Read Kaqchikel Ez 14 Bible Online

Ez 14 - Kaqchikel bible

Ez 14

¹Y k'o k'a jun q'ij xepe wik'in jujun achi'a' ri k'o kiq'ij chikikojol ri nuwinaq, rije' xepe richin nikik'ulubej ri Jehová y xetz'uye-qa chinunaqaj.

²Jari' toq ri Jehová xch'on wik'in y xubij chuwe:

³Re achi'a' re' kijachon-ki' richin nikiya' kiq'ij ri wachibel y kan kijachon-ki' richin yemakun. Roma ri' yin man xtinya' ta pixabanik chike.

⁴Wi xabachike ta awinaq ri nuya' kiq'ij wachibel y kan rujachon-ri' richin nimakun y nipe ta awik'in richin nubij chawe chi kinak'ulubej yin, rat xa tabij chire chi ri ch'abel ri xtinbij yin chire xa ja ri nrajo' ri nimalej taq rumak, roma nuya' kiq'ij jalajoj kiwech wachibel.

⁵K'ari' yin xtinsiloj kánima konojel ri awinaq ri xkijech'ej kan ki' wik'in roma xa xekiya' kiq'ij wachibel.

⁶Roma ri' tabij chike ri awinaq re nubin yin: Titzolej-pe-ik'u'x wik'in y tich'ara-pe-iwi' kik'in ri wachibel y ke'iyala' kan ri itzel taq ibanobal ri kan man utz ta nintz'et.

⁷Wi k'o ta jun awinaq o jun chik wineq ri man awinaq ta ri k'o chiri' pan Israel, y xa kan rujech'en kan ri' wik'in, richin nujech-ri' richin nuya' ruq'ij ri wachibel y k'ari' rija' nipe awik'in richin yiruk'ulubej yin; re' kan ja yin k'a ri xkich'on-el rik'in.

⁸Kan xtinpaba' k'a wi' chuwech re jun wineq re' y kan xtinya' rutojbalil-mak pa ruwi'. Kan xtinwelesaj-el chikikojol ri awinaq y ri xtibanatej kan xtok jun k'ambel-tzij. K'ari' xtiketamaj chi ja yin Jehová.

⁹Wi k'o ta jun q'alajirisanel ri nuya' jun rutzijol ri xa man qitzij ta, re' ja yin Jehová ri xibanon chire chi tiq'olon. Y k'ari' yin xtinya' ri rutojbalil-mak pa ruwi' y kan xtinkamisaj.

¹⁰Y ri xk'uluben richin, keri' chuqa' xtinben rik'in.

¹¹Richin keri' ri awinaq israelita kan man xtikich'er ta kan ki' wik'in y xke'ok e ch'ajch'oj. Y keri' rije' kan xke'ok chik nutinamit y yin xkinok chik ki-Dios, xcha'.

¹²Ri Jehová xch'on chik wik'in y xubij chuwe:

¹³Rat Ezequiel, ninbij k'a chawe chi wi ri winaqi' richin jun ruwach'ulew yeyakatej chuwij y man nikiben ta ri ninbij chike, yin kan xkiyakatej k'a chikij y xtinya' ri rutojbalil-mak pa kiwi'. Yin man xtinya' ta chik pe ri achike nikitej, richin xtipe jun nimalej wayjal pa kiwi'. Y keri' xkeken k'a rije' y ri kawej.

¹⁴Y stape' chupan ri ruwach'ulew ri' e k'es ta na ri Noé, ri Daniel y ri Job, xa kan xaxe ta rije' ri xkekolotej kan, roma xaxe rije' ri choj kik'aslen.

¹⁵Y wi ta chuqa' xkenteq-el k'uxunela' taq chikopi' richin chi yekikamisaj konojel ri winaqi' y wi ta re ruwach'ulew re' xke'ok ta kan tz'iran, ri akuchi man jun wineq najowan niq'ax roma kan ek'o k'iy k'uxunela' taq chikopi'.

¹⁶Y wi k'a ek'o ta ri e oxi' achi'a' ri', yin Jehová kan ninbij k'a chi rije' man xketikir ta xkekikol ri kimi'al, ni man xketikir ta xkekikol ri kik'ajol. Xa kan xaxe ri e oxi' ri' ri xkekolotej y ri ruwach'ulew xa kan xtik'oje' kan tz'iran.

¹⁷Rik'in juba' xtinteq ta pe jun labal pa ruwi' ri ruwach'ulew richin xkeken k'a ri winaqi' y ri awej,

¹⁸y wi k'a ek'o ta na ri e oxi' achi'a' ri', yin Jehová kan ninbij k'a chi rije' man xketikir ta xkekikol ri kimi'al, ni man xketikir ta xkekikol ri kik'ajol. Xa kan xaxe rije' ri xkekolotej.

¹⁹Wi ta xtinteq-pe yabil chupan ri ruwach'ulew ri' y rik'in ta janila woyowal xtipe ta kamik pa kiwi' y xtinben chi xkeken ri winaqi' y ri awej;

²⁰y wi ta k'a e k'es ri Noé, ri Daniel y ri Job, rije' kan man xketikir ta xtikikol jun kimi'al ni jun kik'ajol. Xa kan xaxe rije' xkekolotej roma kan choj ri kik'aslen.

²¹Roma ri' kere' ninbij yin: Xtapon k'a ri q'ij chi yin xtinteq k'a pe kaji' ruwech ruk'ayewal pa ruwi' ri tinamit Jerusalem: Ri oyowal, ri wayjal, ri k'uxunela' taq chikopi' y ri yabil. Y re' kan xkeruk'is ri winaqi' y ri kawej.

²²Jak'a kan xaxe chik e ka'i-oxi' ri xtikolotej kan ri kik'aslen y rije' xkek'amer-pe junan awik'in. Rat Ezequiel, kan xtatz'et k'a ri itzel kibanobal rije' y k'ari' xtiq'ax chawech achike roma xpe ri k'ayewal ri' pa ruwi' ri tinamit Jerusalem.

²³Toq xtatz'et ri itzel kibanobal y ri itzel taq bey ri xkik'uaj, jari' toq xtikuqer ak'u'x roma xtiq'ax k'a chawech achike roma keri' xinben kik'in y man chaq k'ate' ta keri' xinben, xcha'.