Read Kaqchikel Ez 34 Bible Online

Ez 34 - Kaqchikel bible

Ez 34

¹Ri Jehová xch'on chik wik'in y xubij chuwe:

²Rat Ezequiel, kan ke'ach'olij ri aj-raqen ri ek'o pa ruwi' ri tinamit Israel roma rije' nikiben ri man utz ta. Y kere' tabij chike: Toq'ex k'a iwech rix ri ix aj-raqen pa ruwi' ri nutinamit Israel roma xa ja rix nichajij-qa-iwi', pa ruk'exel ye'ichajij ri iwinaq, achi'el ri yuq'unela' ri man yekichajij ta ri kikarne'l.

³Rix xa kan nikusaj ronojel kichin ri iwinaq, achi'el jun yuq'unel ri nuqum ri leche kichin ri karne'l, rik'in ri rusumal nuben rutziaq y nutej ri ruch'akul ri más jebel. Jak'a xa man yeruchajij ta.

⁴Rix man ye'ibochi'ij ta, achi'el ri yuq'unel ri man yeruto' ta juba' ri taq karne'l ri maneq kuchuq'a', ni man yeraq'omaj ta juba' ri taq e yawa'i' ni man nupis ta juba' kaqen toq e q'ajineq y ni man yerukanoj ta ri yesach kan. Keri' rix kan e iya'on pa poqon.

⁵Ri iwinaq xa xkitaluj-ki' achi'el ri karne'l ri xa man jun chik niyuq'un kichin y roma ri' xek'is k'a achi'el ri karne'l ri xetij koma k'uxunela' taq chikopi'.

⁶Xkitaluj k'a el ki' pa taq ruwi' juyu' y xesach k'a el chupan chijun ri ruwach'ulew. Kan man xich'ob ta juba' kij richin xe'ikanoj.

⁷Roma ri' rix aj-raqen, ri ix achi'el itzel taq yuq'unela', tiwak'axaj jebel ri nuch'abel.

⁸Yin Jehová ninbij chi xepe yan jalajoj kiwech e etzelanel wichin richin xekik'is yan ri nuwinaq, achi'el ri k'uxunela' taq chikopi' ri ye'uk'uan-el ri karne'l. Chuqa' xa iyon rix ichajin-qa-iwi' y man e ichajin ta rije'.

⁹Roma ri' rix aj-raqen tiwak'axaj k'a ri nuch'abel yin Jehová:

¹⁰Kan xkiyakatej k'a chiwij y rix k'o chi xtibij chuwe achike roma man xe'ichajij ta ri nuwinaq. Man xkixk'oje' ta chik pa kiwi', man xkixtikir ta chik xtiwelesaj ri k'o kik'in y man xtiben ta chik chike richin nikitej poqon.

¹¹Yin Jehová ninbij chi xkenbenkanoj ri nuwinaq y kan xkenchajij jebel, achi'el jun utzilej yuq'unel kichin ri taq karne'l.

¹²Ri nuwinaq e sachineq kan chupan ri q'ij richin q'equ'm y ruk'ayewal toq xkitaluj-el-ki'. Jak'a re wakami kan xkenchajij achi'el nuben jun yuq'unel toq kan beneq ruk'u'x chikij ri rukarne'l.

¹³Yin xkinelesan k'a kichin pa taq ruwach'ulew ri man kichin ta rije', y xkenmol k'a y xkenk'uaj pa kiruwach'ulew rije'. Xkenk'uaj richin xkebewa' pa taq juyu' richin ri kiruwach'ulew. Chuqa' xke'uk'ya' pa taq ch'uti'n raqen-ya' y xkek'oje' chupan chijun ri ruwach'ulew.

¹⁴Xtinya' chike ronojel ri nik'atzin, achi'el nuben jun yuq'unel toq nuk'uaj ri rukarne'l ri akuchi k'o jebel q'os y chuqa' pa taq soq'olbel ri ek'o-q'anej pa taq k'echelaj. Y chiri' xtikina' ch'uch'ujil, achi'el ye'uxlan ri karne'l toq nikitej jebelej q'os y man jun xtinaqo kichin.

¹⁵Kan ja yin k'a xkinok kiyuq'unel y ja yin xkinuk'uan kichin richin xke'uxlan. Yin Jehová ri ink'o pa ruwi' ronojel ri yibin.

