Read Kaqchikel Ez 39 Bible Online

Ez 39 - Kaqchikel bible

Ez 39

¹Rat Ezequiel, taq'alajirisaj ri nuch'abel pa ruwi' ri rey Gog y tabij chire: Yin Jehová ninbij chawe chi in yakatajineq chawij rat Gog ri at rey pa kiwi' ri ruwach'ulew Mésec y ri Tubal.

²Xtinben k'a chawe richin xkatzolej chik pa ruwach'ulew Israel. Xkatinbenqirirej-pe kela' pa xaman y xkatink'en chik pe pa taq juyu' richin ri ruwach'ulew Israel.

³Kan xtinwulaj k'a ri rute-ach'ab ri k'o pan awajxokon. Chuqa' xtinben k'a chawe richin xketzaq-el ri ach'ab ri ek'o pan awijkiq'a'

⁴richin rat kan xkaken k'a pa taq juyu' richin ri ruwach'ulew Israel y chuqa' ri aj-labal ri e awachibilan-pe, junan kik'in ri winaqi' ri kibanon tununri'il awik'in. Y ri ich'akul kan xke'ok kiway ronojel kiwech aj-xik' taq chikopi' ri nikitej ti'ij y xke'ok chuqa' kiway konojel k'uxunela' taq chikopi'.

⁵Kan xkixpunupuxin kan choj keri' pa taq juyu'. Yin Jehová ri ink'o pa ruwi' ronojel, ri yibin.

⁶Kan xtinteq k'a pe q'aq' pa ruwi' ri ruwach'ulew Magog y chuqa' pa kiwi' ri winaqi' ri ek'o chunaqaj ri palou, stape' man jun nikimey. K'ari' k'a xtiketamaj chi ja yin Jehová.

⁷Yin xtinben chi konojel ri winaqi' israelita xtiketamaj nuwech, roma man ninwajo' ta chi man jun rejqalen xtiban chire ri nubi'. Chuqa' xtiketamaj ri ch'aqa' chik ruwach'ulew chi ja yin in ki-Dios ri israelita ri kan k'o nuq'ij-nuk'ojlen. Ja yin Jehová ri yibin.

⁸Kan napon yan k'a ri q'ij richin xtibanatej ronojel ri nubin. Yin Jehová ri ink'o pa ruwi' ronojel ninjikiba' re'.

⁹K'ari' ri winaqi' ri ek'o pa tinamit richin ri ruwach'ulew Israel xke'el-el chuk'amik ri jalajoj ruwech tobel, rute-ch'ab y ri kum richin nikikusaj richin kisi', ronojel re' xkeruben richin wuqu' juna'.

¹⁰Y man nik'atzin ta richin nibekibana' kisi' pa taq juyu' richin nibekichoyo' ta che', roma ronojel ri kamisabel ri xtikimej chike ri e etzelanel kichin. Achi'el toq xmaj chuwi-kiq'a' ri israelita ri k'o rejqalen ri ojer kan, keri' chuqa' xtimaj chikiwech rije' ri xe'eleq'an kik'in. Yin Jehová ri yibin.

¹¹Chupan ri q'ij ri', yin xtinya' chire ri Gog jun xoral richin muqbel pa jun taq'aj kojol juyu' chiri' pan Israel, pa relebel-q'ij chire ri Tzayi-Choy. Re xoral re' kan xtuq'et k'a kibey ri winaqi' ri yeq'ax chiri', roma chiri' k'a xkemuq-wi kan ri rey Gog y ri e k'iy aj-labal. Y roma ri' ri taq'aj kojol juyu' ri' xtubini'aj: Taq'aj Kojol Juyu' Richin ri Gog y ri e Aj-labal.

¹²Ri winaqi' israelita xtik'atzin k'a wuqu' ik' chike richin xkekimuq ri kaminaqi' ri' richin nich'ajch'ojir ri kiruwach'ulew.

¹³Kan konojel k'a ri winaqi' ri ek'o chiri' xkepe richin yekimuq re kaminaqi' re'. Y rije' kan xkekikot k'a chupan ri q'ij ri' toq yin xtink'ut k'a wi' chi kan k'o nuq'ij-nuk'ojlen. Yin Jehová ri ink'o pa ruwi' ronojel ri yibin.

¹⁴Y chirij ri wuqu' ik' xkekiteq chik el jun tzobaj winaqi' richin nibekinik'oj kan jebel ri ruwach'ulew y xkekimuq k'a kan ri kaminaqi' ri k'a ek'o na kan ke taq ri'. Keri' k'a xtikich'ajch'ojirisaj jebel ri kiruwach'ulew Israel.

