Read Kaqchikel Jer 7 Bible Online

Jer 7 - Kaqchikel bible

Jer 7

¹Ri Jehová xch'on chik jun bey wik'in y xubij:

²Kak'oje' chiri' chuchi' ri wachoch ri k'o chuwa-jay y taya' re jun rutzijol re' chike ri awinaq.

³Yin Jehová ri k'iytisanel richin ronojel, ri in i-Dios. Ninbij tichojmirisaj ri ik'aslen y ri ibanobal y yin xtinya' q'ij chiwe richin xkixk'ase' chupan re ruwach'ulew re'.

⁴Man nikuquba' ik'u'x rik'in ri tz'ukun-tzij ri nikibij: Jare' ri rachoch ri Jehová, jare' ri rachoch ri Jehová, yecha'.

⁵Kan tichojmirisaj ri ik'aslen y ri ibanobal. Tibana' pa ruchojmilal chiwech-qa rix.

⁶Man ke'iya' pa tijoj-poqonal ri man e iwinaq ta, ni ri meba'i', ni ri malkani'. Man ke'ikamisaj winaqi' ri xa maneq kimak. Man ke'iya' kiq'ij ch'aqa' chik dios, ri xa nuk'en-pe ruk'ayewal pan iwi'.

⁷Wi xtiben ronojel re' yin xtinya' q'ij chiwe richin yixk'ase' re wawe' chupan re ruwach'ulew ri xinya' kan chike ri iwati't-imama'.

⁸Rix kan ikuquban ik'u'x rik'in ri tz'ukun taq tzij ri xa man jun utz nuk'en-pe chiwe.

⁹Yixeleq', yixkamisan, ri e k'ulan taq winaqi' yekikanoj kachibil richin yemakun kik'in, niya' itzij y xa man qitzij ta yixch'on, niporoj pom chuwech ri Baal, ye'iya' kiq'ij dios ri xa man e iwetaman ta kiwech,

¹⁰y k'ari' yixpe wawe' pa wachoch ri kan ch'aron chuwe yin, richin yixk'oje' chinuwech y rik'in ri' nich'ob chi utz niben ronojel ri xa itzel nintz'et yin.

¹¹¿Man kami ta jun jay kichin eleq'oma' ri ibanon chire ri wachoch, ri akuchi ninataj-wi ri nubi' yin? Roma yin keri' chuqa' nutz'eton. Yin Jehová ri yibin.

¹²Kixbiyin chiri' pa tinamit Siló ri akuchi xk'oje-wi ri wachoch ojer kan y titz'eta' jebel ri achike ri xinben rik'in ri tinamit ri', roma ri rumak ri nutinamit.

¹³Stape' k'iy bey nubin chiwe chi rix xa jantape' yixmakun, rix kan man iwajowan ta iniman nutzij y kan ja ri pa rutikeribel kan keri' ibanon.

¹⁴Roma ri' achi'el xink'is ri tinamit Siló, keri' xtinbenk'isa' ri wachoch ri kan ch'aron chuwe yin ri k'o wawe', stape' kan xinya' chiwe rix y chike ri iwati't-imama' y ri achoq ik'in ikuquban-wi ik'u'x rix.

¹⁵Kan xkixinwelesaj-el chinuwech achi'el xenwelesaj-el pan Israel konojel ri iwach'alal ri xek'oje' chiri', xcha'.

¹⁶Rat Jeremías man kach'on wik'in pa ruwi' re tinamit re'. Man k'a kakamela'an y man tak'utuj utzil chuwe koma rije', roma yin kan man xkatinwak'axaj ta.

¹⁷¿Man natz'et ta k'a ri nikiben rije' chiri' pa taq tinamit richin ri Judá y pa taq bey richin ri tinamit Jerusalem?

¹⁸Ri alk'ualaxela' nikimol-pe si', ri tata'aj nikibox ri q'aq', ri kixjayilal nikiben ke'en richin nikiben kaxlan-wey richin nikisuj chire ri ixoq dios rubini'an Reina Richin ri Kaj. Kan nikiyek woyowal roma ri' y chuqa' nikiyek janila woyowal toq nikiya' sipanik chikiwech dios ri man ketaman ta kiwech.

¹⁹Rije' nikiben chuwe chi niyakatej woyowal y pa ruwi' xa kiyon rije' nikiya' kik'ix.

