Read Kaqchikel Jer 8 Bible Online

Jer 8 - Kaqchikel bible

Jer 8

¹Yin Jehová ri yibin. Chupan ri q'ij ri' xke'elesex-pe chupan ri jul richin muqbel ri kibaqil ri rey, ri e aj-raqen kichin ri tinamit Judá, ri e sacerdote, ri e q'alajirisey nuch'abel y kibaqil konojel ri xek'oje' chiri' pa Jerusalem.

²Y ri baq ri' xketorix kan chuwech ri q'ij, ri ik' y ri ch'umila' ri kan janila xekajo' rije', xekisamajij, xekitzeqelibej, xekik'ulubej y xekiya' kiq'ij. Y ri baq ri' kan man jun k'a xtisik'on-el kichin richin xkemuq. Xkek'oje' kan chiri' pan ulew achi'el ri pamaj.

³Jak'a ri xkek'ase' kan chike ri e itzel taq winaqi', xabakuchi xkebek'oje-wi toq xentaluj yan el, rije' kan xtikirayij más ri kikamik chuwech ri kik'aslen. Yin Jehová ri k'iytisanel richin ronojel ri yibin.

⁴Y ri Dios xubij: Rat Jeremías tabij chike ri awinaq re jun rutzijol re': Ri wineq ri nitzaq, kan chi'anin niyakatej-q'anej. Chuqa' toq nuchop jun bey ri man ja ta, kan chi'anin nukanoj ri qitzij bey.

⁵Jak'a rix aj-Jerusalem, ¿achike k'a roma xa xiniq'ol? ¿Achike roma xiben richin xixyakatej chuwij y man xiwajo' ta xixzolin-pe wik'in?

⁶Kan jebel nuya'on nuxikin y kan xinwak'axaj, chi chi'iwonojel man nitzolej ta pe ik'u'x chupan ri imak. Jak'a rix nik'utuj chi achike ri xiben. Xa chi'iwonojel k'a itzeqeliben junan ri ibey achi'el nikiben ri kiej junanin e beneq pan oyowal.

⁷Chuqa' ri al, ri aj-xik' taq chikopi' ri yebe chikaj, ketaman toq nik'atzin yetzolin. Keri' chuqa' ri ch'aqa' chik aj-xik' taq chikopi' kan ketaman toq k'atzinel richin yebe juk'an chik ruwach'ulew. Jak'a rix ri nutinamit kan man iwetaman ta ri nuq'atoj-tzij yin.

⁸¿Achi'el toq yixtikir nibij chi ix aj-na'oj taq winaqi' roma k'o ri nupixa' iwik'in? Kan qitzij wi chi ri tijonela' xkik'ut ri man qitzij ta chiwech.

⁹Jak'a rix ri ix aj-na'oj xa xtiqasex iq'ij y kan xkixk'ixbitej. Xa kan xtiben achi'el ri chikopi' ri nikiya-ki' pa jun pikbel. ¿Akuchi kami k'o-wi ri ina'oj roma xa man xik'ul ta chi utzil ri nuch'abel?

¹⁰Roma ri' ri iwixjayilal xkenbenya' k'a chike ch'aqa' chik achi'a'. Chuqa' ri iwulew xtinya' chike ch'aqa' chik winaqi', roma chi ch'uti'q chi nima'q, chi'iwonojel rix xaxe ch'akonik ri man pa ruchojmilal ta ri nich'ob. Y ri nikibananej chi e q'alajirisey nuch'abel y ri e sacerdote, konojel rije' yesamej xaxe rik'in q'olonik.

¹¹Nikiben chi achi'el nikaq'omaj ri sokotajik toq nikibij: Ronojel utz beneq, toq xa ronojel beneq pa xulan.

¹²Rije' ruk'amon ta richin nik'oje' kik'ix, roma ri itzel taq kibanobal. Jak'a rije' xa maneq kik'ix. Roma ri' toq xtinya' rutojbalil-mak pa kiwi', kan xtikipajk'ij kaqen y xketzaq achi'el ri ch'aqa' chik. Yin Jehová ri yibin.

¹³Kan xtinben k'a chiwe achi'el toq niq'at ri trigo. Y kan man jun nik'oje' kan, achi'el toq niwux ri uva o ri wíkix. Y xaxe k'a xtik'oje' kan ri ruxaq ri xa e chaqi'j chik.

¹⁴Y chupan ri q'ij ri', rix xtibij: ¿Achike roma xojk'oje' kan wawe'? Tiqamolo-qi' qonojel richin yojok chupan ri qatinamit ri e sutin-kij rik'in tz'aq, richin niqoyobej ri qakamik, roma kan ja ri Jehová ri qa-Dios ri nibanon chiqe richin yojken y re' kan janila k'ey roma xa xojmakun chuwech rija'.

¹⁵Qoyoben k'a roj chi k'o ta uxlanibel-k'u'x y xa man jun k'a utz ri qilon. Qoyoben k'a ri qaraxnaqil y xaxe k'a ri nimalej xibinri'il ri k'o.

¹⁶Kan k'a kela' pa tinamit Dan, xak'axatej chi e peteneq chik ri e etzelanel qichin y nikixupuj pa kitza'n ri kiej. Y toq yeyijij kan nisilon chijun ri ruwach'ulew. Yepe richin nokik'isa' kan ri ruwach'ulew y ronojel beyomel, konojel ri qatinamit y qonojel roj, xkixcha'.

¹⁷Xtinbentaqa' k'a pe pan iwi' kumatzi' ri k'o kamisanel-ya' pa kichi' y yixbekiti'. Y kan man jun xtitikir xtiq'aton kichin, ni ta ri aj-itza'. Yin Jehová ri yibin.

¹⁸Jari' toq yin Jeremías, xinbij chi ri nuq'axo'n maneq chik raq'omal; ri wánima nimayamo' yan qa.

¹⁹Ri raqoj-chi'ij kichin ri nuwinaq nak'axatej chupan chijun ri ruwach'ulew y nikibij: Ri Jehová maneq chik wawe' pa qatinamit Sión. ¿Man qa-rey ta kami chik rija'?, xkecha'. Jak'a ri Jehová nubij: ¿Achike roma xiya' q'axo'n chuwe toq niya' kiq'ij ri wachibel, toq niya' kiq'ij dios ri xa man jun yek'atzin-wi y man iwetaman ta kiwech?, xcha'.

²⁰Y rije' nikibij: Xik'o yan ri q'ij richin niqak'ol ruwech ri qatiko'n; xk'is ri q'ij richin job, jak'a roj kan man jun k'a yojkolo-el re wawe', yecha'.

²¹Jak'a yin Jeremías, nintej poqon rik'in ri tijoj-poqonal ri nikik'owisaj ri nutinamit. Ri bis y ri nimalej xibinri'il xoqaqa yan wik'in.

²²K'ate' ta k'o jun raq'omal richin yek'achoj, achi'el ri k'o chiri' pa ruwach'ulew Galaad. K'ate' ta k'o jun aq'omanel kichin. ¿Achike roma man yek'achoj ta q'anej ri nuwinaq?