Read Kaqchikel Ez 22 Bible Online

Ez 22 - Kaqchikel bible

Ez 22

¹Chirij re' ri Jehová xch'on chik wik'in y xubij chuwe:

²Rat Ezequiel, xapon yan ri q'ij richin xtiq'at-tzij pa ruwi' ri Jerusalem, roma jun tinamit ri ruyon kamik e rubanalon. Kan taq'alajirisaj chuwech ronojel rumak ri kan man utz ta nintz'et.

³Y tabij k'a chike ri winaqi' aj chiri' ri ninbij yin. Rix ix jun tinamit ri ix kamisanel y ye'iben-q'anej wachibel richin chi yixok man ix ch'ajch'oj ta.

⁴Rik'in k'a ronojel kamik ri ibanalon y niya' kiq'ij ri wachibel, kan ix makuwineq-wi, roma ri' man yixqa' ta chik chinuwech. Y roma ronojel re' kan xiben richin noqaqa yan ri k'isibel taq q'ij richin ri ik'aslen. Roma ri' yin xtinben chike ri ch'aqa' chik tinamit chi xketze'en y xkech'on itzel chiwij.

⁵Y konojel ri ek'o nej-naqaj kan xkixkitze'ej rix tinamit ri eleneq itzel itzijol chi ek'o jalajoj ruwech mak ibanalon.

⁶Konojel k'a ri tata'al ri ek'o chiri' nikikusaj ri kuchuq'a' richin nikiben kamik,

⁷Ek'o winaqi' chi'ikojol ri man nikiya' ta kiq'ij ri kite-kitata'. Chuqa' rix niben chike chi nikitej poqon ri man e iwinaq ta, y kan nik'o chik ruwi' ri niben chike ri meba'i' y ri malkani'.

⁸Man niya' ta k'a rejqalen ronojel ri e ch'aron chuwe yin y chuqa' kan man iya'on ta rejqalen ri q'ij richin uxlanen.

⁹Chuqa' nitz'uk-tzij richin yeken ch'aqa' chik winaqi' ri xa man jun kimak. Yixbe k'a pa taq nima-wa'in richin niya' kiq'ij ri wachibel pa ruwi' taq juyu', y chiri' xaxe jalajoj kiwech itzel taq banobel ri ye'iben.

¹⁰K'o jujun chiwe rix yixk'oje-qa kik'in ri ite' o kik'in ri iyijte', o kik'in ixoqi' ri k'o yabil richin chi ik' chike,

¹¹o kik'in ri kixjayilal ri iwachpochel, o kik'in iwali', o iwana'.

¹²Chuqa' jujun chiwe rix yixtoj richin niben jun kamik. Niya' méro pa qajik chike ri iwinaq y kan nik'utuj ral. Y jujun chiwe rix janila k'iy ral ri méro nik'utuj chike ri man e iwinaq ta. Janila k'iy nik'utuj chike ri iwachpochel toq rije' ek'o pa ruk'ayewal. Y pa ruwi' ronojel re' kan xinimestaj kan yin Jehová ri ink'o pa ruwi' ronojel.

¹³Yin kan xtintzeqej k'a ri nuq'a' chiwij roma ronojel ri ich'akon y xa man qitzij ta y roma chuqa' ri kamisanik ri ibanalon.

¹⁴¿Xkixtikir kami xtipaba-iwi' chinuwech toq yin xkiyakatej chiwij? Yin Jehová ri yibin y kan xtinben k'a ri ninbij.

¹⁵Kan xkixintaluj k'a el pa taq ruwach'ulew y kan xkixkiratej k'a el chikikojol ri winaqi' richin chijun ruwach'ulew. Y chirij ri' xtinben chi xtik'is ri itzel taq ibanobal.

¹⁶Y toq xtibanatej re', rix kan man jun k'a iwejqalen xtuben chikikojol ch'aqa' chik winaqi', y k'ari' xtiwetamaj chi ja yin Jehová, xcha'.

