'aj chire ri ka'i' pilar, ri carretón richin yakbel-ya' y ri nimalej yakbel-ya' y xkik'uaj-el pa Babilonia.

¹⁸Chuqa' xekik'uaj-el ri k'ulbel-chaj, ri pajbel, ri chupbel-q'aq', ri leq, ri pala y ronojel samajibel ri e banon rik'in q'enq'oj-pueq richin ri samaj pa rachoch ri Dios.

¹⁹Keri' chuqa' ri Nebuzaradán xuk'uaj-el ronojel ri samajibel ri e banon rik'in q'anapueq y saqipueq: Ri yakbel-ya', ri yakbel racheq-q'aq', ri nima'q taq leq, ri k'ulbel-chaj, ri candelabro, ri pajbel y ri qumbel richin ri sipanik richin vino.

²⁰Man yetikir ta k'a nikibij ri janipe' ri nipajon ri ka'i' pilar y ri nimalej yakbel-ya' rik'in ri kiwachibel kablajuj achija' taq wákix ri e banon rik'in q'enq'oj-pueq, achoq pa kiwi' k'o-wi ri yakbel-ya'. Ronojel re' xban toq xq'aton-tzij ri rey Salomón.

²¹Jujun pilar k'o k'a kaji' jaj rik'in nik'aj raqen y oxi' jaj rik'in ka'i' q'a'aj ri rusutilen. Ri chupan jom y ri rupimil ri q'enq'oj-pueq oxi' ruwi' q'a'aj.

²²Y chikijujunal ri pilar k'o retz'aba'l ruwi' ri banon rik'in q'enq'oj-pueq y jun jaj rik'in ka'i' q'a'aj rupalen, y sutin-rij rik'in q'enq'oj-pueq achi'el cadena rubanik y ya'on kiwachibel granada chirij.

²³Y chikijujunal k'a ri retz'aba'l ri ruwi' ri pilar banon rik'in q'enq'oj-pueq, k'o k'a wok'al granada chupan y jumuch' waqlajuj chike ri granada kan jebel e q'alaj-pe.

²⁴Ri Nebuzaradán xeruchop kan chuqa' ri Seraías ri nimalej sacerdote, ri Sofonías ri ruka'n sacerdote y ri e oxi' achi'a' ri yechajin ruchi' ri rachoch ri Dios.

²⁵Chuqa' xuk'uaj-el jun aj-raqen pa kiwi' ri aj-labal, e wuqu' pixabanela' richin ri rey ri ek'o chiri' pa tinamit, ri aj-raqen kichin ri yetz'iban y oxk'al achi'a' ri kan yesamej rik'in rija'.

²⁶Ri Nebuzaradán xeruk'uaj-el konojel re winaqi' re' rik'in ri rey richin Babilonia ri k'o chiri' pa tinamit Riblá.

²⁷Y chiri' xerukamisaj-wi kan. Y ri ch'aqa' chik aj-Judá xe'uk'uex-el pa ximonri'il nej chire ri kiruwach'ulew.

²⁸Ja kajlabal re winaqi' re' ri xeruk'uaj-el pa ximonri'il ri Nabucodonosor: Chupan ri juna' waqxaqi' chire ri ruq'atbal-tzij xeruk'uaj-el e 3,023 aj-Judá.

²⁹Chuqa' chupan ri juna' waqxaqlajuj chire ri ruq'atbal-tzij, xeruk'uaj-el e 832 winaqi' aj-Jerusalem.

³⁰Chuqa' chupan ri juna' juwineq oxi' chire ri q'atbel-tzij richin ri Nabucodonosor, ri Nebuzaradán xeruk'uaj-el pa ximonri'il e 745 aj-Judá. Konojel k'a winaqi' ri xebe pa ximonri'il e 4,600.

³¹Chupan k'a ri q'ij juwineq wo'o' chire ri ik' kablajuj chire ri juna' juwineq wuqlajuj toq k'o pa ximonri'il ri Joaquín, rey richin Judá, jari' toq xuchop nuq'et-tzij ri rey Evil-merodac pa ruwi' ri Babilonia. Y rija' kan janila jebel runa'oj xuben rik'in ri Joaquín y xrelesaj-el pa cárcel.

³²Kan janila utz runa'oj xuben rik'in y kan ja rija' ri xuya' pa nabey chikiwech konojel ri ch'aqa' chik rey ri ek'o chiri' rik'in.

³³Keri' ri Joaquín man xukusaj ta chik ri tzieq ri xukusaj pa cárcel y kan xwa' k'a rik'in ri rey janipe' q'ij xk'ase-el.

³⁴Y kan ronojel ri xk'atzin chire ri Joaquín ri q'ij-q'ij, kan xya'ox chire roma ri rey richin Babilonia, k'a toq xken na ri Joaquín.