Read Kaqchikel Ez 11 Bible Online

Ez 11 - Kaqchikel bible

Ez 11

¹Y chiri' ri Jehová xiruyek-el y xiruq'axaj pan okibel ri k'o pa relebel-q'ij chire ri rachoch rija'. Y chiri' ek'o e juwineq wo'o' achi'a' aj-raqen richin ri tinamit. Chikikojol k'a rije' k'o ri Jaazanías ruk'ajol ri Azur y ri Pelatías ruk'ajol ri Benaías.

²Y ri Jehová xubij k'a chuwe: Rat Ezequiel, ninbij k'a chawe chi ja achi'a' re' ri e banoy etzelal y nikiya' k'a itzel taq na'oj chike ri awinaq.

³Y nikibila' k'a chi ri jay kan kow ek'o y man xketzaq ta qa. Chuqa' nikibij chi ri tinamit achi'el jun bojo'y y rije' e achi'el ri ti'ij ri jebel e yakel chupan.

⁴Roma ri' kach'on kik'in pa nubi' yin y taq'alajirisaj chikiwech ri nipe chikiwech-apo, xcha'.

⁵Y ri ru-Espíritu ri Jehová xok k'a wik'in richin ninq'alajirisaj ri nubij chuwe. Kere' k'a xubij: Rix israelita, kan k'o k'a ri ibin, jak'a yin kan wetaman ri ich'obonik.

⁶Rix kan janila k'a kamik ibanalon chupan re tinamit re' y kan e inojisan ri bey kik'in kaminaqi'.

⁷Roma ri' ninbij chi ri kaminaqi' ri', ja rije' e achi'el ri ti'ij y ri tinamit achi'el ri bojo'y. Jak'a rix ri k'a ix k'es kan xkixinwelesaj-el wawe'.

⁸Yin wetaman chi rix janila nixibij-iwi' chuwech ri labal, roma ri' xtinteq-pe labal pan iwi'. Yin Jehová kan ninben ri ninbij.

⁹Roma ri' yin kan xkixinwelesaj k'a el chupan re tinamit re', y xkixinjech-el pa kiq'a' winaqi' ri man e iwinaq ta, richin xtinya' rutojbalil pan iwi'.

¹⁰Kan xkixkamisex k'a chi espada chupan ri iruwach'ulew. Jak'a nabey k'o chi xtiwetamaj nuwech yin.

¹¹Re jun tinamit re' man xtok ta chiwe rix achi'el jun bojo'y akuchi yakel-wi ri ti'ij. Roma ja yin ri xkibeq'aton-tzij pan iwi' xabakuchi ta ixk'o-wi chupan ri iruwach'ulew.

¹²Rix xa xitzeqelibej ri kibanobal ri winaqi' kichin ri tinamit ri ek'o chi'inaqaj, xa man ibanon ta y man itaqen ta ri nubij ri jalajoj ruwech pixa' ri nuya'on chiwe. Jak'a re wakami kan xtiwetamaj k'a chi ja yin Jehová, xcha'.

¹³Rokik k'a yinajin chi ch'owen, jari' toq xtzaq-qa ri Pelatías ri ruk'ajol ri Benaías y kan jari' xken. Y yin kan jari' xinqasaj-wi' pan ulew, xisik'in y xinbij: ¡Ajaw! ¿Kan xqojak'is kami ri juba' ri k'a ojk'o kan chire ri e rijatzul kan ri Israel?, xicha'.

¹⁴K'ari' ri Jehová xch'on chik wik'in y xubij chuwe chi

¹⁵ri nuwinaq ri xek'oje' kan pa tinamit Jerusalem yech'on chiqij roj ri xojbe pa ximonri'il y nikibij chi roj ojk'o nej chire rija', y chike k'a rije' ri ek'o kan wawe' niya'ox-wi ri ruwach'ulew Israel richin ye'ok rajaw,

¹⁶Roma ri' ri Dios xuya' re jun rutzijol re' chuwe, ri nubij rija' pa kiwi' ri man xebe ta pa ximonri'il. Kere' k'a nubij: Yin xinelesan-el kichin rije' chi'ikojol rix y xentaluj pa taq ruwach'ulew richin e nuchajin jebel chiri' ka'i-oxi' q'ij.

¹⁷Jak'a ri ek'o pa ximonri'il ninbij chike: Yin xtinben chiwe richin xkixel-pe pa taq ruwach'ulew ri akuchi ixintalun-wi-el y kan xkixinmol chik. Y k'ari' xtinya' chik chiwe ri iruwach'ulew Israel.

¹⁸Y toq xkixtzolej-pe, rix kan xtimalij k'a kan ronojel ruwech itzel taq banobel y ri jalajoj kiwech wachibel ri k'o iwik'in.

¹⁹Y chupan ri q'ij ri', xtinjel k'a ri ibanik y kan xtinya' k'a jun k'ak'a' iwánima. Ri iwánima ri kan achi'el abej rubanon-pe, xtinwelesaj k'a el y xtinya' chik jun chiwe ri kan jebel ch'uch'uj.

²⁰Kere' xtinben chiwe richin chi yixtikir nitzeqelibej ri ruchojmilal y ri nupixa'. Rix kan xkixok chik k'a nutinamit y yin xkinok chik i-Dios.

²¹Jak'a ri ch'aqa' chik winaqi' ri xa k'a nikirayij nikiben ri itzel taq banobel ri yenwixowaj yin y nikiya' ruq'ij ri wachibel, kan xtinya' k'a tijoj-poqonal pa kiwi'. Yin Jehová ri yibin, xcha'.

²²Y toq ri Dios xtane' chi ch'owen, ri querubín kachibilan ri ki-rueda xeyakatej k'a el y xkirik'-el ri kixik' chikaj y ri ruk'ojlemal ri Jehová k'o pa kiwi' ri querubín ri'.

²³Keri' ri ruk'ojlemal ri Dios xbe-q'anej pa ruwi' ri rachoch rija'. Xeri' xel-el pa tinamit y k'ari' xbek'oje' pa ruwi' ri juyu' ri k'o pa relebel-q'ij.

²⁴Xeri' chupan ri wachik', ri ru-Espíritu ri Jehová xiruk'uaj chik el pa Babilonia akuchi ek'o-wi ri ch'aqa' chik nuwinaq.

²⁵Ronojel k'a ri xuk'ut ri Jehová chinuwech, yin kan xintzijoj k'a chike ri nuwinaq ri ek'o chiri' pa ximonri'il.