Read Kaqchikel Lam 3 Bible Online

Lam 3 - Kaqchikel bible

Lam 3

¹Ja yin ri' ri xiq'axan ronojel ri ruk'ayewal, roma ri royowal ri Dios.

²Ri Dios xirelesaj k'a el pa saqil akuchi k'o-wi rija', y xiruk'uaj k'a akuchi kan janila q'equ'm.

³Kan chuwij k'a yin xyakatej-wi. Kan jantape' k'a xuyek ri ruq'a' richin xuya' ruk'ayewal pa nuwi'.

⁴Xuben k'a chuwe chi ri nuch'akul kan chi'anin xrijix-qa. Ri nubaqil kan xerupaq'aq'ej.

⁵Kan xusutij-wij rik'in jun k'ayilej-q'axo'n, achi'el jun tz'aq. Kan man xitikir ta xinkol-wi' chuwech ri ruk'ayewal.

⁶Xuben chuwe chi xik'oje' pa jun q'equ'm, kan achi'el rubanon ri kich'akul ri winaqi' ri ojer keken-el.

⁷Xiruya' pa latz' y kan man yitikir ta yinel-el chupan. Ri ruk'ayewal kan janila ralal rubanon chuwij, achi'el xa ta ximil rik'in k'iy cadena.

⁸Stape' yisik'in richin nink'utuj to'onik, jak'a ri Jehová kan man nrak'axaj ta ri nuch'abel.

⁹Xerutz'apej k'a ronojel ri nubey, achi'el xa ta xuben-q'anej jun tz'aq ri banon rik'in abej. Y ri akuchi ninwajo' yibe-wi, ri Dios man nuya' ta q'ij chuwe.

¹⁰Yin xinna' chi ri Dios xiruchop richin xiruwech', kan achi'el k'a jun oso o jun koj ri k'o kiq'eleben. Keri' xuben ri Jehová wik'in yin.

¹¹

¹²Yin xinna' chi rija' xuchojmirisaj k'a ri ruk'aqbal-ch'ab, jak'a yin ri xiruya' richin xiruq'ijuj.

¹³Xuk'eq k'a ri ruch'ab y kan xirumej. Y kan xok k'a pa nupan ri ch'ab ri'.

¹⁴Konojel k'a ri nuwinaq xetze'en chuwij xinok k'a yakol kitze'en ronojel q'ij.

¹⁵Ri Dios xunojisaj ri nuk'aslen rik'in ruk'eyul. Kan achi'el k'a ri ruya'al ri k'ayilej-q'os ri xuya' chuwe richin xinqum.

¹⁶Ri wey ri ek'o pa nuchi' kan xerupaxij chi abej xinna' yin, ri rukiy kan xiruq'ututej y xiruqasaj k'a pan ulew.

¹⁷Yin xa kan xinmestaj yan ri uxlanibel-k'u'x. Man noqaqa ta chik chinuk'u'x achike ri' ri jebel yak'ase'.

¹⁸Ri wuchuq'a' xa kan xk'is yan; keri' chuqa' ri nukuqubabel-k'u'x rik'in ri Jehová xa kan xk'is-qa.

¹⁹Noqaqa chinuk'u'x ri q'axo'n ri nink'owisaj, chuqa' ri ruk'eyul ri nuk'aslen y ri nimalej ruk'ayewal ri ninq'axaj.

²⁰Toq ninch'ob-qa ronojel re q'axo'n re', ri wánima kan nimayamo-qa.

²¹Jak'a kan k'o jun ri ninwajo' chi jantape' ta k'o chinuk'u'x. Y kan rik'in re' kuqul-wi nuk'u'x.

²²Chi ri rajowabal ri Jehová kan man jun bey xtik'is. Ri rutzil rija' kan richin tibe-q'ij tibe-seq.

²³Kan ronojel k'a nimaq'a' nuya' k'ak'a' taq urtisanik pa qawi'. Kan man jun bey k'a yojrumalij kan, ronojel ri nusuj kan nuya'.

²⁴Ri qánima kan nubij k'a chi ja ri Jehová niya'on ronojel ri nik'atzin chiqe. Roma ri' rik'in rija' niqakuquba-wi qak'u'x.

²⁵Ri Jehová kan utz k'a qik'in wi niqakuquba' qak'u'x rik'in. Kan utz nuben qik'in ri yojkanon richin.

²⁶Kan más utz niqoyobej ri rutzil ri Jehová, Kan tiqoyobej k'a richin yojruto'.

²⁷Kan utz k'a niqaben chi kan ja yan ri pa qak'ajolil niqetamaj yojniman tzij.

²⁸Toq ri Dios nuya' jun ruk'ayewal pa qawi', más utz niqakuquba' qak'u'x y man jun niqabij.

²⁹Más utz tiqaqasaj-qi' k'a pan ulew, roma xa kan k'a k'o na to'onik xtiqil.

³⁰Wi ta niya'ox jun q'a' chiqapalej, kan tiqaya' q'ij richin niya'ox jun chik, y tiqakoch'o' ronojel ri yebix chiqij.

³¹Ri Jehová kan man oj rumalin ta kan jumul.

³²Stape' xuben chiqe chi xqaq'axaj tijoj-poqonal, xa kan nujoyowaj chik k'a qawech, roma ri rajowabal man jun bey xtik'is.

