Read Kaqchikel Ez 12 Bible Online

Ez 12 - Kaqchikel bible

Ez 12

¹Ri Jehová xch'on chik wik'in y xubij chuwe:

²Rat Ezequiel, ri atk'o chikikojol jun tinamit ri yalan yakatajinenri'il rik'in, roma k'o runaq'-kiwech jak'a xa man nikajo' ta yetzu'un. K'o kixikin jak'a xa man nikajo' ta ye'ak'ex, roma ri winaqi' ri' xa kan e richin yakatajinenri'il.

³Roma ri' tachojmirisaj k'a juba' ri nik'atzin chawe, achi'el xa ta at beneq pa ximonri'il. Katel-el ri tiqaq'ij y yabe-kela' yabe-kela' xtaben. Toq ri awinaq xkatkitz'et rik'in juba' xtiq'ax chikiwech chi rije' e jun tinamit richin yakatajinenri'il. Y toq xkatane' katzolin-pe pan awachoch.

⁴Ronojel re' xtaben tiqaq'ij. Y chuqa' chupan ri chi'aq'a' ri'; xtaben achi'el xa ta at beneq pa ximonri'il.

⁵Jak'a ri chi'aq'a' xkatel-el, xtawop-el ri tz'aq richin ri awachoch y chiri' xkatel-wi-el chikiwech konojel ri awinaq.

⁶Chikiwech k'a rije' xkatel-wi-el toq nok yan qa ri aq'a' y xtajekej k'a el ri k'atzinel chawe y xtatz'apej k'a el ri apalej richin man natzu' ta kan ri ruwach'ulew ri naya' kan. Keri' xkatok jun retal chikiwech, xcha'.

⁷Yin kan xinben k'a ronojel ri xubij ri Jehová chuwe. Ja ri tiqaq'ij xinben-qa ri rutzil ri xtink'uaj-el, kan achi'el nuben jun wineq ri nuk'uex-el k'a juk'an chik. Y ri chi'aq'a' xinteq'uj ri tz'aq akuchi yinel-wi-el y xink'uaj-el chuwi-nutele'n ri nik'atzin chuwe. Y xinben ronojel re' chikiwech konojel ri nuwinaq.

⁸Y ri nimaq'a' yan chire ri ruka'n chik q'ij ri Jehová xch'on chik wik'in y xuk'utuj chuwe

⁹wi e tzijowineq wik'in ri nuwinaq ri k'o yakatajinenri'il kik'in y wi kik'utun chuwe ri achike yinajin chubanik.

¹⁰Y xubij chuwe chi xtinbij chike chi rija' xuya' re jun retal re' richin nich'on chirij ri rey ri k'o pa tinamit Jerusalem y chuqa' chikij ri winaqi' ri k'a ek'o na kan chiri'.

¹¹Y chuqa' k'o chi ninbij chi yin xinok jun retal chike ri nuwinaq ri ek'o wik'in, roma achi'el k'a ri xinben yin keri' xtiban chike ri ek'o kan pa Jerusalem toq xke'elesex-el y xke'uk'uex pa ximonri'il.

¹²Y ri Jehová xubij chuqa': Chupan ri q'ij ri' ja jun ri rey xtuk'uaj-el chuwi-rutele'n ri nik'atzin chire pa ximonri'il y k'a xtiq'equmer na qa k'ari' xtel-el chupan jun jul ri xtiban chire ri tz'aq richin ri tinamit. Kan xtutz'apej k'a el ri rupalej richin man nutz'et ta ri ruwach'ulew ri xtumalij kan.

¹³Jak'a yin Jehová kan xtinben k'a chire ri rey achi'el xa ta xtinrik' jun ya'l chirij y xtiqaqa pa pikbel. Y stape' rija' xtik'amer-pe pa Babilonia, man xtutz'et ta kan ri ruwach'ulew y wawe' k'a xtiken-wi.

¹⁴Y ri aj-labal y ri yechajin richin, kan xkentaluj k'a el chuwech ri ruwach'ulew y xkenkamisaj chi espada.

¹⁵K'a ja toq xkentaluj-el pa taq ruwach'ulew jari' toq xtiketamaj chi ja yin ri' ri in Jehová.

¹⁶Y xtinben k'a chi ek'o juba' ri xkekolotej kan chire ri oyowal, wayjal y ri yabil, richin keri' ri xkepe wawe' xtikitzijoj chike ri winaqi' chi roma ri itzel taq kibanobal ri xekibanala', roma ri' keri' kik'uluwachin. Y k'ari' xtiketamaj k'a chi ja yin Jehová, xcha'.

¹⁷Ri Jehová xch'on chik jun bey wik'in y xubij chuwe:

¹⁸Rat Ezequiel, toq xkawa-qa tabana' chi kan yak'ark'ot roma xibinri'il y toq xkatuk'ya' tabana' chi janila bis k'o awik'in.

¹⁹Y tabij chike ri awinaq wawe' pa Babilonia chi kere' ninbij yin Jehová pa kiwi' ri aj-Jerusalem y ri aj-Judá. Toq rije' nibekitija' ri kiway, xtikiben rik'in janila xibinri'il y kan yek'ark'ot k'a. Y toq xkebe'uk'ya' kan xtikina' janila bis. Ri ruwach'ulew kan xtibewulatej y xtibetole' kan, roma ri itzel taq kibanobal ri winaqi' ri'.

²⁰Konojel k'a tinamit ri ek'o chiri' kan xketole' kan y xtok tz'iran. K'ari' xtiketamaj ri winaqi' chi ja yin ri' ri in Jehová, xcha'.

²¹Ri Jehová xch'on chik jun bey wik'in y xubij chik chuwe:

²²Rat Ezequiel, chikikojol ri e awinaq israelita, k'o jun k'ambel-tzij ri nubij: Niq'ax k'a ri q'ij y ri nik'utumej chuwech ri q'alajirisey ruch'abel ri Dios xa man nibanatej ta, yecha'.

²³Jak'a rat tabij chike ri nuch'abel. Yin kan xtinben k'a chi man xtikamulux ta chik re jun k'ambel-tzij re' ri chiri' pan Israel. Pa ruk'exel re', ri q'ij xnaqajub yan pe richin nibebanatej ronojel ri xink'ut chawech.

²⁴Roma kan man jun bey chik xtik'oje' chi'ikojol jun wineq, ri k'o ta nik'utumej chuwech ri xa man qitzij ta, o k'o ta jun wineq ri nuq'alajirisaj ri peteneq y xa q'oloj ri nuben.

²⁵Roma ri', ja yin Jehová ri xkich'on y ri xtinbij kan xtinben y kan man xtinya' ta chik kan k'iy q'ij. Y kan xtinben k'a richin xtikitz'et ri awinaq ri e yakatajineq chuwij. Yin Jehová ri yibin, xcha'.

²⁶Ri Jehová xch'on chik jun bey wik'in y xubij chuwe:

²⁷Rat Ezequiel, ri awinaq chuqa' nikibij chi ri xink'ut chawech xa man xtibanatej yan ta, xa k'a janipe' na k'a xtibanatej.

²⁸Roma ri' tabij chike, chi ri nuch'abel man k'a janipe' ta na xtibebanatej, roma ri xinbij xa kan xtinben yan k'a, xcha'.