Read Kaqchikel Jer 6 Bible Online

Jer 6 - Kaqchikel bible

Jer 6

¹Chuqa' ri Dios nubij: Rix winaqi' aj-Benjamín kan tikanoj k'a akuchi nito-wi-el-iwi'. Kixanimej-el re wawe' pa tinamit Jerusalem. Tibexupuj ri trompeta chiri' pa tinamit Tecoa richin niya' rutzijol y tiya-q'anej jun retal rik'in jun sib, chiri' pa tinamit Bet-haquérem, roma peteneq jun wululen, jun nimalej ruk'ayewal ri peteneq kela' pa xaman.

²Kan xtik'is k'a ri tinamit Sión, stape' kan jun jebelej juyu' ri akuchi janila q'os k'o chuwech.

³Chiri' xkebe-wi ri yuq'unela' rik'in ri tzobaj taq kikarne'l y chiri' xtikipaba-q'anej ri kachoch e banon rik'in tzieq.

⁴Jak'a wakami ri e etzelanel iwichin nikibij-qa chikiwech rije': Tiqanaba-qi' richin nibeqabana' oyowal kik'in ri aj-Jerusalem. Wi yojapon ri nimaq'a', tiqachapa' oyowal pa nik'aj-q'ij, jak'a wi yojapon k'a tiqaq'ij, tiqachapa' oyowal ri chi'aq'a', yecha'.

⁶Yin Jehová ri k'o ronojel uchuq'a' pa nuq'a' ninya' ri rutzijol re' chike ri e etzelanel iwichin: Tichoyo' che' chunaqaj ri Jerusalem y tibana-q'anej q'a'n chirij richin yixok-qa rik'in ri tinamit ri', roma kan nojineq rik'in etzelal.

⁷Chiri' kan nibulbu'x ri etzelal achi'el ri ya' toq nibebulbu'x-pe chupan jun alaxibel-ya'. Ri chiri' xa kan xaxe chik kamik ri nibanatej y ri e sokotajineq kan chiri' e punupuxineq-wi. Chuqa' man jun bey yeban ri ruchojmilal, xa kan xaxe chik eleq' ri yeban.

⁸Y rix winaqi' aj-Jerusalem, tichojmirisaj k'a ri ik'aslen, roma wi man xtiben ta, yin kan xtinch'er-el-wi' iwik'in roma janila woyowal. Y kan xtinben chire ri iruwach'ulew chi xtok jun tz'iran, jun tinamit ri kan man jun chik wineq ri xtik'oje' kan chupan.

⁹Yin Jehová k'iytisanel richin ronojel kere' ninbij chiwe rix ri xkixkanej kan, chi ri e etzelanel iwichin kan jebel k'a xkixkikanoj achi'el toq nikanox ri uva chukojol ri ruq'a'. Kan jebel xtikitz'et wi man jun chik nikanej kan, xcha' ri Dios.

¹⁰Jak'a yin, Jeremías xinbij chire ri Dios: ¿Achike k'a xtak'axan wichin toq ninya' re' rutzijol re' chike? roma rije' man nikajo' ta nikak'axaj y man niq'ax ta chikiwech. Xa yeyojoben chirij ri ach'abel, y man niqa' ta chikiwech.

¹¹Kan woyowal achi'el rat y janila xikos yan richin ninkoch', xicha'. Roma ri' ri Dios nubij: Kan xtinya' k'a pa kiwi' ri taq ak'uala' ri ye'etz'an pa taq bey y chuqa' pa kiwi' ri alaboni' ri nikik'uaj-ki' pa taq tzobaj. Chuqa' chi achi'a' chi ixoqi' xke'uk'uex ta el pa ximonri'il, junan kik'in ri más taq e rijita'q.

¹²Y ri kachoch, ri kulew y ri kixjayilal xke'ok ta kichin ch'aqa' chik winaqi', roma yin kan xtintzeqej nuq'a' pa kiwi' konojel ri aj-Judá richin ninya' rutojbalil-mak pa kiwi'. Yin Jehová ri yibin.

¹³Chi ch'uti'q chi nima'q xaxe nikich'ob ri kichin-qa rije'. Ri nikibananej chi e q'alajirisey nuch'abel y ri e sacerdote xaxe q'oloj ri yekiben.

¹⁴Kan ek'o k'iy winaqi' richin ri tinamit ri ek'o pa q'axo'n, jak'a rije' xa nikibij chi k'o uxlanibel kik'in.

