Read Kaqchikel Ez 27 Bible Online

Ez 27 - Kaqchikel bible

Ez 27

¹Ri Jehová xch'on chik jun bey wik'in y xubij chuwe:

²Rat Ezequiel, tabixaj k'a re jun bix re' richin bis pa ruwi' ri Tiro:

³Ri tinamit Tiro k'o chuchi' ri palou. Rija' banoy k'ayij y loq'oj kik'in konojel ruwach'ulew ri ek'o chuchi' ri palou. Ri Dios nubij chi rija' nuch'ob chi jebel ok,

⁴roma ri ruwinaq yeloq'on y yek'ayin kik'in ri ek'o chuchi' ri palou. Ri Tiro kan jebel ok achi'el jun jebelej barco.

⁵Rik'in k'isis ri peteneq pa juyu' Hermón, xban ri ruwech ri barco. Richin xban ri che' ri nipa'e' pa runik'ajal, xk'amer-pe jebelej tiox-che', ri peteneq pa Líbano.

⁶Richin xkiben ri taq che' ri ninimo ri barco, xkik'en-pe ri jebelej paten-che', ri nipe pa Basán. Richin xkiben ri rupan, xkik'en-pe jebelej tz'alem k'isis, ri nipe pa ruwach'ulew Chipre. Y chukojol ri tz'alem ri', xekiyala' retz'aba'l ri e banon rik'in ri rey tix.

⁷Richin xban ri tzieq richin kaq'iq' ri ninimo-el ri barco, xukusex ri jebelej tzieq lino, ri banon-pe pan Egipto. Y ri jun chik jebelej tzieq keq y raxroj nitzu'un ri niya'on muj, k'amon-pe pa ruwach'ulew Elisá, ri k'o pa runik'ajal ya'.

⁸Ri achi'a' ri yesilon ri taq che' ri ninimo richin ri barco, kan e nowineq taq achi'a', re achi'a' re' yepe pa tinamit Sidón y pa tinamit Arfad. Ri ye'uk'uan richin ri barco, ja ri e nowineq taq achi'a', aj-Tiro.

⁹Y ri yechojmirisan richin, kan e nowineq taq achi'a', ri yepe pa tinamit Guebal. Y konojel winaqi' ri k'o ki-barco ye'apon pa Tiro richin yek'ayin y yeloq'on.

¹⁰Richin nikichajij ri ruwach'ulew yepe jebelej taq aj-labal, achi'a' aj-Persia, aj-Lidia y aj-Libia. Ri rutobal ruwa-kik'u'x y ri rutobal-kijolon kan janila e jebel ok, re' kan xe'ok wiqobel richin ri tz'aq richin xnimer ruq'ij ri tinamit Tiro.

¹¹Ri yechajin ri tinamit xepe pan Arfad, rije' yek'oje' pa ruwi' chijun ri tz'aq richin yechajin. Chuqa' pa taq jay kichin chajinela' ri ek'o pa ruwi' ri tz'aq, xek'oje-wi ri achi'a' aj-Gamad, ri kitobal rije' chuqa' xe'ok wiqobel richin ri tz'aq, ronojel re' richin xnimer ruq'ij ri tinamit Tiro.

¹²Ri Tiro kan pa ruk'iyal k'a k'ayij k'o rik'in, roma ri' ri ruwach'ulew Tarsis noloq'on-el rik'in. Y ri nikik'en-pe richin nikik'ayij kan chire rija', ja ri saqipueq, ri q'eqapueq, ri estaño y ri chajipueq.

¹³Chuqa' ri winaqi' aj-Grecia, ri aj-Tubal y ri aj-Mésec yepe richin ye'oloq'on-el rik'in. Y ri nikitojbej kan chire ja ri winaqi' ri e ximil pa samaj kik'in y samajibel ri e banon rik'in q'enq'oj-pueq.

¹⁴Ri winaqi' aj-Bet-togarmá yepe richin ye'oloq'on-el rik'in, rije' nikiya' kan ri kikiej e richin samaj y kiej e richin labal y ri kowilej taq kiej.

¹⁵Chuqa' ri winaqi' aj-Rodas y ch'aqa' chik tinamit ri ek'o chuchi' ri palou yepe richin ye'oloq'on rik'in, nikitojbej kan chire rik'in rey tix y chuqa' yekiya' kan che' q'eq.

¹⁶Ri winaqi' aj-Edom ye'oloq'on chuqa' rik'in, roma kan janila k'iy k'o rik'in. Y rije' nikitojbej kan chire rik'in jalajoj y jebelej taq abej, tzieq keq, tzieq ri e tz'ison ruwech y tzieq banon rik'in lino.

¹⁷Y chuqa' ri winaqi' aj-Judá y ri aj-Israel yepe rik'in richin ye'oloq'on; nikik'en-pe trigo ri nipe pa tinamit Minit. Chuqa' nikik'en-pe kab ri nikiya' ri taq chikopi', aceite richin olivo y jalajoj kiwech aq'om y rik'in ri' nikitojbej kan.