²⁰Roma ri' yin Jehová ninbij chi kan ninwisq'opej k'a ri woyowal pa ruwi' re tinamit re', pa kiwi' re winaqi', pa kiwi' ri kichikop, pa kiwi' ri kiche' y ri kitiko'n ri ek'o pa taq juyu' y ri woyowal xtuben achi'el jun q'aq' ri man nichup ta k'a toq xtuk'is na ronojel.

²¹Yin Jehová ri k'iytisanel richin ronojel kere' ninbij chiwe rix nutinamit: Tiporoj chikop ri nik'is jumul y tisuju' ri kamelabel janipe' niwajo'. Chuqa' titija' ri ti'ij.

²²Jak'a toq yin xenwelesaj-pe ri iwati't-imama' chiri' pan Egipto, man jun xinbij chike richin nikisuj ta poron chikop o kamelabel chinuwech.

²³Xaxe xinbij chike chi wi nikak'axaj ri nuch'abel, yin xkinok ki-Dios y rije' xke'ok nutinamit. Chuqa' wi xkebe chupan ri nubey, kan utz k'a xkebe ri'.

²⁴Jak'a rije' man xkak'axaj ta, ni man xkinimaj ta nutzij. Xa kan ja ri itzel taq rurayibel ri kánima ri xuk'uan kichin. Pa ruk'exel chi xetzolin ta pe wik'in, xa xkipiskolij-el-ki' chinuwech.

²⁵Kan ja toq xe'el-pe ri iwati't-imama' pan Egipto k'a re wakami, yin e nutaqon-pe ri e nusamajela' ri yeq'alajirisan ri nuch'abel.

²⁶Jak'a ri iwati't-imama' xa man xkinimaj ta nutzij y man jun rejqalen xkiben chire ri nuch'abel. Y xa kan xkikowirisaj ri kánima y xa kan más itzel xkiben rije' chikiwech ri kati't-kimama'.

²⁷Rat Jeremías tabij ronojel re ch'abel re' chike, stape' man xkeniman ta chawe. Kach'on rik'in uchuq'a', stape' man xtikik'uluba' ta ri ach'abel.

²⁸Tabij chike: Ja rix ri' ri man xiwajo' ta xiwak'axaj ri ruch'abel ri Jehová ri qa-Dios, ni man xiwajo' ta ri pixabanik, ni man xikusaj ta chik ri qitzijri'il. Xa kan xaxe chik k'a ri man qitzij ta ri yixch'on.

²⁹Rix winaqi' richin ri tinamit Jerusalem tisokaj ri rusumal-iwi' y tik'aqa-el y kixbe'oq'-q'anej pa ruwi' la juyu'. Roma ri Jehová kan xixrixowaj yan y xixrumestaj yan kan, roma kan ja rix ri xixbanon chire richin xyakatej royowal chiwij, kacha' chike.

³⁰Chuqa' ri winaqi' aj-Judá, xa xkiben ri man utz ta nintz'et yin, kan xekiya' tiox chiri' pa wachoch akuchi ninatex-wi ri nubi' y kan man xkiya' ta wejqalen.

³¹Y xekipabala' k'a q'anej porobel ri chiri' pa Tófet*f3* pa taq'aj kojol juyu' Ben-hinom ri akuchi yekiporoj ri kalk'ual. Re' jun banobel ri man xinbij ta yin richin chi niban y kan man jun bey xpe ta pa wánima richin keri' nibanatej.

³²Roma ri' yin Jehová ninbij chi xtoqaqa yan k'a ri q'ij chi man xtubini'aj ta chik Tófet, ni taq'aj kojol juyu' Ben-hinom. Re' xa kan xtubini'aj taq'aj kojol juyu' richin kamisanik. Y chiri' xkemuq-wi janila chi kaminaqi' roma man jun chik akuchi xkemuq-wi.

³³Ri ch'aqa' chik kich'akul ri kaminaqi' xtik'atzin richin kiway ri aj-xik' taq chikopi' y ri chikopi' e richin k'echelaj y kan man jun k'a achike ri xke'oqotan-el.

³⁴Chiri' pa taq tinamit Judá y pa taq bey richin ri tinamit Jerusalem man jun chik bixanik richin nimaq'ij, o richin kikoten o ri bixanik richin k'ulubik, roma chijun ruwach'ulew xtitole' kan.