Read Kaqchikel Ez 26 Bible Online

Ez 26 - Kaqchikel bible

Ez 26

¹Toq xtz'aqet yan julajuj juna' chi ojk'o chik wawe' pa Babilonia, chupan ri nabey q'ij chire ri ik', jari' toq ri Jehová xch'on chik wik'in y xubij:

²Rat Ezequiel, ninbij k'a chawe chi ri winaqi' aj-Tiro xa xetze'en k'a chirij ri Jerusalem. Kan xesik'in k'a y xkibij chi xetzaq ri ruchi' ri Jerusalem y wuluwik rubanon. Y roma ri' wakami nikich'ob chi xkebeyomer-q'anej rije'.

³Roma ri' yin Jehová in yakatajineq chikij ri aj-Tiro. Xtinben k'a chike chi e k'iy nima'q taq ruwach'ulew xkebeyakatej-pe chikij, achi'el toq nibolqo't ruwi' ri palou.

⁴Y xkekiwulaj k'a ri tz'aq ri e rusutin-rij ri kitinamit y chuqa' ri kachoch ri chajinela' ri ek'o pa ruwi' ri tz'aq. Y yin Jehová kan xtinmes k'a el jumul ronojel ri xkek'oje' kan chire ri tz'aq ri'. Y keri' xtitz'anatz'o' kan jumul.

⁵Ri tinamit ri' xa xtok k'a jun achi'el rik'ibel ya'l kichin ri karunela' ri pa runik'ajal ri palou. Yin Jehová ri yibin y ninjikiba' ronojel re'. Y ri tinamit Tiro kan xteleq'ex k'a ronojel ri k'o rik'in koma ri ch'aqa' chik ruwach'ulew.

⁶Y ri tinamit ri ek'o chunaqaj rija' ri kan kuqul kik'u'x rik'in xa xkeken k'a chi espada. K'ari' xtiketamaj chi ja yin Jehová ri ink'o pa ruwi' ronojel.

⁷Roma ri' kere' ninbij yin: Xtink'en k'a pe jun rey chiwij rix aj-Tiro y rija' ik'owineq chik ruwi' ri uchuq'a' ri k'o rik'in chikiwech ri ch'aqa' chik rey. Rija' xtipe kere' pa xaman y rubini'an Nabucodonosor, rey pa ruwi' ri ruwach'ulew Babilonia. Y rik'in rija' xkepe aj-labal, achi'a' yech'oke' chirij kiej y carruaje richin oyowal.

⁸Y ri rey ri' kan xkerukamisaj ri iwinaq ri ek'o pa taq kokoj tinamit. Y chirij ri tz'aq richin ri Tiro xtikiyek chik q'anej jun tz'aq ri banon rik'in ulew richin nikewaj-ki'. Chuqa' xtikipabala' nima'q taq raq'arik bey richin ye'ok-qa chupan ri tinamit. K'ari' rije' xtikichop ri kitobal richin nikichop oyowal.

⁹Kan rik'in k'a nima'q taq che' xtikiqasaj ri tz'aq ri rusutin-rij ri tinamit y chuqa' rik'in ri' xkekitzeq ri kachoch ri chajinela' ri ek'o pa ruwi' ri tz'aq.

¹⁰Kan janila k'a k'iy kiej xkeruk'en-pe y kan xtiq'equmatej ri tinamit rik'in ri poqolaj ri xtikiyek ri kiej ri'. Y toq xke'ok-apo chupan ri ruchi' ri tinamit, ri tz'aq kan xkesilon k'a roma ri kich'abel ri e k'iy carruaje y roma kaqen ri e k'iy kiej. Rije' kan xke'ok k'a apo chupan ri tinamit achi'el toq ye'ok chupan jun tinamit ri xa ch'akon chik.

¹¹Keri' ri kiej kan xtikinojisaj ronojel bey richin ri tinamit y ri aj-labal kan xkekikamisaj k'a kan chi espada ri iwinaq. Chupan ri q'ij ri' xtikiwulaj ri xata't ri kan jebel e tikil.

¹²Y kan xtikik'uaj k'a ronojel ibeyomel y chuqa' xtikeleq'aj k'a el ri ik'ayij. Xtikiwulaj k'a kan ri tz'aq y chuqa' ri jebelej taq jay. Ronojel k'a ri che', ri abej y ronojel ri xetzaq, kan xkekik'eq kan chupan ri palou.

¹³Richin keri' xtinben chiwe chi man xtak'axatej ta chik ri bix richin nimaq'ij y man xtak'axatej ta chik ri ruch'abel ri arpa.

¹⁴Kan xtinben k'a chi ri itinamit xtok achi'el jun abej liq'-liq'. Chuqa' xtinben chire chi xaxe xtik'atzin akuchi nirik'-wi ya'l richin yechaqirisex. Y kan man jun bey chik xtok jun nima-tinamit achi'el re wakami.

¹⁵Yin Jehová ninbij k'a chi toq ri tinamit Tiro xtich'akatej, ri ch'aqa' chik winaqi' ri ek'o chuchi' ri palou, xkebaybot roma xibinri'il. Chuqa' xtikak'axaj toq yejilon ri winaqi' e sokotajineq y toq najin ri kamik.

¹⁶Jari' toq konojel k'a ri e rey pa kiwi' ri ch'aqa' chik tinamit ri', kan xkeyakatej k'a el pa kitz'uyubal, y xtikelesaj k'a el ri jebelej taq tzieq y rik'in k'a janila xibinri'il xkebetz'uye' pan ulew. Y jantape' k'a k'o xibinri'il kik'in y roma ri' xkebaybot y xtikimey ri xbanatej.

¹⁷Rije' xtikibixaj jun bix ri ruk'amon-pe bis y ri bix kere' nubij: Rat tinamit ri eleneq utz atzijol, xa xach'akatej yan. Rat k'a xaq'aton-tzij pa kiwi' e k'iy ojer kan. Kan chijun k'a ruwach'ulew xkixibij-ki' chawech.

¹⁸Jak'a re wakami kan xkebaybot k'a roma xibinri'il, konojel ri ek'o pa taq'aj ri ek'o chuchi' ri palou. Wakami xa at maneq chik, y ri taq kokoj ruwach'ulew ri ek'o pa palou xa kan yek'ark'ot roma xibinri'il.

¹⁹Roma ri' yin Jehová ninbij chi kan xtinwulaj k'a kan jumul ri tinamit ri' y xtinben k'a chi man jun xtik'oje' chiri'. Chuqa' kan xtinben k'a chi xtijote-q'anej ri palou pa ruwi' richin xtumuq.

²⁰Y konojel k'a winaqi' xkeken-el y xke'apon akuchi ek'o-wi ri kaminaqi', ri xek'ase' ojer kan. Keri' k'a xkixk'oje' chikikojol kaminaqi' ri ek'o chuxe' ri ulew ri e wulatejineq chik kan richin jantape'. Y man jun bey chik xkaq'alajin chuwech re ruwach'ulew.

²¹Keri' xtinben richin chi ri winaqi' xtikik'en rukiy toq xtikitz'et ronojel re', xkak'is k'a jumul y stape' xkakanox man xkatilitej ta chik. Yin Jehová ri yibin.