Read Kaqchikel Ez 40 Bible Online

Ez 40 - Kaqchikel bible

Ez 40

¹Toq xtz'aqet juwineq wo'o' juna' chi qojk'amer-pe pa Babilonia, chuqa' jari' toq xtz'aqet kajlajuj juna' tich'akatej ri qatinamit Jerusalem. Y chupan ri q'ij lajuj chire ri nabey ik' chire ri juna' ri', xpe ri ruchuq'a' ri Jehová pa nuwi' y chupan jun achi'el achik' xiruk'uaj-el pan Israel.

²Y chupan ri achi'el achik' ri' ri Jehová k'o k'a xuk'ut chinuwech. Xiruya' chiri' pa ruwi' jun nimalej juyu' y xintz'et chi kela' pa xokon k'o ka'i-oxi' jay y achi'el jun tinamit niq'alajin.

³Y toq xiruk'uaj-el chiri', xintz'et k'a jun achin, ri rubanik achi'el banon rik'in q'enq'oj-pueq, pa'el chuchi' ri tinamit y ruk'uan jun k'an ri banon rik'in betz' lino y ruk'uan chuqa' jun che' richin etabel.

⁴Y ri achin ri' xubij chuwe: Rat Ezequiel, kan tatz'eta' y tawak'axaj jebel ronojel ri nink'ut chawech. Taya' k'a axikin y kan taya' awech chire, roma xa kan richin ri' ri at k'amon-pe re wawe'. Y xeri' xtabebij ronojel chike ri awinaq israelita.

⁵Ri che' richin etabel ri ruk'uan ri achin, k'o jun jaj rik'in nik'aj ri raqen. Toq xintz'et ri rachoch ri Dios k'o jun tz'aq ri rusutin-rij. Xretaj k'a ri tz'aq ri' y k'o jun jaj rik'in nik'aj rupimil y jun jaj rik'in nik'aj ri rujotolen.

⁶Xeri' ri achin ri' xbe-apo ri pan okibel ri k'o pa relebel-q'ij chire ri tz'aq y xbe-q'anej chupan ri jotolbel ri k'o chiri'. Chuwech-apo rija', k'o jun corredor ri nibe choj y k'o kablajuj jaj raqen. Pa rajxokon ri corredor, k'o oxi' taq jay y keri' chuqa' pa rijkiq'a' k'o oxi' taq jay. Y ri jay ri' kichin ri chajinela'. K'ari' rija' xretaj nabey ri e oxi' taq jay ri ek'o pa rijkiq'a'. Y ri raqen y ri ruwech chikijujunal ri jay ri', jun jaj rik'in nik'aj. K'ari' xretaj ri tz'aq ri k'o chukojol ri taq jay y ri rupimil ri tz'aq ri' k'o jun jaj rik'in wo'o' q'a'aj. Ri rupimil ri tz'aq ri k'o chikikojol ri ruchi' ri tz'aq rik'in ri nabey ti jay, k'o jun jaj rik'in nik'aj. Pa ruk'isibel chire ri corredor, ri rupimil ri tz'aq ri k'o chikikojol ri ruk'isibel ti jay rik'in ri okibel ri k'o chiri', k'o jun jaj rik'in nik'aj. Y pa ruk'isibel chire ri corredor k'o chik jun jay; y toq jun wineq nel-el chupan ri jay ri', jumul nel-el pa jun apo ruwa-jay.

⁷

⁸K'ari' xretaj ri ruchi' ri jay ri k'o richin yatok-apo chupan ri jun chik ruwa-jay. Y ri raqen k'o ka'i' jaj rik'in ka'i' q'a'aj.

⁹Y toq yatel-pe chupan ri jay ri', ri chiri' k'o jun pilar pa rajxokon y jun pa rijkiq'a'. Y re pilar re' wo'o' q'a'aj kipan.

¹⁰Y ri ox-ox taq jay ri ek'o pan okibel chiri' pa relebel-q'ij chire ri rachoch ri Dios, ronojel junan ketabal; chuqa' junan ketabal ri rupimil ri tz'aq ri ek'o chikikojol ri jay ri'.

¹¹Xeri' ri achin ri' xretaj ri ruwech ri ruchi-jay y k'o k'a oxi' jaj. Y ri ruwech ri corredor, k'o k'a kaji' jaj.

¹²Y chupan ri okibel kichin ri taq jay, k'o jun ko'ol tz'aq y ri rupimil ri tz'aq ri' k'o ka'i' q'a'aj rik'in nik'aj y ri rujotolen k'o ka'i' q'a'aj rik'in nik'aj chuqa'.

¹³Y xeri' xretaj ri rupan ri jun ti jay, niq'ax-el chupan ri corredor y napon k'a rik'in chik ri jun ti jay. Y k'o k'a wuqu' jaj rik'in nik'aj ri ruwech.

¹⁴K'ari' xretaj ri jay ri nel-pe chuwa-jay y ruk'uan k'a waqi' jaj.

¹⁵Ri raqen chijun, nitiker-el pan okibel akuchi ek'o-wi ri jotolbel y napon k'a chupan ri ruwa-jay, wolajuj jaj.