¹⁶Xkenkanoj k'a ri e sachineq, xkenwaq'omaj ri e sokotajineq y xkento' ri maneq kuchuq'a'. Kan xkenchajij k'a ri nuwinaq pa ruchojmilal. Jak'a ri k'o kuchuq'a' y e ti'oj kan xkenk'is.

¹⁷Yin Jehová ri yibin. Xkench'er k'a ri k'o kuchuq'a' kik'in ri maneq kuchuq'a', achi'el jun yuq'unel ri yeruch'er ri karne'l kik'in ri tzuntzun.

¹⁸Rix ri kan k'o iwuchuq'a', ronojel ri nik'atzin chiwe kan k'o iwik'in. Man rik'in ri' rix nik'is ri man nikusaj ta, achi'el nikiben ri karne'l toq nikitej jebel taq q'os, y k'ari' nikixeq' kan chi'aqen ri q'os ri k'a nitotej na kan. Y ri ya' nikiqum chay-chay y k'ari' rik'in kaqen nikitukukej ri nik'oje' kan.

¹⁹Y wakami ri ch'aqa' chik nuwinaq k'o chi nikitej y nikikusaj ri xiya' kan rix, achi'el ri karne'l ri k'o chi nikitej ri q'os ri kixeq'on kan chi'aqen y chuqa' k'o chi nikiqum ri ya' ri kitukuken kan rupan.

²⁰Roma ri' yin Jehová kan xtinben k'a ruchojmilal chi'ikojol, achi'el nuben ri yuq'unel toq nuch'er ri karne'l ri e ti'oj y ri janila e baq.

²¹Rix aj-raqen kan niben chike richin nikitej poqon ri ch'aqa' chik iwinaq achi'el nikiben ri karne'l e ti'oj chike ri taq e baq. Rije' yekitoq'-el y yekinim-el ri e baq y keri' nikiben chike richin ye'animej-el.

²²Jak'a yin kan xkenkol ri nutinamit. Kan man xtinya' ta chik q'ij richin ye'eleq'ex-el, kan jak'a yin xkiq'aton-tzij chi'ikojol rix.

²³Xtinteq-pe jun rijatzul kan ri rey David ri nusamajel richin nok yuq'unel pan iwi'. Rija' xkixruchajij jebel.

²⁴Yin Jehová xkinok i-Dios y ri rijatzul kan ri David ri' xtok aj-raqen pan iwi'. Yin Jehová ri yibin ronojel re'.

²⁵Chupan ri q'ij ri' xtinben k'a jun tununri'il kik'in ri iwinaq richin chi xtinjikiba' chike jun k'aslen richin uxlanenri'il, achi'el jun yuq'unel yeruk'is ri k'uxunela' taq chikopi' richin chi rije' yek'ase' rik'in ch'uch'ujil y xkewer k'a pa taq juyu' y pa taq k'echelaj.

²⁶Yin kan xkenya' chunaqaj ri nujuyu' Sión y xtinya' urtisanik pa kiwi'. Xtinteq-pe ri job pa ruq'ijul y keri' chuqa' ri urtisanik.

²⁷Ri che' ri ek'o pa taq juyu' kan xkewachin y chuqa' ri ulew kan xkewachin y ri nuwinaq kan xkek'ase' rik'in uxlanenri'il. Xtinkol ri nutinamit pa kiq'a' ri e ximiyon pa samaj y k'ari' xketotej-el. Jari' toq xtiketamaj chi ja yin Jehová.

²⁸Rije' man jun bey chik xkek'oje' chuxe' kitzij ri ch'aqa' chik ruwach'ulew. Y ni ta ri k'uxunela' taq chikopi' man xkekitej ta chik. Kan xkek'ase' k'a rik'in ch'uch'ujil y man jun xtinaqo kichin.

²⁹Kan xtinya' jebelej ulew richin tiko'n chike richin chi man jun bey chik xtikitej wayjal. Chuqa' man xkeya'ox ta chik pa tijoj-poqonal koma ri ch'aqa' chik ruwach'ulew.

³⁰K'ari' k'a xtiketamaj chi ja yin Jehová ri ki-Dios y chi rije' e nutinamit yin. Chuqa' kan jantape' xkik'oje' kik'in. Yin Jehová ri yibin.

³¹Yin ri i-Dios xkixinchajij k'a achi'el nuben jun yuq'unel kik'in ri rukarne'l. Yin Jehová ri ink'o pa ruwi' ronojel ri yibin, xcha'.