¹⁵Y ri achi'a' ri yekanon ri kaminaqi' toq nikil jun baq ri punul kan keri' pan ulew, rije' k'o chi nikiya' kan jun retal ri baq richin chi ri muqunela' nikitz'et y nikimuq kan ri akuchi e muqun-wi kan ri aj-labal e richin ri Gog.

¹⁶Y ri rubi' ri tinamit ri k'o chiri' xtubini'aj: Kitinamit ri Aj-labal ri e Richin ri Gog. Y chirij k'a ronojel re' xtok ch'ajch'oj ri kiruwach'ulew.

¹⁷Rat Ezequiel, yin ninbij chawe chi ke'awoyoj konojel ri jalajoj kiwech ri aj-xik' taq chikopi' y ri k'uxunela' taq chikopi' y tabij chike chi tikimolo-pe-ki' richin nikitej ri nimalej kamelabel ri nubanon rutzil chike pa ruwi' ri juyu' richin Israel. Xtikitej ti'ij y xtikiqum kik'.

¹⁸Xtikitej k'a ri kich'akul ri aj-labal y xtikiqum k'a kik' kichin q'atbel taq tzij e richin chijun ri ruwach'ulew. Y konojel rije' ri xketijo, xtikiben k'a chire achi'el xa ta nikitej ri karne'l, ri tzuntzun o ri e ti'oj taq wákix e richin ri ruwach'ulew Basán.

¹⁹Ri aj-xik' taq chikopi' y ri k'uxunela' taq chikopi' xtikitej janila q'en k'a toq xtik'o kik'u'x chire. Y xtikiqum kik' k'a toq xkeq'aber na chire.

²⁰Kan xtinben k'a chike chi xkewa' jebel rik'in ri kich'akul ri kiej, ri kich'akul ri achi'a' yech'oke' chirij kiej y ri jalajoj kiwech aj-labal. Y ri chikopi' ri' kan jebel xtinoj kipan. Yin Jehová ri ink'o pa ruwi' ronojel ri ninjikiba' re'.

²¹Toq xtinben re', xtink'ut ri nuk'ojlemal chikiwech ri ch'aqa' chik winaqi' richin re ruwach'ulew y rije' xtikitz'et ri achike rubanik xtinq'et-tzij pa kiwi'.

²²Chupan k'a ri q'ij ri' ri nutinamit Israel kan xtretamaj k'a chi ja yin Jehová ri in ki-Dios.

²³Y ri winaqi' e richin ch'aqa' chik ruwach'ulew xtiketamaj chi ri israelita xe'uk'uex-el pa kiruwach'ulew roma ri kimak y roma man xkijech ta ki' pa nuq'a'. Chuqa' xtiketamaj chi roma ri' yin xkenmalij kan y xinya' q'ij chike ri e etzelanel kichin richin xekich'ek y xekikamisaj kan konojel pa labal.

²⁴Yin xinya' k'a pa kiwi' ri israelita ri rutojbalil ri kimak achi'el ri ruk'amon richin nikik'ul, roma xe'ok man e ch'ajch'oj ta y xeyakatej chuwij. Roma ri' yin xenmalij k'a kan.

²⁵Man rik'in ri' yin Jehová ninbij chi xtinjoyowaj kiwech ri awinaq israelita y kan xkenk'en k'a pe akuchi e nutalun-wi-el roma rije' e rijatzul kan ri Jacob. Xtinben ronojel re' richin ninimirisaj ri loq'olej nubi'.

²⁶Ri ojer kan toq rije' ek'o pa kiruwach'ulew man jun achike ninaqo kichin, rije' xkiben banobel ri man niqa' ta chinuwech y xinkimalij kan. Jak'a chupan ri q'ij ri' man xtikiben ta chik keri'.

²⁷Y toq xkenwelesaj-pe chikikojol ri ch'aqa' chik tinamit ri akuchi ek'o-wi ri e etzelanel kichin, chikiwech ri winaqi' ri' kan xtink'ut k'a wi' chi yin kan in loq'olej-wi roma ri utzilej taq kibanobal ri awinaq israelita.

²⁸K'ari' k'a xtiketamaj chi ja yin Jehová ri ki-Dios, stape' yin xenteq-el pa taq ch'aqa' chik ruwach'ulew. Jak'a chupan ri q'ij ri' xkenk'en chik pe y kan man jun xtinya' kan ri juk'an chik ruwach'ulew.

²⁹Kan man jun bey chik k'a xkenmalij kan, roma xtinya' k'a ri loq'olej nu-Espíritu pa kiwi' richin nik'oje' kik'in. Yin Jehová ri ink'o pa ruwi' ronojel ri yibin, xcha'.