¹⁶Chupan ri tz'aq kichin ri taq jay y chupan ri pilar ri ek'o chupan ri corredor, ek'o achi'el taq kokoj ventana. Keri' chuqa' ek'o ri pilar ri sutin-rij ri jay ri nel-pe chuwa-jay. Y ri achi'el ventana ri' yetzu'un-pe k'a chupan ri jay ri'. Y chuwech ri tz'aq richin ri corredor ek'o toch'on ruwachibel palma.

¹⁷Chirij ri' ri achin xiruk'uaj-el pa corredor y xojel-el chuwa-jay. Y ri chiri' losa ukusan chire ri rusutin-q'anej ruwech ri tz'aq y ri ruwech, wolajuj jaj y ri' k'o k'a pa xulan. Y yin xintz'et ri chiri' pa ruwi' ri losa ri' banon juwineq lajuj taq jay.

¹⁸

¹⁹Xiqaqa-qa k'a pa grada ri ek'o-pe chuwech ri jay ri k'o pa relebel-q'ij chire ri ruwa-jay. Y k'ari' choj xibiyin richin xinapon pan okibel richin ri ko'ol ruwa-jay. K'ari' xibe-q'anej pa grada ri ek'o chiri'. K'ari' ri achin ri' xretaj ri rukojol ri ka'i' okibel y juwineq lajuj jaj ruk'uan. Chirij k'a ri' xibe pa xaman chire ri nima-ruwa-jay.

²⁰Chuqa' k'o jun ruchi-jay ri k'o pa xaman chire ri tz'aq, ri nibe pa nima-ruwa-jay. Y ri achin xretaj k'a ri raqen y ri ruwech ri jay ri'.

²¹Ri okibel ri k'o chiri' junan rik'in ri okibel ri k'o pa relebel-q'ij. K'o oxi' taq jay pa rijkiq'a' y pa rajxokon chire ri corredor. Chuqa' k'o jun chik jay ri k'o pa ruk'isibel chire ri corredor ri nel-el chuwa-jay. Y ronojel re' k'o wolajuj jaj raqen y wuqu' jaj rik'in nik'aj ri ruwech. Y ri ch'aqa' chik retabal xa kan junan rubanik rik'in ri k'o pa relebel-q'ij.

²²Ri ruwa-jay, ri ventana y ri kiwachibel palma e junan kik'in ri ek'o pan okibel ri k'o pa relebel-q'ij. Richin yatapon-q'anej chiri' pa corredor k'o chi yajote' wuqu' grada y wi nibe chupan chijun ri corredor, nok-apo chupan ri jay ri nel-el pa nima-ruwa-jay.

²³Y ri rukojol ri jay ri' rik'in ri okibel ri k'o pa xaman chire ri ko'ol ruwa-jay k'o juwineq lajuj jaj.

²⁴Xeri' ri achin kan xiruk'uaj k'a el pa xokon chire ri tz'aq, ri akuchi k'o-wi ri jun okibel, achi'el ri ch'aqa' chik okibel. Y chijun ri retabal e junan kik'in ri ch'aqa' chik okibel.

²⁵Ri achi'el taq ventana e junan kik'in ri ch'aqa' chik. Y ri retabal wolajuj jaj ri raqen y wuqu' jaj rik'in nik'aj ri ruwech, achi'el ri ch'aqa' chik okibel.

²⁶Ri kiwachibel palma e junan kik'in ri ch'aqa' chik wachibel. Y toq jun nok-apo pa corredor k'o chi nibe-q'anej wuqu' grada y wi nibe chupan chijun ri corredor, nok-apo chupan ri jay ri nel-el pa nima-ruwa-jay.

²⁷Ri rukojol ri jay ri' rik'in ri okibel ri k'o pa xokon chire ri ko'ol ruwa-jay juwineq lajuj jaj, achi'el ri ch'aqa' chik okibel.

²⁸Chirij ri' xiruk'uaj-el pan okibel ri k'o pa xokon chire ri ko'ol ruwa-jay. Y ri retabal ri jay ri' junan kik'in ri ch'aqa' chik okibel,

²⁹y ri raqen wolajuj jaj y ri ruwech wuqu' jaj rik'in nik'aj. Ri jay ri' junan rik'in ri jay ri akuchi nok-apo pa nima-ruwa-jay y ronojel ri retabal e junan chuqa'.

³⁰Y wi nel-el pa nima-ruwa-jay richin nok-apo pa ko'ol ruwa-jay, k'o chi nijote-q'anej waqxaqi' grada. K'ari' nok-apo chupan ri jay richin niq'ax-el pa corredor. Y chupan ri corredor ri' ek'o ruwachibel palma achi'el ri ch'aqa' chik corredor. Y toq nok-apo chupan ri ko'ol ruwa-jay, chiri' k'o ka'i' taq jay, jun pa rajxokon y jun chik pa rijkiq'a'. Y ri raqen chikijujunal ri jay ri' wuqu' jaj rik'in nik'aj y ri ruwech jun jaj rik'in nik'aj.