¹⁸Ri winaqi' richin Damasco chuqa' ye'oloq'on rik'in, roma chiri' kan ronojel k'o pa ruk'iyal. Chuqa' nikik'en-pe vino ri niban pa tinamit Helbón, y nikik'ayij lana ri niban pa tinamit Sahar.

¹⁹Ri winaqi' aj-Vedán y ri aj-Uzal ri k'o pa ruwach'ulew Javán ye'oloq'on-el rik'in. Ronojel ri nikik'uaj-el nikitoj kan rik'in vino, q'eqapueq ri jebel samajin, canela y ch'aqa' chik mololen aq'om.

²⁰Ri winaqi' aj-Dedán nikiben chuqa' loq'oj rik'in, y nikitojbej kan rik'in xalma richin kiej.

²¹Ri winaqi' aj-Arabia y ri e aj-raqen pa ruwi' ri tinamit Quedar chuqa' ye'oloq'on rik'in. Y rije' nikitojbej kan rik'in jalajoj kiwech ri kokoj taq awej.

²²Ri loq'onela' richin ri tinamit Sabá y ri Raamá ye'oloq'on chuqa' rik'in. Y nikitojbej kan rik'in jubulej taq aq'om, jebelej taq abej y q'anapueq.

²³Chuqa' ri winaqi' aj-Harán, ri aj-Cané, ri aj-Edén, ri aj-Sabá, ri aj-Asiria y ri aj-Media ye'oloq'on rik'in.

²⁴Y rije' nikitojbej kan rik'in jebelej taq tzieq keq, tzieq ri tz'ison ruwech, tzieq ri niya'ox chupan jun jay, y kolo' ri e jebel e pach'un.

²⁵Ri nimalej taq barco e richin ri tinamit Tarsis jari' ri niq'axan-pe ri ejqa'n richin ri Tiro. Ri tinamit Tiro janila beyomel k'o rik'in. Rija' kan achi'el jun nimalej barco ri k'o pa ya'.

²⁶Y ri ruk'ayij xkik'uaj-el pa taq ronojel ruwach'ulew, achi'el nikiben ri yenimo ri barco. Jak'a ri Dios xtuya-pe jun kaq'iq' re kere' pa relebel-q'ij richin xtik'is ri Tiro.

²⁷Kan ronojel re' xtik'is; ri rubeyomel, ri ruk'ayij, ri ruloq'oj, konojel ri yesamajin richin ri barco, ri k'ayinela', ri aj-labal y konojel ri ch'aqa' chik, kan junan k'a xkebe chuxe' ri ya'.

²⁸Y toq ri e samajela' richin ri barco nikireq kichi' roma yeken yan, konojel ri winaqi' ri ek'o chuchi' ri ya', kan xtipe k'a xibinri'il y bis kik'in.

²⁹Konojel ri yenimo ri barco xkeqaqa kan chupan. Y konojel ri yesamej rik'in ri barco xa kan xaxe chik e pa'el-apo chuchi' ri ya'.

³⁰Kan xkesik'in k'a roma ri Tiro, y xtikireq k'a kichi' rik'in janila q'axo'n. Y roma ri' xtikiyala' k'a ulew pa kijolon y xtikibolqotila-ki' pa chaj.

³¹Y roma ri xbanatej chupan ri tinamit ri' rije' xtikijososej-el ri rusumal-kiwi', xtikikusaj tzieq richin bis, y kan xke'oq' rik'in janila q'axo'n.

³²Y xtikiben k'a jun bix richin bis pa ruwi' ri Tiro, y ri xtibanon, kan xtuben rik'in janila q'axo'n. Y jare' k'a ri bix ri xtikibixaj rije': Ri Tiro, ojer kan ja rija' ri más jebel chikiwech ri ch'aqa' chik ruwach'ulew, jak'a re wakami k'o pa runik'ajal ri ya' y man jun nitikir nuben.

³³Ojer kan toq noqaqa-el ri ruk'ayij chuchi' ri palou, kan xuben chike ri ch'aqa' chik winaqi' richin xekikot. Janila e k'iy rey ri xebeyomer kan, roma ri rubeyomel rija'.

³⁴Wakami xa kan xwuluwu' y xbe chuxe' ri ya'. Y chuqa' kan xbe-qa k'a chuxe' ri ya' ronojel ri k'o rik'in, y konojel ri winaqi' kan xebe-qa chuxe' ri ya' junan rik'in ri beyomel ri'.

³⁵Konojel k'a ri winaqi' richin ri ch'aqa' chik ruwach'ulew ri ek'o chuchi' ri ya', kan xtikimey y xtikixibij-ki', y ri ki-rey kan xkebaybot roma xibinri'il, y xtijalatej k'a kiwech roma xibinri'il.

³⁶Ri loq'onela' richin ri ch'aqa' chik ruwach'ulew kan xkixibij k'a ki', ri winaqi' kan xkik'en rukiy roma xkitz'et ri xuk'uluwachij ri Tiro. Y pa ruk'isibel, ri Tiro xa kan xapon k'a pa jun wululen, y kan man jun bey chik xtiyakatej-q'anej, xkecha'.