Read Kaqchikel Jer 9 Bible Online

Jer 9 - Kaqchikel bible

Jer 9

¹Jebel ta ri' xa ta ri runaq' taq nuwech achi'el ta jun ya' ri nalex-pe chaq k'ate' y nichoxin ta pe ri ruya'al-nuwech richin yinoq' chi paq'ij chi chi'aq'a', koma ri nuwinaq e kaminaqi' richin ri nutinamit.

²Jebel ta ri' xa ta k'o akuchi yik'oje-wi chiri' pa tz'iran ruwach'ulew richin chi yibe nej chire ri nutinamit, roma konojel xa man ja ta ri utz xkiben chuwech ri Jehová y xa ja ri ruche'el-kij ri xkiya' kan chuwech, xicha' yin.

³Y ri Jehová nubij: Xa kan beneq ruwech ye'el-pe tz'ukun taq tzij pa kichi' chikij ch'aqa' chik winaqi' achi'el toq yek'aq k'iy ch'ab. Chupan ri ruwach'ulew ri' más tz'ukun taq tzij ri yeban ke chuwech ri qitzij. Pa ruk'exel utz nikiben xa ja ri etzelal ri más nikiben. Kan man nikajo' ta nikibij chi ja yin ri in ki-Dios.

⁴Chi'ijujunal k'a tichajij-iwi' chuwech ri iwachibil. Man jun tukuquba' ruk'u'x rik'in ri rach'alal ri junan rukik'el rik'in, roma stape' kan ach'alalri'il xa nitz'ukun-tzij.

⁵Chikijujunal nikiq'ol-qa-ki' y man jun nibin ri qitzij. Xa kan ruk'ulun chik chike richin xaxe tz'ukun-tzij ri nikiben. Kan janila k'iy mul yemakun chupan ri q'ij y re' kan ruk'amon-pe kosik chike rije'.

⁶Tachajij-awi' roma kan chikikojol atk'o-wi. Y roma ri kiq'oloj, rije' nikibij chi man ketaman ta nuwech. Yin Jehová ri yibin.

⁷Roma ri' yin Jehová ri in k'iytisanel richin ronojel ninbij k'a chi kan man jun chik yitikir ninben kik'in ri nuwinaq, xaxe k'a achi'el niban chire ri q'eqapueq ri niya'erisex pa q'aq' richin yech'ajch'ojir-el.

⁸Ri kaq' rije' xa achi'el ri ch'ab, ri kan yekamisan. Kan jebel yech'on kik'in ri kachpochel, jak'a ri chikij xa nikiya' pikbel pa kibey.

⁹Roma ri' yin k'o chi ninya' rutojbalil-mak pa kiwi'. K'o chi ninya' ri ruk'ayewal ri ruk'amon nikik'ul re tinamit re', ncha' ri Jehová.

¹⁰Yin yinoq' y yibison roma ri k'echelaj. Yin ninbixaj jun bix richin bis roma ri juyu' richin soq'olbel, roma xa xek'at y man jun chik achike ye'ik'o pa kiwi'. Kan man nak'axex ta chik koq'ej ri awej y keri' chuqa' ri aj-xik' taq chikopi' y ri chikopi' richin k'echelaj. Konojel xa xe'animej yan el.

¹¹Y ri Dios xubij chi xtiberubana' chire ri tinamit Jerusalem chi xtipe jun wululen pa ruwi'. Chuqa' xtuben chire chi xtok kijul ri chikopi' achi'el utiwa'. Y chike ri ch'aqa' chik tinamit richin ri Judá xtuben richin xke'ok tz'iran taq ruwach'ulew y kan man jun chik wineq ri xtik'oje' chiri'.

¹²Y yin xink'utuj chire ri Dios achike rubanik richin niq'ax chinuwech ronojel re'. ¿Achoq chire ta k'a xuk'ut-wi-ri' ri Jehová ronojel re' richin chi nitikir nuq'alajirisaj chike ri ch'aqa' chik? ¿Achike roma re ruwach'ulew re' k'o pa ruk'ayewal y kan chaqi'j achi'el tz'iran ruwach'ulew ri kan man jun chik niq'ax?

