Read Kaqchikel Ez 21 Bible Online

Ez 21 - Kaqchikel bible

Ez 21

¹Ri Jehová xch'on chik wik'in y xubij chuwe:

²Rat Ezequiel, katzu'un kela' pa Jerusalem y kach'on chikij ri akuchi nikiya' kiq'ij ri ki-dios y chirij chijun ruwach'ulew.

³Yin kan xkinok k'a etzelanel kichin y xtinwelesaj ri nu-espada chikij y kan xkenkamisaj konojel ri winaqi', ri choj kik'aslen y ri aj-maki'.

⁴Ja', yin kan xkenkamisaj konojel ri choj kik'aslen y ri man choj ta ri kik'aslen, nitiker-pe pa xaman y napon k'a pa xokon. Y ri nu-espada man nitane' ta chire ri kamik.

⁵Y chijun k'a ri ruwach'ulew xtiketamaj chi ja yin Jehová ri in yakatajineq chikij rik'in espada y man xtinyek ta qa pa ruk'ojelibal.

⁶Y rat Ezequiel, kan katoq' k'a rik'in janila bis y q'axo'n.

⁷Y wi ta xtikik'utuj chawe chi achike roma yatoq', rat xtabij chike chi roma k'o jun ri xtibebanatej. Y toq xtoqaqa xtuben k'a chire chijun ri ruwach'ulew chi ri winaqi' xtikimalij kik'u'x y xtik'is k'a kuchuq'a' y konojel xkebaybot roma xibinri'il. Kan xtapon yan k'a ri ramaj richin xtibebanatej re', xcha'.

⁸Ri Jehová xch'on chik jun bey wik'in y xubij chuwe:

⁹Rat Ezequiel, kan taq'alajirisaj k'a ri nuch'abel. Ri nu-espada kan jebel chik banon rey y chuqa' jebel chik josq'in.

¹⁰Xban yan k'a rey richin nibekusex richin nibekamisan Kan xjosq'ix yan k'a jebel, y kan achi'el koyopa' ri xtuben. Y kan ya'on chik richin nikamisan.*f5*

¹¹Xjosq'ix yan k'a jebel richin chi k'o jun nuk'uan. Ri espada xban yan k'a rey y kan xjosq'ix yan, richin xya'ox pa ruq'a' ri kamisanel.

¹²Y rat Ezequiel, kasik'in k'a chi oq'ej rik'in janila bis, roma re espada re' kan k'o chik pa kiwi' ri awinaq. Chuqa' richin xkerukamisaj konojel ri e q'atoy taq tzij ri ek'o pa Judá. Y junan k'a xkeken kik'in ri ch'aqa' chik winaqi'. Roma ri' takajila' k'a ruwa-ak'u'x roma bis.

¹³Yin ninbij chi kan nibanatej-wi, roma ri rey kan nik'uluman chuqa'. Yin Jehová ri ink'o pa ruwi' ronojel ri yibin.

¹⁴Y rat Ezequiel, taq'alajirisaj k'a ri nuch'abel, k'ari' xtapaq'apa' ri aq'a' retal richin k'o ch'akonik. Ri espada kan man xtitane' ta qa richin nikamisan, y kan yerukamisaj konojel winaqi' ri ek'o xabakuchi.

¹⁵Roma ri' kan xtimayamo-qa ri kánima; kan janila k'a e k'iy ri xkeken. Pa taq ronojel jay xtapon ri kamik, ja espada re' ri josq'in chik jebel richin nuk'eq koyopa', y e k'iy k'a ri xkerukamisaj.

¹⁶Ri espada ri' kan jebel k'a xtiqupin pa rijkiq'a' y pa rajxokon. Xabakuchi k'a nibe-wi, kan nikamisan.

¹⁷Yin chuqa' kan xtinpaq'apa' k'a nuq'a' roma ri ch'akonik ri', y xtiqaqa ruwi' ri woyowal. Yin Jehová ri yibin, xcha'.

¹⁸Ri Jehová xch'on chik k'a jun bey wik'in y xubij:

¹⁹Rat Ezequiel, taya' k'a ketal ka'i' bey richin keri' ri rey richin ri Babilonia nitikir nucha' jun chike ri ka'i' bey ri' ri akuchi xtapon-wi, roma nipe yan rik'in ri ru-espada. Y akuchi nuch'er kan ri' ri ka'i' bey taya' jun retal akuchi nibe-wi ri jun bey y akuchi nibe-wi ri jun chik.