³¹

³²Y xeri' ri achin xiruk'uaj pan okibel ri k'o pa relebel-q'ij chire ri ko'ol ruwa-jay. Chiri' xretaj ri jay, y ri retabal e junan kik'in ri ch'aqa' chik jay richin ri okibel.

³³Y ri raqen ri jay ri' wolajuj jaj y ri ruwech wuqu' jaj rik'in nik'aj. Ri jay ri' e junan kik'in ri ch'aqa' chik jay ri ek'o pan okibel y ri ketabal chuqa' e junan kik'in ri ch'aqa' chik.

³⁴Y wi nel-el pa nima-ruwa-jay richin nok-apo pa ko'ol ruwa-jay, k'o chi nijote-q'anej waqxaqi' grada. K'ari' nok-apo chupan ri jay richin niq'ax-el pa corredor. Y chupan ri corredor ri' ek'o ruwachibel palma, achi'el ri ch'aqa' chik corredor.

³⁵Y xeri' ri achin xiruk'uaj-el pan okibel ri k'o pa xaman chire ri ko'ol ruwa-jay. Chiri' xretaj ri jay y ri retabal e junan kik'in ri ch'aqa' chik jay richin okibel.

³⁶Y ri raqen ri jay ri' kajlajuj jaj y ri ruwech wuqu' jaj rik'in nik'aj. Ri jay ri' e junan kik'in ri ch'aqa' chik jay richin okibel y ri ketabal chuqa' e junan kik'in ri ch'aqa' chik.

³⁷Y wi nel-el pa nima-ruwa-jay richin nok-apo pa ko'ol ruwa-jay, k'o chi nijote-q'anej waqxaqi' grada. K'ari' nok-apo chupan ri jay richin niq'ax-el pa corredor. Y chupan ri corredor ri' ek'o ruwachibel palma, achi'el ri ch'aqa' chik corredor.

³⁸K'o jun chik jay ri k'o chunaqaj ri ruwa-jay richin ri okibel. Chiri' yech'aj-wi ri chikopi' richin yeporox jumul.

³⁹Y toq yatel-pe pa ruwa-jay y choj yabe pa jay richin nok pa corredor, chiri' k'o kaji' mesa y kaka' pa taq ruxikin. Y chuwech ri' nikichojmirisaj-wi ri jalajoj kiwech kamelabel.

⁴⁰Y chuqa' chiri' pa xaman, k'o chik kaji' mesa, kaka' pa taq ruxikin chire ri grada.

⁴¹Y keri' ek'o kaji' mesa chupan ri jay y kaji' mesa ri ek'o chuwa-jay ri chiri' pan okibel, keri' waqxaqi' mesa ronojel. Y pa kiwi' ri' yekamisex-wi ri chikopi'.

⁴²Ri kaji' mesa ri nik'atzin richin yequpix ri ti'ij richin yeporox jumul, e banon rik'in abej ri e chojmirisan chik y nik'aj jaj raqen, nik'aj jaj ruwech y ka'i' q'a'aj rik'in nik'aj ri rujotolen. Y chuchi' ri mesa ri' q'e'el-apo jun ti che'. Y ri che' ri' oxi' ruwi' q'a'aj ruwech y pa ruwi' ri' niya'ox-wi ri samajibel ri nik'atzin richin nikamisex ri chikop richin niporox.

⁴³

⁴⁴Toq jun nel-el pa corredor richin nok-apo chuwa-jay ri chiri' pa xaman, k'o jun chik jay. Y ri ruchi' nitzu'un pa xokon. Y toq jun nel-el pa corredor richin nok-apo chuwa-jay ri chiri' pa xokon, k'o jun chik jay. Y ri ruchi' nitzu'un pa xaman.

⁴⁵Y ri achin ri nich'on wik'in xubij chuwe chi ri jay ri nitzu'un pa xokon, kichin ri e sacerdote ri yesamej pa rachoch ri Dios.

⁴⁶Y ri jay ri nitzu'un pa xaman, kichin ri e sacerdote ri yesamej rik'in ri porobel. Konojel rije' e rijatzul kan ri Sadoc y roma ri' xa kan xaxe rije' chikikojol ri e rijatzul kan ri Leví ri ruk'amon yesamej chiri' chuwech ri Jehová.

⁴⁷Chirij ri' ri achin xretaj ri ti ruwa-jay ri k'o chuwech ri rachoch ri Dios y ri ruwech juwineq lajuj jaj y chuqa' ri raqen juwineq lajuj jaj. Y ri chiri' k'o jun porobel.

⁴⁸Chuqa' ri achin xiruk'uaj-el k'a pan okibel richin ri rachoch, akuchi k'o jun jay ri k'o chi naq'axaj richin yatok pa rachoch ri Dios. Ri retabal re jay re' waqi' jaj ruwech y oxi' jaj rik'in oxi' q'a'aj raqen. Ri ruchi-jay kaji' jaj rik'in jun q'a'aj ruwech y ek'o ka'i' pilar pa taq ruxikin. Y ri ruwech chikijujunal ri pilar ri' jun jaj y ri rupimil k'o jun jaj rik'in jun q'a'aj. Y richin yatok chupan ri jay ri' k'o chi yajote-q'anej pa grada.