Read Kaqchikel Ez 25 Bible Online

Ez 25 - Kaqchikel bible

Ez 25

¹Ri Jehová xch'on chik jun bey wik'in y xubij chuwe chi

²tinya' k'a ri nutzubal chupan ri ruwach'ulew Amón y tinq'alajirisaj-el pa rubi' rija' ri achike xtipe chikiwech-apo.

³Y jare' ri rutzijol ri xuya' chike ri aj-Amón: Tiwak'axaj ri nuch'abel yin Jehová. Rix kan xixkikot k'a xitz'et chi ri wachoch man xya'ox ta rejqalen y chuqa' toq ri ruwach'ulew Judá xa xwuluwu-qa y ri winaqi' aj chiri' xe'uk'uex-el pa ximonri'il.

⁴Roma ri' yin xkixinjech-el pa kiq'a' ri winaqi' ri ek'o pa relebel-q'ij y ja rije' ri xke'ok kan chuwech ri iwulew y chiri' k'a xkek'oje-wi-qa. Y ja rije' ri xketijo ri ruwech ri itiko'n, chuqa' ja rije' ri xkequmun ri leche.

⁵Xtinben k'a chire ri itinamit Rabá chi xtok jun kisoq'olbal camello y ri ch'aqa' chik iwulew kan xtinben k'a chire richin chiri' xkeyuq'ux ri karne'l. Y toq xtik'uluwachitej re', k'ari' xtiketamaj chi ja yin Jehová ri ink'o pa ruwi' ronojel.

⁶Ja yin Jehová ri yibin. Y rix aj-Amón, toq ri ruwach'ulew Judá xa xwuluwu-qa, rik'in k'a kikoten xipaq'apa-iq'a' y chuqa' rik'in k'a ronojel iwánima xe'iwetzelaj.

⁷Roma ri' kan xkiyakatej k'a chiwij y xkixinjech k'a el pa kiq'a' ch'aqa' chik winaqi' richin chi nikelesaj kan chiwe ronojel ri k'o iwik'in. Kan xtinben k'a chiwe chi xkixk'is jumul richin man xtipaba' ta chik q'anej ri iruwach'ulew. Y ri ka'i-oxi' chik ri xkek'oje' kan, xtiketamaj chi ja yin Jehová ri ink'o pa ruwi' ronojel, xcha'.

⁸Ri Jehová xubij: Ri ruwach'ulew Moab y chuqa' ri tinamit Seir nikibij chi ri ruwach'ulew Judá junan rubanik kik'in ri ch'aqa' chik ruwach'ulew.

⁹Roma ri' yin xkensok k'a ri winaqi' aj-Moab, ri jebelej kitinamit ri ek'o pa ruk'ulba't kan xkenk'is. Y re' ja ri Bet-jesimot, Baal-meón y ri Quiriataim.

¹⁰Xtinya' ri ruwach'ulew ri' chike ri winaqi' ri ek'o pa relebel-q'ij, achi'el xtinben kik'in ri amonita. Xkenk'is jumul ri aj-Moab achi'el xtinben kik'in ri aj-Amón, richin keri' xtiketamaj chi ja yin Jehová ri ink'o pa ruwi' ronojel, xcha'.

¹²Kere' xubij ri Jehová: Ri tinamit Edom kan jantape' k'a rubanon oyowal kik'in ri aj-Judá richin nikiya' rutojbalil chike.

¹³Roma ri' yin Jehová xkiyakatej k'a chikij rije' y kan xkenk'is k'a ri winaqi' y ri chikopi'. Kan xtitole' k'a kan, nitiker k'a el pa tinamit Temán y napon k'a pa tinamit Dedán. Y keri' konojel k'a winaqi' xkeken chi espada.

¹⁴Kan xtinya' k'a rajel-ruk'exel chike, y ja ri nuwinaq israelita ri xkebanon. Keri' xtiketamaj achike ri' ri rutojbalil ri xtinya' pa kiwi', yin Jehová ri yibin, xcha'.

¹⁵Kere' xubij ri Jehová: Ri aj-Filistea rik'in janila koyowal xkiya' rutojbalil chike ri nuwinaq israelita, roma rije' kan ojer-pe-ri' ketzelan-ki' y kan xkijech k'a ki' richin chi xkekik'is jumul ri nuwinaq.

¹⁶Jak'a wakami ja yin xkinok etzelanel kichin ri aj-Filistea. Y kan xkenk'is k'a konojel winaqi' ri ek'o pa taq'aj chuchi' ri palou.

¹⁷Kan xtinya' rajel-ruk'exel chike y rik'in janila woyowal kan xtinya' k'a ri rutojbalil-mak pa kiwi'. Y toq xtinben kere' k'ari' rije' xtiketamaj chi ja yin Jehová ri ink'o pa ruwi' ronojel, xcha'.