Read Kaqchikel Ez 29 Bible Online

Ez 29 - Kaqchikel bible

Ez 29

¹Toq xtz'aqet yan lajuj juna' chi qojk'amer-pe pa Babilonia, chupan ri q'ij kablajuj chire ri ik' lajuj, jari' toq ri Jehová xch'on chik wik'in y xubij chuwe:

²Rat Ezequiel, katzu'un kela' akuchi k'o-wi ri rey richin Egipto y pa nubi' k'a yin xtaq'alajirisaj chire ri xtibebanatej rik'in rija' y rik'in chijun ri ruwach'ulew.

³Jare' k'a ri rutzijol: Yin Jehová jare' ink'o richin xkiyakatej chawij rat rey richin Egipto. Rat at achi'el k'a jun nimalej ayin ri atk'o pa raqen-ya' Nilo, kan nach'ob k'a chi ja rat ri xabanon ri raqen-ya' ri' y kan awichin rat.

⁴Yin kan xtinben k'a chawe chi xtinju' jun chapbel-ti'ij pan akaxtate'*f10* y xtinben k'a chi konojel ker ri ek'o chupan ri raqen-ya' ri' xkentz'araba-el chirij ri asolotal. K'ari' xkatinwelesaj-el chupan ri raqen-ya', junan kik'in ri ker ri'.

⁵Y xkatinbenk'aqa' kan pa tz'iran ruwach'ulew junan kik'in ri ker ri ek'o-el chawij. Kan xkixbeqaqa chuwech ri ulew y xa man jun k'a xkixsik'o-el. Chuqa' kan man jun xtimolon iwichin, xa kan banon chik chiwe chi xkixok kiway ri k'uxunela' taq chikopi' y ri aj-xik' taq chikopi'.

⁶Kan keri' chi'iwonojel rix winaqi' aj-Egipto xtiwetamaj chi ja yin Jehová ri ink'o pa ruwi' ronojel. Ri winaqi' israelita kan kikuquban kik'u'x iwik'in achi'el toq jun nukuquba' ruk'u'x rik'in jun ch'ame'y. Jak'a ri ch'ame'y ri' xa jun patz'en.

⁷Y toq rije' xixkimajij rik'in ri kiq'a', rix xa xixq'aj y xiteq'uj ri ruwi' taq kitele'n rije'. Chuqa' toq rije' xkajo' chi rix xe'itemej ta, rix xa xixlawalo-qa roma ri kalal y roma ri' xiben chike chi xujalk'atij-ri' ri rij kacheq.

⁸Roma ri' yin Jehová ninbij chi kan xtinben k'a chiwe chi xkixchap chi oyowal y xkixkamisex k'a chi'iwonojel rix y ri iwawej.

⁹Ri ruwach'ulew Egipto kan xtok k'a jun tz'iran ruwach'ulew y k'ari' rix xtiwetamaj chi ja yin Jehová ri ink'o pa ruwi' ronojel. Y rat rey, roma xabij chi ri raqen-ya' Nilo awichin rat y ja rat ri xabanon,

¹⁰roma ri' xkiyakatej chawij y chikij ri kokoj raqen taq ya' ri ek'o chiri'. Xtinben chi ri ruwach'ulew xtok jun tz'iran ri ruk'amon-pe wululen, nitiker-pe pa tinamit Migdol y napon k'a pa tinamit Asuán y napon k'a kela' pa ruk'ulba't ri ruwach'ulew Etiopía.

¹¹Kan man jun xtiq'ax chiri', ni ta wineq, ni ta ri chikopi'. Xa kan kawineq k'a juna' xtuben keri'.

¹²Xtinben k'a chire ri ruwach'ulew Egipto chi xtitole' kan kawineq juna' y konojel ri tinamit kan xkenwulaj k'a kan. Xkenwelesaj k'a el ri awinaq y xkentaluj-el pa ch'aqa' chik ruwach'ulew chikikojol ch'aqa' chik tzobaj winaqi'.

¹³Yin Jehová ninjikiba-nutzij chi toq xtitz'aqet ri kawineq juna', xkenmol chik konojel ri awinaq aj-Egipto, ri e talutajineq pa taq ch'aqa' chik ruwach'ulew.

¹⁴Xtinben k'a chike chi xketzolej chik y xkek'oje-qa pa xokon chire ri ruwach'ulew Egipto, jak'a xa xtok jun ajawaren ri maneq rejqalen,

¹⁵ri ruqasan-ri' chikiwech konojel ri ajawaren. Y kan man jun bey chik xtik'oje' pa kiwi' ri ch'aqa' chik ruwach'ulew.

¹⁶Y ri tinamit Israel kan man jun bey chik xtukuquba' ruk'u'x rik'in, xa k'ari' xtiq'ax chuwech chi kan man utz ta ri xuben toq xberuk'utuj to'onik iwik'in. Keri' ri awinaq aj-Egipto kan xtiketamaj chi ja yin Jehová.

¹⁷Toq xtz'aqet yan juwineq wuqu' juna' chi xojk'amer-pe pa Babilonia, chupan ri nabey q'ij chire ri nabey ik', ri Jehová xch'on chik wik'in y xubij chuwe:

¹⁸Toq ri Nabucodonosor rey richin Babilonia xuch'ek ri tinamit Tiro, xuben chike ri aj-labal chi xkik'uaj ejqa'n ri janila kalal. Y re' xuben chi xk'is-el ri rusumal-kiwi' roma ri paten,*f11* chuqa' ri ruwi-kitele'n sokotej kan. Man rik'in ri' ni ta k'a rija', ni ta k'a ri aj-labal man jun xkik'uaj ri k'o rejqalen.

¹⁹Jak'a yin Jehová ninjikiba-nutzij chi ri Nabucodonosor toq xtok pa ruwach'ulew Egipto y xtik'oje' pa ruq'a', xtuk'en k'a kan ronojel rubeyomel y ronojel ri k'o rik'in. Y rik'in k'a ronojel ri' rija' xkerutoj ri aj-labal.

²⁰Xtinsipaj k'a ri ruwach'ulew Egipto chire ri rey Nabucodonosor, roma xeruteq-el ri aj-labal chirij ri Tiro, roma ri wutzil yin Jehová, ri ink'o pa ruwi' ronojel.

²¹Chupan k'a ri q'ij ri', xtinben chi ri awinaq israelita xtinimer ri kuchuq'a' y rat Ezequiel, kan xkatikir chik xkach'on kik'in. Y k'ari' xtiketamaj chi ja yin Jehová, xcha'.