Read Kaqchikel Ez 17 Bible Online

Ez 17 - Kaqchikel bible

Ez 17

¹Ri Jehová xch'on chik k'a jun bey wik'in y xubij chuwe:

²Rat Ezequiel, kach'on pa nubi' kik'in ri awinaq israelita y taya' jun k'ambel-tzij chikiwech.

³Y jare' k'a ri ninbij yin Jehová: K'o k'a jun nimalej kot y toq nurik' ri ruxik' kan janila nej napon-wi y ri rusumal kan jalajoj ri yetzu'un. Y k'o k'a jun q'ij re kot re' xapon k'a pa ruwach'ulew Líbano y xapon-q'anej pa rutum jun tiox-che' y xuchop.

⁴Xuq'ej-pe ri rutum richin xuk'uaj chupan jun ruwach'ulew ri akuchi ek'o janila k'ayinela'. Y chiri' chupan jun chike ri kitinamit xberutika' kan ri rutum ri che' ri'.

⁵Y ri kot xtzolin chiri' pan iruwach'ulew Israel y xuk'uaj-el jun ti ija'tz richin xberutika' kan pa jun ulew ri kan richin tiko'n y kan chuchi' k'a jun raqen-ya' xutik-wi-qa, ri akuchi janila ya' k'o.

⁶Ri ti ija'tz ri' xel k'a pe y xuben jun juwi-uva ri kan jebel ri ruq'a' y ri ruxaq. Kan janila k'a jebel xk'iy ri ruxe' y ri ruq'a' kan xek'iy richin choj xchojmin rik'in ri kot.

⁷Y xbek'ulun chik k'a pe jun nimalej kot ri nima'q ruxik' y janila pim-pim ri rusumal. Xeri' ri juwi-uva xa xbe-apo ri ruxe' y ri ruq'a' rik'in. Y xe'apon k'a rik'in ri ruka'n kot richin chi niya'ox más ruya',

⁸stape' kan xtik pa jun utzilej ulew chunaqaj ri akuchi k'o janila ya', richin kan jebel ruq'a' nik'oje' y chuqa' kan jebel niwachin.

⁹Jak'a yin Jehová ninbij chi re juwi-uva re' kan man utz ta xuben. Y roma ri' ri nabey kot xtuk'uq-el ri ruxe' y chuqa' xtuwux-el ri ruwech, richin xtichaqi'j-qa. Y re' man xtrajo' ta janila uchuq'a' ni k'iy winaqi' richin xtik'uqutej-el ri ruxe'.

¹⁰Stape' xtitik chik qa, man xtibejotayin ta chik pe. Y toq xtipe ri kaq'iq' re kere' pa relebel-q'ij, xa xtichaqi'j-qa ri ruxe', xcha'.

¹¹Y chirij re' ri Jehová xch'on chik jun bey wik'in y xubij chuwe chi

¹²kich'on kik'in ri nuwinaq ri man e nimey ta tzij y tinbij chike: ¿Xq'ax kami chiwech rix ronojel re'? Nel chi tzij chi ri rey ri k'o pa ruwi' ri ruwach'ulew Babilonia xapon pa Jerusalem y xuk'uaj-el ri rey richin Judá y keri' chuqa' xeruk'uaj-el ri aj-raqen y xeberuya' pa Babilonia.

¹³Xeri' xpe chik jun bey ri rey richin Babilonia y xuchop jun chike ri rijatzul kan ri rey y xuben k'a jun jikibel-tzij rik'in, richin nuq'et-tzij ri chiri'. K'ari' rija' xeruk'uaj-el ri ch'aqa' chik winaqi' ri k'o más kejqalen,

¹⁴richin chi ri q'atbel-tzij richin ri Jerusalem man xtik'oje' ta chik ruchuq'a' y man xtitikir ta xtiyakatej chik q'anej. Xaxe k'o chi nikitaqej ri jikibel-tzij ri' richin utz yek'oje'.

¹⁵Jak'a re rey re' kan xyakatej chirij ri rey richin Babilonia y ek'o xeruteq pa ruwach'ulew Egipto richin xuteq kik'amik kiej y chuqa' richin xuteq kik'amik pa ruk'iyal achi'a'. ¿Ninimaj kami rix ronojel re'? ¿Kan utz kami xtel chuwech ri xtitikir xtanimej-el y xtukol-el ri ruk'aslen? ¿Nitikir kami nanimej-el jun ri man xutaqej ta ri jikibel-tzij ri xuben?

¹⁶Yin Jehová ninya' nutzij chi kan xtiken ri rey ri' ri chiri' pa Babilonia, roma xuben chire ri rutzij ri xuya' chi man jun rejqalen y man xutaqej ta ri jikibel-tzij ri xuben rik'in ri rey ri xya'on kan ri q'atbel-tzij pa ruq'a'.

¹⁷Y ri rey richin Egipto man janipe' ta chi to'onik ri xtuben kik'in toq ri aj-Babilonia xkeruchop chi oyowal ri aj-Judá, toq rije' xtikiben ri tz'aq ri banon rik'in ulew chirij ri tinamit y toq xtikiben jun raq'arik bey richin yetikir ye'ok-qa chupan ri tinamit.

¹⁸Rija' xujikiba' rutzij, jak'a xa man xuya' ta rejqalen y man xutaqej ta y roma ri' man xtitikir ta k'a xtanimej-el.

¹⁹Y roma ri' yin Jehová ninbij chi xtinya' rutojbalil-mak pa ruwi' roma xa man xuya' ta rejqalen y man xutaqej ta ri jikibel-tzij ri xuben wik'in.

²⁰Yin xtinben k'a chire chi achi'el xtiqaqa pa jun ya'l y kan rik'in ri' xtinchop-wi. K'ari' xtink'uaj-el pa ruwach'ulew Babilonia y chiri' k'a xtinbenq'ata-tzij pa ruwi', roma man xuben ta ri xinwajo' yin.

²¹Ri más e jebel taq aj-labal xa xkeken pan oyowal y ri k'a xkekolotej na kan xa xkentaluj chuwech re ruwach'ulew. K'ari' xtiketamaj chi ja yin Jehová ri yibin.

²²Roma ri' kere' k'a ninbij yin: Ja yin ri xkinuk'uan-el jun rutum ri tiox-che' y xtintik chik k'a pa ruwi' jun juyu' ri nej jotol.

²³Pa ruwi' ri juyu' ri más nej jotol ri k'o pa ruwach'ulew Israel, chiri' k'a xtintik-wi kan. Xtik'oje' ruq'a' y xtiwachin k'a y xtok chuqa' jun jebelej tiox-che'. Y jalajoj kiwech aj-xik' taq chikopi' ri xtibekibana' kisok pa taq ruq'a' y chiri' xkebek'ase-wi.

²⁴Y kan konojel k'a che' ri ek'o pa taq juyu' xtiketamaj chi ja yin Jehová. Yin xtintorij xabachike che' ri runimirisan-ri' y ri ko'ol che' xtinben-q'anej nim chire. Yin ninchaqirisaj ri che' ri rex-rex rubanon y ninben rex chire ri che' chaqi'j. Yin Jehová ri yibin y kan ninben k'a ri ninbij, xcha'.