¹³Ri Jehová kere' ri nubij: Ronojel re' xk'uluwachitej koma ri awinaq. Rije' xkimalij kan ri nupixa' ri xinya' yan chike. Man xkinimaj ta nutzij y kan man xkiben ta k'a ri xinbij chike.

¹⁴Xa xkiben k'a ri itzel rurayibel ri kánima y pa ruwi' ri' xkiya' k'a kiq'ij ch'aqa' chik dios achi'el xkiben ri kati't-kimama'.

¹⁵Roma ri' yin kan xtinben k'a chike, richin xtikitej k'ayilej-q'os y xtikiqum ya' ri nikamisan. Yin Jehová ri in k'iytisanel richin ronojel ri yibin.

¹⁶Kan xkentaluj k'a el pa jun ruwach'ulew ri man ketaman ta, ni ri kite-kitata'. Xtinben chi xketzeqelibex rik'in espada y kan man jun k'a chike rije' ri xtik'ase' kan, xcha' chuwe.

¹⁷Ri Jehová k'iytisanel richin ronojel nubij chi tiqak'axaj y tiqataqa' koyoxik ri ixoqi' ri kan ja kisamaj richin ye'oq'.

¹⁸K'ari' ri winaqi' xkibij: Kan kepe chi'anin richin chi ye'oq' qik'in richin keri' roj kan más xqojoq', k'a toq yenoj ri runaq' taq qawech rik'in ri ruya'al y kan xtibiyin k'a ruya'al-qawech.

¹⁹Roma pa tinamit Sión xak'axatej k'a jun raqoj-chi'ij ri nikibij: Ri qaruwach'ulew kan xk'oje' k'a kan pa wululen y pa k'ixbilal. Chuqa' kan xek'is k'a ri qachoch y roma ri' k'o chi xqojel-el.

²⁰Rix ixoqi' tiwak'axaj k'a ri rutzijol ri xuya-pe ri Jehová. Tik'utu' chikiwech ri iwal xtani' richin keri' chuqa' rije' nikibixaj re jun bix re' richin bis y chikiwech chuqa' ri kachibil.

²¹Ri kamik kan xok yan apo pa taq qachoch, chuqa' xok yan apo chiri' pa taq tobel. Chuqa' ri pa taq bey; ja ri taq ak'uala' ri yeken kan y pa taq nima'q ruwech bey richin molojri'il, ja ri alaboni' ri yeken kan.

²²Ri Dios kan rubin k'a chiqe chi ri kaminaqi' kan xkech'otot kan, achi'el ri pamaj ri ch'ototajineq kan pa juyu'. Y ri kich'akul ri kaminaqi' kan xkepunupuxin kan achi'el ri espiga ri nitzaq kan toq niq'at ri trigo y kan man jun nisik'o-el richin, xecha'.

²³Chirij ri', ri Jehová xubij: Tiqasaj-iwi' y man tinimirisaj k'a iwi' rix ri k'o na'oj iwik'in. Chuqa' rix ri k'o iq'ij, man tinimirisaj k'a iwi' rik'in ri'. Y rix ri ix beyoma' man tinimirisaj k'a iwi' roma ri beyomel.

²⁴Jak'a wi k'o ta jun ri nuna' ri' chi runimirisan-ri', kan tunimirisaj k'a ri' roma retaman chi ja yin Jehová y kan ronojel ninben rik'in ajowabel, ruchojmilal y joyowanik, roma kan jari' ri niqa' chinuwech. Yin Jehová ri yibin.

²⁵Ri winaqi' aj-Egipto, ri aj-Edom, ri aj-Amón, ri aj-Moab y ri ek'o pa tz'iran ruwach'ulew, konojel rije' k'o ketal chirij ri kich'akul y re etal re' nik'atzin richin nikisamajij ri ki-dios. Jak'a pa taq kánima, maneq re jun etal re'. Noqaqa yan k'a ri q'ij toq xtinya' rutojbalil-mak pa kiwi' konojel rije'. Y rix israelita chuqa' k'o iwetal,*f4* jak'a maneq pa taq iwánima. Y roma ri' junan kik'in rije' xtinya' rutojbalil-mak pan iwi'.