Read Kaqchikel Ez 42 Bible Online

Ez 42 - Kaqchikel bible

Ez 42

¹Y xeri' xirelesaj-el chuwa-jay ri k'o pa xaman y xiruk'uaj-el akuchi kik'uan-ki' k'iy taq jay ri kitunun-ki' rik'in ri tz'aq richin ri ruwa-jay.

²Ri ruchi' ri taq jay ri' yetzu'un pa xaman y ri kiwech ri taq jay ri' juwineq lajuj jaj y wolajuj jaj kaqen.

³Ri pa xokon richin ri jay ri' k'o ri ruwa-jay ri k'o chuwech ri rachoch ri Dios. Y re ruwa-jay re' waqi' jaj raqen. Y ri pa xaman richin ri jay ri' k'o ri jun chik nim ruwa-jay. Y re jay re' ruk'uan oxi' wiq.

⁴Y chikiwech ri jay ri' k'o jun corredor ri oxi' jaj ruwech y juwineq lajuj jaj raqen. Y ri okibel kichin ri taq jay ri' yetzu'un pa xaman.

⁵Ri jay ri ek'o-q'anej más chikaj, roma k'o ru-corredor más e ko'ol ok chikiwech ri jay ri ek'o-qa pa nik'aj. Y ri jay ri ek'o-q'anej pa nik'aj, roma k'o ru-corredor, más e ko'ol chikiwech ri jay ri ek'o-qa pa xulan.

⁶Re jay re' e banon oxi' wiq chike, jak'a man kik'uan ta pilar achi'el ri taq jay richin ri ruwa-jay. Roma ri' ri k'o-q'anej pa nabey, más ko'ol chuwech ri k'o-qa pa xulan y ri k'o pa nik'aj.

⁷Y chuwech ri corredor kichin ri taq jay ri' ya'on tz'aq ri wolajuj jaj raqen.

⁸Y pa ruk'isibel chire ri tz'aq ri', ek'o chik ch'aqa' jay. Y ri raqen ri taq jay ri' wolajuj jaj. Y keri' ri raqen ri taq jay y ri tz'aq juwineq lajuj jaj.

⁹Y ri akuchi niban-wi oken chire ri jay ri', pa ruwa-jay ri kere' pa relebel-q'ij.

¹⁰Y ri pa xokon chire ri rachoch ri Dios kitunun-ki' rik'in ri tz'aq richin ri ruwa-jay y chiri' ek'o chuqa' taq jay.

¹¹Kan junan kibanik, kan junan ketabal, kan junan banon chike. K'o chuqa' akuchi niban-wi oken y elen, kan achi'el ri taq jay ri ek'o pa xaman y chuqa' kan k'o kikojolil.

¹²Richin chi yatapon k'a akuchi ek'o-wi ri taq jay ri ek'o pa xokon, k'o jun ruchi-jay ri k'o kere' pa relebel-q'ij chunaqaj ri tz'aq.

¹³K'ari' ri achin xubij chuwe chi ri jay ri ek'o pa xaman y ri ek'o pa xokon chire ri ruwa-jay ri k'o chuwech ri rachoch ri Dios, re' kan e ch'aron kichin ri sacerdote. Kan chiri' xtikitej-wi ri sipanik ri ch'aron chire ri Jehová, nel chi tzij ri sipanik ri jalajoj ruwech ixin, ri kamelabel richin kuyubel-mak y ri kamelabel richin ch'a'oj, roma re jay re' kan e ch'aron chire rija'.

¹⁴Toq ri e sacerdote ye'ok-apo pa rachoch ri Dios richin nibekibana' ri rusamaj rija', man chik ye'el ta pe chuwa-jay roma kikusan kitziaq richin rusamaj ri Dios, roma ri tzieq ri' kan ch'aron. Y richin chi ye'el-el ri akuchi ek'o-wi ri winaqi' kan k'o chi nikikusaj jun chik kitziaq.

¹⁵Y kan xaxe k'a toq xtane-qa chi retaxik ronojel re', k'ari' xirelesaj-el chiri' pa ruchi-jay ri nitzu'un pa relebel-q'ij y k'ari' xretaj ri tz'aq ri rusutin-rij chijun ri rachoch ri Dios.

¹⁶Y ri raqen ri tz'aq ri k'o kere' pa relebel-q'ij xuya' 150 jaj.

¹⁷Y xeri' xretaj ri raqen ri tz'aq ri k'o pa xaman, ri k'o pa qajbel-q'ij y ri k'o chuqa' pa xokon. Y ri kaqen chikijujunal ri tz'aq ri' 150 jaj.

²⁰Keri' k'a xeretaj ri kaji' kaqen ri tz'aq ri rusutin-rij ri rachoch ri Dios y ri kaqen chikijujunal re tz'aq re' 150 jaj. Y ja tz'aq re' ri rukojol ri ch'aron chire ri Dios y ri akuchi yek'oje-wi ri winaqi'.