¹⁷Ri Jehová xch'on chik jun bey wik'in y xubij chuwe:

¹⁸Rat Ezequiel, ninbij k'a chawe chi ri awinaq aj-Judá xa xe'ok achi'el ri tz'il ri nel kan toq niya'erisex ri saqipueq, ri q'enq'oj-pueq, ri estaño, q'eqapueq y ri chajipueq ri yek'oje' kan chupan ri horno.

¹⁹Roma ri' tabij chike ri ninbij yin. Rix xa xixok k'a jun tz'il chinuwech yin, y roma ri' xkixinmol pa tinamit Jerusalem.

²⁰Ri samajiy pueq numol ronojel re' y nuya' pan horno richin nuya'erisaj richin nrelesaj ri saqipueq. Keri' chuqa' xtinben iwik'in yin. Xkixinmol k'a y xtinya' ruk'ayewal pan iwi' ri achi'el q'aq'. Y keri' rix xkixinya'erisaj.

²²Kan achi'el k'a niya'erisex ri saqipueq pa runik'ajal ri horno, kan keri' xtinben chiwe yin chiri' pa runik'ajal ri tinamit. Richin keri' xtiwetamaj k'a chi ja yin Jehová ri xtinwelesaj woyowal chiwij, xcha'.

²³Ri Jehová xch'on chik wik'in y xubij chuwe:

²⁴Rat Ezequiel, kere' tabij chike ri awinaq: Rix ri ixk'o pa ruk'ayewal y roma ix jun tinamit ri man ix ch'ajch'oj ta, roma ri' man qajineq ta job pan iwi'.

²⁵Ri yeq'aton-tzij chiri' e achi'el xa ta ri koj ri yewuyin chikij ri winaqi' y kan yekiwech' ri e kichapon. Rije' yekikamisaj ri winaqi' achi'el ri koj yekik'ux ch'aqa' chik chikopi'. Re q'atoy taq tzij re' kan yekik'en k'a kan ronojel ri k'o kik'in. Chuqa' e k'iy k'a ixoqi' ri xemalkanej kan koma rije'.

²⁶Ri sacerdote xa xkiq'ej ruwi' ri nupixa' y man xkiya' ta rejqalen ronojel ri kan e ch'aron richin pa nusamaj yin. Man xkiya' ta rukojolil ri utz y ri man utz ta. Chuqa' yekitijoj chi maneq rukojolil ri ch'ajch'oj rik'in ri man ch'ajch'oj ta. Y pa ruwi' ronojel re' man nikiya' ta rejqalen ri q'ij richin uxlanen. Y roma re' kan nuq'alajirisaj chi rije' man nikiya' ta wejqalen.

²⁷Y ri e aj-raqen xa e achi'el utiwa' ri kan yekiwech' ri yekichop. Yekikamisaj k'a ri winaqi' richin chi ja rije' ri yebeyomer-q'anej.

²⁸Ri man e qitzij ta q'alajirisanela', xa nikewaj ri man utz ta, richin man jun yetz'eton, achi'el xa ta nichumex jun tz'aq richin man nitz'et ta ri k'o chupan. Nikibij chi k'o nink'ut chikiwech y nikiya' rutzijol ri xa man qitzij ta, jak'a yin xa man in ch'owineq ta kik'in.

²⁹Y rix winaqi' xa niwelesaj beyomel chuwi-kiq'a' ri xa kichin ch'aqa' chik, chuqa' ichapon rubanik eleq', ye'iya' pa tijoj-poqonal ri man jun k'o kik'in y ri man e iwinaq ta. Y man niben ta pa ruchojmilal, kacha' chike.

³⁰Jak'a yin kan nukanon-pe jun chikikojol ri winaqi' ri' richin nich'on ta wik'in pa kiwi' rije', richin keri' man xkek'is ta. Jak'a kan man jun wilon.

³¹Roma ri' kan xtinwelesaj k'a woyowal chikij y kan xkenk'is roma ri ruq'aq'arinen ri woyowal, richin keri' niqaqa pa kiwi' rije' ri kimak. Yin Jehová ri yibin, xcha'.