Read Kaqchikel Lam 5 Bible Online

Lam 5 - Kaqchikel bible

Lam 5

¹Nimalej Jehová, tabana' jun utzil chiqe. Katzu'un-pe y tatzu' re k'ixbilal re ojk'o-wi.

²Ri ulew ri qichinan kan, wakami xa xok kan kichin ch'aqa' chik winaqi'. Ri qachoch, xa winaqi' aj juk'an chik ri xek'oje' kan chupan.

³Roj xa kan xojmeba'ir k'a kan roma maneq chik qatata'. Ri qate' xa xemalkanej k'a kan.

⁴Wakami ri qaya' kan k'o chi niqaloq'. Keri' chuqa' kan k'o chi niqaloq' ri qasi'.

⁵Ri e tzeqelibeyon qichin kan yojkiq'i' yan. Janila k'a kosik niqak'uaj, jak'a man jun bey yojuxlan.

⁶Xojk'oje' k'a chuxe' kitzij ri aj-Egipto y ri aj-Asiria, richin chi xkiya' ta juba' qaway.

⁷Ri qate-qatata' kan xemakun-wi, y xa xeken yan el. Kan ja roj k'a ri xojejqalen kan ri kimak.

⁸Wakami xa ojk'o k'a pa kiq'a' relik taq samajela'. Kan man jun k'a nikolon qichin.

⁹Chuwi-kamik k'a niqakanoj ri k'atzinel richin niqatej, koma ri e etzelanel qichin ri yepe pa tz'iran ruwach'ulew.

¹⁰Roma ri rukiy ri wayjal xpe jun nimalej k'aten chiqij, y roma ri' ri qatz'umal kan achi'el chik rupan horno nitzu'un.

¹¹Ri ixoqi' ri e richin ri tinamit Sión xa kan xqasex kiq'ij roma xek'oje' achi'a' kik'in, stape' rije' man xkajo' ta. Kan keri' chuqa' xkik'uluwachij konojel ri xtani' ri ek'o pa Judá.

¹²Ri e aj-raqen kan xetzeqebex k'a chikiq'a'. Ri e tata'al, kan man jun kejqalen xban chike.

¹³Ri alaboni' xe'ukusex richin nikisiloj ri abej ri nike'en. Ri k'ajola' kan xk'is k'a kuchuq'a' chi reraxik si'.

¹⁴Ri e tata'al kan e maneq chik k'a pan okibel chire ri qatinamit. Kan man nak'axatej ta chik ri kibix ri alaboni'.

¹⁵Kan man jun chik k'a ri kikoten pa qánima. Pa ruk'exel yojtzopin ta roma kikoten, xa kan ruyon q'axo'n k'o.

¹⁶Ri ruwaq'ijaj ri xk'oje' qik'in xa kan xk'is k'a jumul. Kan toq'ex k'a qawech wakami roma kan xojmakun.

¹⁷Roma ronojel re' kan nimayamo-qa ri qánima. Xq'equmatej yan qawech,

¹⁸roma ri juyu' richin Sión kan tolan-tolan chik, y xa kan xaxe k'a ri utiwa' ri yebiyajilan chiri'.

¹⁹Jak'a rat Jehová, kan jantape' k'a xtaq'et-tzij. Stape' xkeq'ax k'iy sol winaqi', ri awajawaren kan richin k'a jantape'.

²⁰¿Achike k'a roma achi'el oj amestan kan jumul? ¿Achike k'a roma kan k'iy yan chik juna' ri oj amalin kan?

²¹Tajoyowaj chik k'a qawech Jehová, richin kan xtitzolej chik k'a qak'u'x awik'in. Tabana' chi xqojkikot achi'el ri ojer kan.

²²Tabana' utzil chiqe stape' oj amalin kan. Niqajo' chi re' xtibanatej ta, stape' janila xyakatej awoyowal chiqij.