³³Roma ri Jehová man yojruya' ta pa tijoj-poqonal, y chuqa' man chaq k'ate' ta yojruya' pa bis.

³⁴Ri Jehová kan nutz'et ronojel banobel ri kan man e utz ta: Achi'el toq niqasex kiq'ij winaqi' ri ek'o pa cárcel;

³⁵Toq man pa ruchojmilal ta niq'at-tzij pa ruwi' jun chik, ri nimalej Dios kan nutz'et ronojel;

³⁶toq nijal rubanik ri qitzij toq k'o jun ch'ojikil, ronojel re banobel re' kan man utz ta nutz'et ri Jehová.

³⁷Man jun yojtikir niqaben wi ri Jehová man nuya' ta q'ij chiqe.

³⁸Kan ja ri Jehová ri niya'on ri ruk'ayewal pa qawi'. Chuqa' ja rija' ri niya'on ri urtisanik pa qawi'.

³⁹¿Achike k'a roma roj chaq yojwolol y ri Dios kan k'a ruya'on na qak'aslen stape' xa oj aj-maki'?

⁴⁰Tiqach'obo-qa rij ri bey ri qak'uan; y titzolej k'a pe qak'u'x rik'in ri Jehová.

⁴¹Qojch'on-q'anej rik'in ri Dios, tiqayaka-q'anej ri qaq'a' chuwech; kan tiqajacha' chuqa' ri qánima chire,

⁴²richin niqabij chi roj kan xojmakun-wi. Kan xqapaba-qi' chuwech rija', y roma ri' rija' man xukuy ta ri qamak.

⁴³Jehová kan xik'o chik ruwi' ri awoyowal chiqij y roma ri' xojatzeqelibej. Rat kan janila k'a e k'iy ri xe'akamisaj, y kan man xajoyowaj ta qawech.

⁴⁴Xapis k'a awi' chupan jun sutz' richin chi man xapon ta q'anej ri qach'owen awik'in.

⁴⁵Xaya' q'ij chike ri ch'aqa' chik tinamit richin xojkitze'ej y kan itzel xojkitz'et.

⁴⁶Roma ri' konojel ri e etzelanel qichin nikijeq pa kichi' chiqij.

⁴⁷Xqaqa k'a pa qawi' nimalej xibinri'il, k'iy pikbel, nima'q taq wululen y tijoj-poqonal. Ronojel re q'axo'n re' qajineq pa qawi'.

⁴⁸Kan nibiyin k'a ruya'al runaq'-nuwech, toq nintz'et chi ri nuwinaq xa kan xek'is.

⁴⁹Kan man yitane' ta chi oq'ej, roma man jani ninwil uxlanibel-k'u'x.

⁵⁰K'a ja toq ri Jehová, k'a chila' chikaj xirutz'et-pe, y jari' toq xiruto'.

⁵¹Ronojel ri nintz'et nuk'en-pe q'axo'n pa wánima, roma ri xkik'uluwachij ri xtani' richin ri nutinamit.

⁵²Man jun achike roma toq ri e etzelanel wichin xinkichop; y kan xinkichop achi'el nichap jun ti aj-xik' chikop.

⁵³Rije' kan xinkiya' pa jun jul richin ta xiken. Kan xinkik'eq k'a qa chi abej.

⁵⁴Ri ya' ri k'o chupan ri jul kan xapon k'a pa nujolon. Roma ri' kan xinch'ob-qa chi yiken.

⁵⁵Jari' k'a toq xinnataj ri abi' nimalej Jehová. Kan k'a chupan ri jul ri' k'a chiri' xatinwoyoj-wi.

⁵⁶Roma ri' rat kan xawak'axaj k'a ri nuch'abel. Toq xink'utuj utzil chawe, rat kan xinato'.

⁵⁷Kan xape k'a wik'in ri q'ij toq xatinwoyoj. Xabij k'a chuwe chi man tinxibij-wi'.

⁵⁸Rat Jehová kan xinato' chupan ri ruk'ayewal. Kan xakol k'a ri nuk'aslen.

⁵⁹Jehová, rat xatzu' k'a ri itzel ri kibanon chuwe. Tabana' k'a ri ruchojmilal wik'in yin.

⁶⁰Rat kan xatzu' k'a ri k'o pa kánima ri e etzelanel wichin. Xatz'et k'a ronojel ri kich'obon chuwij yin.

⁶¹Rat Jehová kan xawak'axaj yan k'a chi kan janila yinkiyoq'. Atzuliben k'a ronojel ri itzel taq kich'obonik ri yekiben chuwij.

⁶²Xawak'axaj yan k'a ri ch'abel ri yekibila' ri e yakatajineq chuwij. Rat kan atz'eton chik k'a ronojel ri ch'obonik ri jantape' yekibanala' chuwij,

⁶³Kan atzuliben k'a ronojel ri nikiben ri e yakatajineq chuwij. Pa ruwi' ronojel re', kan xaxe chik k'a yin ri yinkitzijoj.

⁶⁴Nimalej Jehová, taya' chike ri rutojbalil ri kibanobal. Taya' chike ri kan ruk'amon roma ri kimak.

⁶⁵Takowirisaj k'a ri kánima, Taya' q'ij chi niqaqa ri etzelanik pa kiwi'.

⁶⁶Rik'in ri awoyowal kan ke'atzeqelibej. Kan ke'ak'isa' k'a el chuwech re ruwach'ulew, nimalej Jehová.