²⁰Y jun chike re bey re' napon pa tinamit Rabá ri k'o pa ruwach'ulew Amón. Y ri jun chik napon pa Jerusalem chupan ri ruwach'ulew Judá.

²¹Toq ri rey richin Babilonia xtapon akuchi nuch'er kan ri' ri bey, jari' toq xtuch'ob k'a ri achike bey xtuk'uaj. Xtuk'ulubej k'a ri wachibel, xtrelesaj k'a jun ch'ab pa ruk'ojelibal richin nretamaj ri bey y xtukamisaj jun chikop richin jebel xtunik'oj ri rusase' richin nretamaj akuchi nibe-wi.

²²Y toq xtrelesaj ri ch'ab, kan k'o-pe ri retal chirij richin ja ri Jerusalem niberuchapa' chi oyowal. Y toq xtapon chiri', xtubij chi tikichojmirisaj ri che' richin nikitzeq ruchi' ri tinamit. Xkeruteq richin nibekibana' kamik y xtureq k'a ruchi' richin nichap ri labal. Chuqa' xtubij chi tiq'ijux ri ruchi' ri tinamit, tikibana' jun raq'arik bey chirij ri tz'aq richin xke'ok chupan y tikibana-q'anej ri tz'aq ri banon rik'in ulew richin nikewaj-ki'.

²³Jak'a ri winaqi' ri ek'o chupan ri tinamit man xtikinimaj ta, roma rije' xjunamatej-kiwech roma kibanon jun jikibel-tzij kik'in ri aj-Babilonia. Jak'a ri rey nunataj chike ri kimak ri kibanon y chirij ri' k'ari' xke'uk'uex-el.

²⁴Roma ri' tabij chike ri awinaq chi yin Jehová kan wetaman ri kiyakatajinenri'il y kan janila k'a niq'alajin chinuwech. Chuqa' niq'alajin chinuwech ronojel ri kimak y roma ri' rije' k'o chi xke'uk'uex-el.

²⁵Chuqa' tabij chire ri rey richin Judá chi rija' jun banoy etzelal y kan man nuya' ta nuq'ij y chi kan ninaqajub yan k'a ri ramaj richin xtuk'ul ri rutojbalil rumak.

²⁶Kan xtelesex k'a chire ri nimalej sacerdote ri kuchubel-rujolon ri retal rusamaj y chuqa' xtelesex k'a el ri ru-corona ri rey. Rije' xtiqasex kiq'ij y ri ch'aqa' chik winaqi' xtinimirisex-q'anej kiq'ij rik'in ri kisamaj.

²⁷Y keri' xtibanatej, k'a toq xtipe na ri qitzij q'atoy-tzij k'a chire rija' xtinjech-wi.

²⁸Rat Ezequiel, taq'alajirisaj ri nuch'abel yin Jehová pa kiwi' ri aj-Amón ri xetze'en chikij ri awinaq aj-Israel y tabij chike: Ri espada kan eleneq chik pa ruk'ojelibal richin niberubana' kamik. Kan jebel chik banon rey richin nikamisan. Xjosq'ix yan y kan nirepelun chik.

²⁹Rix amonita kan ikuquban ik'u'x kik'in ri yeq'alajirisan chiwech ri man e qitzij ta y nikibananej chi nikil ri xa tz'ukun-tzij. Jak'a ri espada kan naqaj chik k'o-pe chiwij richin yixken, roma xa xapon yan ri q'ij richin ninya' rutojbalil-mak pan iwi'.

³⁰Tiyaka-qa pa ruk'ojelibal ri i-espada, roma yin xtinq'et-tzij pan wi' chiri' ri akuchi xixalex-wi.

³¹Kan xtinwelesaj k'a woyowal chiwij. Rik'in ri ruq'aq'arinen ri woyowal kan xtitzijtej q'aq' chiwij y xkixinjech k'a pa kiq'a' ri e itzel taq winaqi' ri xkewulan ronojel.

³²Kan xkixk'at y ri ikik'el kan xtibiyin chuwech re ruwach'ulew y kan man jun chik xtinatan iwichin. Yin Jehová ri yibin, xcha'.