¹⁵Rije' ruk'amon ta richin nik'oje' kik'ix, roma ri itzel taq kibanobal. Jak'a rije' xa maneq kik'ix. Roma ri' toq xtinya' rutojbalil-mak pa kiwi', kan xtikipajk'ij kaqen y xketzaq achi'el ri ch'aqa' chik. Yin Jehová ri yibin.

¹⁶Yin Jehová ninbij chiwe: Kixpa'e' pa taq bey; titz'eta' y tik'utuj ri akuchi ek'o-wi ri utzilej taq bey richin ojer richin xtiwil uxlanibel-k'u'x. Jak'a rix xa xibij chi ni, roma rix man niwajo' ta nitzeqelibej ri bey ri'.

¹⁷Xenya' chajinela' richin chi xkibij chiwe chi tiya' ixikin chire ri trompeta. Jak'a rix xa xibij chi man niwajo' ta niya' ixikin chire.

¹⁸Roma ri' ninbij chike ri ch'aqa' chik tzobaj winaqi': Tiwak'axaj k'a y tiwetamaj k'a achike xtiberuk'uluwachij ri tinamit ri'.

¹⁹Ninbentaqa' k'a pe jun nimalej ruk'ayewal pa ruwi' re tinamit re' roma ri itzel taq kich'obonik. Man xkinimaj ta ri nuch'abel y xa kan xketzelaj kan ri nupixa'.

²⁰Kan man jun nuq'ajuj chuwe richin nik'en-pe pom ri k'o chiri' pa tinamit Sabá. Chuqa' man ninwajo' ta jubulej taq aji'j richin nej taq ruwach'ulew. Chuqa' man niqa' ta chinuwech ri poron taq chikopi' y kan man niqa' ta chinuwech ri ikamelabal.

²¹Roma ri' ninya' k'a pikbel pan ibey rix richin chi'iwonojel xkixtzaq; chi te'ej-tata'aj, chi alk'ualaxela', ri e iwachk'uljay y ri iwachpochel. Yin Jehová ri yibin.

²²Chuqa' yin Jehová ninbij: Titz'eta' na pe kere' pa xaman, xkepe jun tzobaj winaqi' chiwij ri janila kuchuq'a'.

²³Kan kinaban-pe-ki' richin nikiben oyowal iwik'in rix aj-Sión. Kan e kik'amalon k'a pe ri rute-kich'ab y ri kikum. Janila e mal y maneq joyowanik kik'in. Ri raqoj-chi'ij ri nikiben kan achi'el toq niwajin ri palou. Chuqa' kan e ch'okol-pe chikij taq kiej, xcha' ri Dios.

²⁴Y ri winaqi' aj-Jerusalem nikibij: Qak'axan k'a ri itzel kitzijol rije' y roma ri' ri xibinri'il rubanon chiqe richin maneq chik quchuq'a'. Kan ojk'o pa bis y pa q'axo'n achi'el ruq'axo'n jun ixoq toq nik'achoj yan chirij jun ti ral.

²⁵Man kixel-el richin yixbe pa juyu', ni man kixbiyaj pa taq bey, roma ri e etzelanel qichin kan kik'uan kikamisabal y kan k'o nimalej xibinri'il xabakuchi, yecha'.

²⁶K'ari' ri Dios xubij chike: Rix ri yixinwajo', tikusaj k'a itziaq richin bis retal richin k'o q'axo'n. Tibolqotila-iwi' pa chaj y kixk'oje' k'a pa bis achi'el toq yixbison chirij jun iwalk'ual ri kan xe'ok rija' y xken-el. Kixoq' k'a roma re jun bis re' kan janila nim, roma kan xtipe yan ri xtik'ison iwichin.

²⁷Chuqa' ri Jehová xubij chuwe: Yin xatinya' pa nutinamit, achi'el jun chajinel. Tawetamaj k'a y tatz'eta' jebel ri kibanobal rije', xcha' chuwe.

²⁸Y yin xinbij konojel rije' xa yekamulun-tzij, e banoy taq etzelal, xa e yakatajineq chuwij y kikowirisan-ki', e achi'el ri q'enq'oj-pueq y ri q'eqapueq.

²⁹Ri xupubel-q'aq' kan nisilon k'a, ri q'aq' nuben chi niya'er-qa ri chajipueq, jak'a xa man jun rejqalen, roma ri tz'il xa man xel ta kan.

³⁰Roma ri' ninbij chi rije' e achi'el ri saqipueq ri man nik'atzin ta chik, roma rat Jehová kan xe'awetzelaj.